COUNG" NGHEI 38
O" Aseing we" re" da" nheug yo: ziyo' ngoo ri khashen" yhen nyid.
Re" da" myookhaid joem yoomo ngoo dam dab, jo, bye:.
nang gi ngoo ri baid lheung: to" abye:.
Re" da" nheug yo: khyoo: yoomo ngoo atho' tid no nyid bye:.
Nga" yooboo joem yoomo nga" da" gung goin" noobau: phyoobau: vang jo, bye:.
Ngoo gi ngoonya: da" yooboo gyid ji: zoo" moo bo noeb lo" nyid bye:.
hau: khyoo: joem gi atho' oung: kham' sho' lid: da" yoolid: daloem: nghoid nyid.
Ngoo gi akoo" afang: su: danghoid loo: yoomo nga" dam joid joem gi boeb, nam nyid bye:.
Ngoo gi gyau: nghoug jo, bye:- ngoo gi thoung" mhoin' pyam zi shoug" bye:.
Houg: yoomo ngoo gi danyid" goin" danyho: ngau nyid.
Ngoo gi gung nge" no nyid ziyo' shid: loo" looyid danghoid lo:.
Ngoo gi myoung: dau nyid ziyo' gyeing" nyang: mhoin' mhoin' zi danghoid lo:.
Nga" nheigloem: emyed we' myid myoo: ung: loug zi shoug" lho:
amyen akhyoid nookyeing" dakyeung" nyid lo.
O" Aseing we" ngoo cenoem ri vho: ngei nyid ziri nang se' nyid.
Nga" nookyeing" thui: dangain" ri we' nang shoug" gyoo: byid: nyid bye:.
10 Nga" nheigloem: seing" gung thoung" nyid bye:- nga" yoem: so' we bain thang bye:.
Nga" myojid" we' yoem: aboo loo.
11 Nga" da" dam, noo joem yoomo nga" byencang" yi yo' yhoem: kyoo" cang" yigi
nga" jang" moo: are" lo boem loo: wa.
Nga" da" yhoem: byu yi lang" nga" jang" mo ve: gang: loo" bye:.
12 Ngoo ri: said pyam noug mo nga" shid re"
lhid thoung: to" boem wigi ngoo ri noo nhang: noug mo, gi
ngoo ri yo" lhu: phyo' pyam wa shid re" kyug nhain' nyid ago".
Nyangnu" gi anoo: ayab, loo ngoo ri: age khyo" soin' nyid ago".
13 Ngoo gi nujed su: dayug yhang: ti" ci" we' ashoug" gyoo.
Nhoid jed, su: dayug yhang: ti" ci" we' ayo" tid loo.
14 Ngoo gi ashoug" gyoo: yoomo
ayo" phoug tu" da- byu dayug yo' du nyid.
15 Nghoid loug we' o" Aseing we" ngoo gi nang ri za: daloem khau: nyid.
Nga" Aseing Mangsoo we"- nang gi ngoo ri tu" byid: wa zi nghoid.
16 Ngoo ri gyi koid nyid mo nga" da" myid myoo: ung: loug da" khyoo: moo ayu" gau, nyid nhang:.
Ngoo gyo" soem" lo" da" khyoo: moo: we' nyangnu" ri aphau: khuang nyid nhang:.
17 Ngoo gi leung loo" wa zi date: nghoid lo: ziyo'
atheing: loo: no nyid.
18 Nga" yooboo joem ri we' ngoo yhen: yu nyid.
Hau: yooboo joem gi ngoo ri myid myoo: ung: loug nhang: nyid.
19 Nga" gyivoo joem gi- yang" zain" boem ziyo' yoem: bo nyid boem.
Ce" yooboo we' ayoo" yoomo ngoo ri nheing" mo, myoo" sho' nyid.
20 Ge da" moo" zo" shid re" akhyeing" ashoeb khyo" latoo: phoug nyid mo, gi
ngoo jo da" moo" zei: yoomo ngoo ri thougtheung nyid boem.
21 Aseing we" ngoo ri ato" pyam- nga" Mangsoo we"-
ngoo yo' vi" vi: moo: anyid ja.
22 Ngoo ri: khyoid yu da" Aseing we"
ngoo ri akhid" nyang: pang" thoug yu we' o".