COUNG" NGHEI 42
MOUGSOUG" EIG PUG
1 Xaid gi gyid jham" gyung: ri nheug nhei: nyid yhang: ti"
Mangsoo we"- ngoo we' nang ri nheug nhei: nyid.
2 Dadei nyid da" Mangsoo we"- ngoo nang ri gyid su' shed nyid.
Ngoo gi re" da" shidkhoin" moo khanham ri she' yo" ju" re" wigi yo" coung" pid nyid wa lha".
3 Ngoo gi nyid" ri myen" ri dangau nyid.
Houg: yoomo ngoug byid gi nga" da" zoo: noem bue" nyid.
?Re" da" Mangsoo khayoo: nyid la"? ga: wigi nga" gyivoo joem gi
ayo, khang" moo ngoo ri damyed: nyid boem.
4 Lai loo" bye: da" khyoo: joem ri ngoo myid yu" kaid uri
nga" nheigloem: moo: atho' tid kougshu: nyid.
Mangso yhoem: khyoo: byu phung: yi yo' dage"
ngoo do, lo" uri gau yi da" byuphung: gi
Mangsoo ri jikhoin" coung" nghei thui: yo'
gau yi nyho: nyid boem wigi nyangnu" ri shu" do, lo" yu bye:.
5 Ci: yoomo ngoo gi hid: yhi' gyeing" kougshu: nyid lha".
Ngoo gi ciyoomo hid: yhi' gyeing" kyi" khyeug zi shoug" nyid lha".
Ngoo gi Mangsoo moo: nheug byu nyid lho:
nga" da" khyoid yu Aseing yo' nga" Mangsoo ri
dalheung: doem coung" nghei wa nghoid.
6-7 Ngoo gi goo" meing: khaid thu shau" da-
he: jo yoo moo nga" nheigloem: gye" nge" nyid bye:.
Hougsu" nyang: gi koug shu: being: mhoid joem ri nga" atho' moo: du" phyu" to" nyid bye:.
Lhu: phyo' lhu: shoin' khyoo: gi gyid ji: zoo" yhang: ti" nga" shid moo: myeung nyid.
Hau: zigi hermon boem yo' Miza boem mo wigi
Yodan gyid lang khyoo: moug: goem: thui: yhang: ti"
myeung gyoo' lo" da thui: yo' du nyid.
8 Aseing gi nyid" ayo, moo nya: da" geung: teung jhed khyeing: kang: khyeing: ri toin" shed nyid baja".
Houg: yoomo myen" ayo, moo ngoo gi jikhoin" yo' coung" nghei nyid wigi
nga" kang so, Aseing Mangsoo ri akyu" mho' baja".
9 Nang gi ci yoomo ngoo ri to" myhed pyam nyid lha".
Nga" gyivoo joem akhyeung" da" khyoo: mo
ngoo gi ci yoomo xo' phu" zoo: ca" wa lha" ein: wigi
nga" da" goem loem Mangsoo ri ngoo myid: bye:.
10 ?Re" Mangsoo khayoo: nyid lha"? ga: wigi nyangnu" ngoo ri
khanham we' damyed: nyid boem yoomo
nyangnu" da" juang" yi da" kyi" khyeug ri kham' zo: nyid.
11 Ngoo gi ciyoomo- hid: yhi' gyeing" kougshu: nyid lha".
Ngoo gi ciyoomo- hid: yhi' kyi" khyeug zi shoug" nyid lha".
Ngoo gi Mangsoo moo: nheug byu nyid lho: nga" da" khyoid yu Aseing yo'
nga" Mangsoo ri ngoo dalheung: dam coung" nghei wa.