COUNG" NGHEI 39
?Ngoo zei: da" moo" zoo" moo lhed zed" zoore nyid wa nghoid.
Nga" yhoo: yo' ngoo yooboo ri: akoid nhang: wa
akhyeung" byu yi jhang lo" nyid ri ngoo ciwe' tid kyoo" wa zi anghoid? ein: wigi ngoo tid bye:.
Ge lho, da" khyoo: rilang" dang: dakhoin" we' atid loo za: ngoo sam" zoo: datam" to".
Nghoid loug we' nga" phu" zo: khyoo: gi daje myo: yau: lo.
Myid myoo: ung: loug khyoo: gi ngoo ri zeung" lhoung pyam bye:.
Ngoo je" myid yu" lang" je yau: khe? khyoo: gi daje myo: lo nyid.
?Aseing we" ngoo gi khamyhang ju" sho' dei nyid wa lha".
Ngoo gi khanham shid: loo" wa lha".
Nga" kangso' khanham thang loo" wa ngoo ri tid kyoo" we' o".?
Nang byid: to" da" nga" kang: so' gi khayhi' leung" jo lha".
Re" da" shid moo: nga" da" kangso' apyaid gi ci" we' anghoid.
Gyeing" nyang: dadei nyid da" byu yugkhang" moo" gi so' she: nyid da" lid yo'
yoeb, byoo daloem: tho' moo: lang" je nyid zi anghoid.
Nyang: zei: da" moo" zoo" dangain" we' akoem: shid re" za: nghoid nyid wigi
nyang: gi jonu" ri young: too" nghoid loug we'
hau: ziri hang" shoug" seing: wa zigi nyang: asi.
Aseing we" ngoo gi khate" ziri nheug ge byu nyid wa lha".
Nga" nheug byu joyoo gi nang moo: za: danghoid nyid.
Nga" yooboo dangain" jang" mo ngoo ri khyoid yu lho:
koo" mo, wigi ngoo ri ajuang" ayi pyam nhang:.
Nang gi ngoo ri hid: yhang: te" da- phu" zo: khyoo: shoug" nhang: su: gi
nang nghoid nyid yoomo ngoo dang: dakhoin" we' atid- sam" zoo: tam" too" wa.
10 Ngoo ri: ashen" yhen nyid nang baid yoomo ngoo shid: lo" nyid bye:.
11 Re" da" jhau" mho' khyoo: khyo" wigi byu da" yooboo ri nang shen" yhen nyid.
Hau: lho: nang jheddab da" zi joem ri nhau zo: shoin, pyam yhang: ti" nang phyo' shoin pyam, nyid.
Gyeing" nyang: byu dayug gi so, thid she: da" lid daloem mo je nyid zi anghoid.
12 Aseing we" nga" da" akyu" mho' khyoo: ri tam" gyoo: byid: we'.
Ngoo nyho: mho' yoid thui: ri shoug" gyoo: byid: we'.
Ngoo ngougmyeing" shu: thui: to" nyid ri ngoo ri re" pang" yu we'.
Nga" phoug" phyid" yi dangain" bang: yhang: ti"
ngoo gi re" da" daso, kyeung" da" being" voo za: date: nghoid.
13 Ngoo ashid: loo" shi" ri goug goug yi yi shoug" nyid wa shid re"
nga" jang" mo vi" vi: moo: nyid we'.