COUNG" NGHEI 52
1 Bugthu sheing" jhu" da" byu we"- nang gi ciyoomo
re" da" akhyeung" khyoo: moo phau: khuang nyid lha".
Mangso jeju" gi pyaid didu moo: dageung: teung jo.
2 Nang gi gooji byo, yoin" loo" wa khyoo: soin nyheung nyid
Re" da" yhoo: gi tho' da" sham: soo" yhang: ti" nghoid nyid.
Nang gi mhau, fain" dang: ri khanham we' damyhu: thu nyid.
3 Nang gi ge da" tho' moo akhyeung" ziri we'
deungmain" jang" moo: shoid vhang: khyoo: ri we' daje vho: ngei nyid.
4 Mhau' fain" nyid su: we"- nang gi nanya: nhoid khoin" thui: yo'
byu gooji yi da" nheigloem: ri noo sho' tid wa ziri davho: ngei nyid da:.
5 Hougsu" nghoid nyid yoomo Mangsoo gi nang ri
apyaid atoo: moo: ju" sho' phyo' shoin pyam byid: wam bye:.
Nyang: gi nang ri zei: ci: lho: nanya: yhoem: mo wigi lang: she: thu pyam wa zi nghoid.
6 Deung byeung" da" byu yigi hau: khyoo: ri myang yoomo gyoug lo boem wa zi nghoid.
Houg: lang" Nyangnu" gi nang ri yi moug thui: yo' tid zigi
7 Yu" ge' nyang: gau: nyu: wa shid re" Mangsoo ri aloem loo za:
hau: gungkhoo: nya: da" myo: tham: jonu" yo'
akhyeing" ashoeb khyoo: moo gau: nyu: khyoo: sho: nyid da" byu dayug hid: moo: nyid" ga: wigi tid.
8 Nghoid loug we' ngoo gi Mangso da" yhoem: moo: youg jo, da-
zhainloin: seiggam' yhang: ti" nghoid nyid.
Ngoo gi nya: da" dageung: teung jo, da" jhed khyeing: kang: khyeing: ri
pyaid moo: too: moo: daloem khau: nyid wa zi nghoid.
9 Mangsoo we"- nang koid shug bye: da" moo" zoo" joem yoomo
ngoo gi khanham we' nang ri jeju" daboin: nyid wa.
Re" byumyu" yi da" shidkhoin" moo nang gi:
gi su: nghoid da" khyoo: ri ngoo tid fu" byid: nyid wa nghoid.