COUNG" NGHEI 50
1 Gyi: myhang: da" Mangsoo tid zigi bid thu' mo bidvang ju" sho'
mougmyid gyab, goin" ri nyang: khe: nyid.
2 Mangsoo gi nya: da" joeb byeung" young" du, jo voomoo" Ziun mo wigi thoin" pang byid: nyid.
3 Ngoonu" da" Mangsoo gi re" lo nyid uri sam" zoo: ju" ri" zi anghoid.
Nya: shidkhoin" moo: myiyham: dab nyid wigi
nya: ayam' aqei: moo thain: da" uglid zeing hau, nyid.
4 Nya: da" byumyu" yiri nyang:- tarha" dang: phyed zi shau" myang wa shid re"
Aseing gi mougkhung: mougdi yo' mougmyid yoosoo" ri thang" cab koid wa ga: khe: nyid bye:.
5 Xoin" to' zho" lho: ngoo yo' dang: theing go" too" bang-
nga" da" nheigloem: zung" byumyu" yiri thang" cab koid wa ga: khe: nyid bye:.
6 Mangsoo gi deing byeung" su: nghoid yoomo nyang: nyang: tarha" agyi nghoid nyid ziri
mougkhung: mougdi gi tid fu" byid: nyid.
7 Nga" da" byumyu" yi we' tam" gyoo: ge' ngoo dang: tid wa.
Israela we' ngoo nang ri yooboo foin: da" sagse: kham' kyoo" ba.
Ngoo gi Mangsoo- re" da" Mangsoo nghoid.
8 Nang gi ngoo ri khanham we' re" da" joeb byeung" xoin" yo'
myi nghi, xoin" ngoo ri to' byid: nyid yoomo ngoo nang ri gyikoid wa zi anghoid.
9 Nghoid loug we' re" da" kyung mo nuloo: ri nghoid loug we'
re" da" khyam: mo coidbaid joem ri we' ngoo avhoo.
10 Siyoo sigam: moo: nyid da- gougnyhoug goug: doo: dangain" yo'
bouggung khyeing" moin" moo: nyid da-
gougnyhoug goug: doo: joem we' nga" zi nghoid.
11 Moug: moo: dang: da" ngho' dangain" yo' mhain" lham" jang: dam moo: dei nyid da"
gougnyhoug dangain" we' nga" zi nghoid.
12 Ngoo zooyoid nyid ri zoo: noem shid re" nang ri mho' wa zi anghoid.
Khasu" wim ga: ri mougmyid gyab goin" yo' hougmoo: jo, moo: jo, gi nga" zi nghoid.
13 Ngoo gi nu: joem da" shoo" zo: nyid la".
Coidbaid joem da" suid" shoug nyid la".
14 Jeju" boin: coung" ngei zigi Mangsoo ri: nghei" byid: da" re" xoin" nghoid baja".
nang dangsoo" byid: to" zi dangain- gyi: myhang: Mangsoo ri byid: pyam we'.
15 Yau: khe" zi shoug" nyid uri nang ngoo ri yoid we' ngoo gi nang ri khyoid khyu: yu wa zi nghoid.
Houg: lang" nang gi ngoo ri coung" nghei byid: wa anghoid ga: tid.
16 Nghoid loug we' Mangsoo gi akhyeung" su: rigi
nang gi ci yoomo nga" da" Dang: theing khoin" ri yo" tid nyid wa la".
nang gi ciwim wigi nga" da" dang: theing khoin" ri tid nyid wa lha".
17 Ngoo so' koid so' soin da" dang: ri nang gi ngeug pyam lho: wigi
nga" da" amyeing" dang: joem ri nang she: pyam nyid da:.
18 Nang gi shoug" go" da- khoug" foeb yugkhang" mo" da" byencang" bue" lho:
myilhoid lang lhoid bang: yo' dage- nang zoem" nyid yen" da:.
19 Nang gi akhyeung" dang: tid wa shid re" khanham we' nhoid yid moo: bo jo, da:.
Mhau' fain" da" dang: ri tid wa shid re" nang khanham we' anei" nyid nghoid da:.
20 Re" da" noug" shoin" mang: nhung" yiri yooboo foin: wa ziyo'
Nyangnu" ri age khyo" myang wa shid re" we' nang jen" jen" nghoid.
21 Hau: khyoo: dangain" ri nang koid lo yu" abye:-
ngoo ce" dang: we' atid yoomo nang yhang: ti" nghoid ga: nang myid nyid da:.
Nghoid loug we' akhid" koem gi ngoo nang ri jhau" shed byid: ziyo'
nang ri hau: khyoo: bang bang tid kyoo" wa.
22 Ngoo ri: asi, goin koid su: nang we' he: da" dang: khoin" ri tam" gyo: yu" we'.
Hougsu" anghoid rigi ngoo nanu" ri lhu: phyo' sain" pyam, byid: wam: bye:.
Nang ri khyoid yu wa zi dayug we' nyid loo: wa zi anghoid.
23 Jeju" boin: so" khyoo: joem gi ngoo ri phoug" tab, ngi: shab xoin" nghoid.
Nga" da" dang: tam" gyoo: bang: dangain" mo, ri
ngoo gi gyeing" gyeing" nyang: khyoid yu wa zi nghoid.