COUNG" NGHEI 5
1 Aseing we" nga" da" dang: joem ri tam" gyoo: byid: we'.
Nga" nookyeing" thui: ri: shoug" gyoo: byid: we'.
2 Nga" Mangsoo yo' khokham" phoo we" pang" thoug yu wa shid re"
nga" da" mho' yoid thui: ri tam" gyoo: byid: we'.
O" Aseing we" ngoo akyu" mho' nyid.
3 Nang gi nab soin: zoo" ri nga" thui: ri tam" gyoo: byid: nyid da:.
Bidxain" u" ri we' nga" da" akyu" mho' ziyo' nang ri ngei" byid: wigi
re" da" doem phoug khyoo: ri dalang" nyid.
4 Nang gi adeung amain" da" moo" zoo" ri
vho: ngei nyid da" Mangsoo anghoid.
Re" da" shidkhoin" moo: akhyeung" da" moo" zoo" ce" ja: ri nghoid loug we'
nang bue" loo nhang: zi anghoid.
5 Phau: khuang nghoid boin: nyid mo, gi
re" shidkhoin" moo ayo" yab jo.
Nang gi akhyeung" byu yi dangain" ri ngheung" nyid.
6 Aseing gi mhau' fain" da" dang: tid mo, dangain" ri lhu: phyo' pyam ziyo'
suid" moid lhu: yen" mo, ri co' nyid.
7 Nghoid loug we' re" da" geung: teung jhedkhyeing: kang: khyeing: yoomo
ngoo gi re" yhoem: moo" khyoo: yo" ju" re".
Re" da" gyeung" shang: Noku Yhoem: Moo" moo: ngoo noku lho:
nang ri gyoug phau" zoore goeb pid nyid.
8 Aseing we"- ngoo moo: gyivoo myoo" sho bo jo,
nang vho: ziyo' dakhyoo" ti" yhi: wa shid re"
ngoo ri khyoo: shed byid: we'.
Re" khyoo: moo: yo" cang sho ngoo ri gyeing: gyeing: se' gyoo: nhang: we'.
9 Nga" gyivoo joem tid da" dang: ce: ja: ri we' khanham we' age loem".
Nyangnu" gi lhu: phyo' pyam wa shid re" za: davho: ngei nyid boem ago".
Nyangnu" tid sang: da" dang: thui: joem gi cau: main, ziyo'
mhoid" coung" nyid boem nghoid loug we'
hau: zigi gyoug ca" da" mhau' dang: khoin" joem yo' byeung" jo.
10 Mangsoo we"- ngoonu" ri tarha" dang: phyed lho: shen" yhen we'.
Ngoonu" soin da" akhyoo" joem moo
nyangnu" nyang: bo yoin" byo, loo" goo" baja"
Nyangnu" gi nang ri gyi koid nyid yoomo
nyangnu" ri re" da" shidkhoin" mo koin" thu pyam we'.
11 Nghoid loug we' nang mo goem loem khyoo: shoug" shoo: mo, gi
ngei pyo: gau yi boem wa zi za nghoid.
Nyangnu" gi khanham we' jikhoin" yo'
coung" nghei nyid boem wa zi nghoid.
Nang ri jheddab mo, ri goem loem byid: nyid we'.
Nang yoomo nyangnu" gi gye" gau yi nyid boem.
12 Aseing we" nang gi nang ri tam" gyo: nyid mo, ri mainkaid wigi
ngoonu" ri goo yhang: ti" lhoug zung" byid: nyid.