COUNG" NGHEI 37
1 Akhyeing" ashoeb zi koid mo, yoomo myid amyo: nyid.
adeing amain" da" moo" zei: bang: ri ayu" no" nyid.
2 Kyoug lo" byoug da" vu, fu" kyang: yhang: ti"
nyangnu" gi khamyhang amyang" ri bei: lo" boug boem wa nghoid.
Nyhau" lo" da" mhain" nyoug joem yhang: ti" Nyangnu" shid: lo" byoug boem wa.
3 Hau: Aseing ri nghe: khau: lo- ge da" moo" ri zei: nyid we'.
Mungdain: moo: nyid lho: gau: nyu: myenjham" nyid we'.
4 Hau: Aseing moo: re" da" gau yi khyoo: sho: nyid we'
Nyang: gi nang myid vho: khyoo: byid: wa zi nghoid.
5 Re" da" gung du: hau" Aseing ri ab byid: we'.
Nyang: ri loem we' nyang: gi nang ri pang" thoug yu wa zi nghoid.
6 Re" da" deingmain" khyoo: ri nyid" gung mo bidbang yhang: ti"
nyang: thoin" pang byid: wa zi nghoid.
7 Hau: Aseing shidkhoin" moo: sam" zoo: nyid wigi
nyang: zei: bui" byid: wa ziri lang" nyid we'.
Akhyeung" bang: da" akhyeung" khyo" myid soin: lo" khyoo: moo oung: doid lo" wa ziri we'
nyid gi nyid de lo ziri we' seing" ayu" kho" nyid goo.
8 Myid amyoo- nheug we' ayo: nyid.
Hau: zigi nang ri yau: khe" kyi" khyeug khyoo: za: dabui" nhang: nyid.
9 Hau: Aseing moo: nghe: khau: nyid mo, gi mungdain: ri shoug" seung: nyid boem wa.
Nghoid loug we' akhyeing" ashoeb bang: gi khaid thu pyam zi shau" boem wa nghoid.
10 Hougsu" khamyhang amyang" ri akhyeing" ashoeb bang: gi
bei: lo" byoug wigi nang gi nyangnu" ri
shoo: nghoid loug we' akhyeing" ashoeb bang: gi
khaid thu pyam zi shau" boem wa nghoid.
11 Nghoid loug we' nheigloem: khyo nyhoem: bang: koem gi
mungdain: ri shoug" seung: nyid boem wa nghoid.
Nyid gi nyid de khyoo: yo' ngei pyo: myenjham" khyoo: ri shoug" kham: yu boem wa.
12 Akhyeing" ashoeb da" byu yigi byu gi bi" ri age khyo" soin: lho:
Nyangnu" gi anoug angei da" myojid" yo' yu" zhoug to" ago".
13 Nghoid loug we' akhyeing" ashoeb bang: gi
khamyhang amyang" ri phyo' shoin pyam shoug" wa ziri
Aseing gi se' nyid yoomo nyang: gi nyangnu" ri yu" yi nyid.
14 Asho" ajhen: bang: yo' ca" nyid bang: ri we'
said pyam wa ga: akhyeing" ashoeb bang: gi nyangnu" da" sham ri she: lho:
lid: joem ri we' thoung: ci: abye: go".
15 Nghoid loug we' nyangnu" gi nyangnu" da" sham: yo' nyang:
said pyam zi shoug" wa ziyo'
nyangnu" da" lid: joem ri we' myheug khyau" mhoin' pyam zi shau" boem wa.
16 Byugi dayoug da" jonu" dajhi' kyeung" da? zigi
akhyeing" ashoeb su: myoo" sho' yo" da" jonu" dangain" tho' moo phoug" je dab, nyid.
17 Khasu" wim ga: ri Aseing gi akhyeing" ashoeb su: da" yoem: vhoo" ri khyoug" pyam byid: loo wa.
Nghoid loug we' byugi yiri koem gi nyang: lhoug zung" goem coung: byid: nyid wa zi nghoid.
18 Aseing da" dang: tam" gyo: nyid bang: rigi
nyang: nheug khyeug shoo" myen: nyid wigi
mungdain: ri nyangnu" apyaid atoo: shoug" seung: ci: boem wa zi nghoid.
19 Yau: khe" kyi" khyeug shau" nyid da" bid nyid ri
kyi" khyeug sho" jhen: zi nyangnu" shoug" wa zi anghoid.
Zooyoid, phang" khoug gyo" uri nyangnu" gi ca" yo khyoo:
agoin' agoo" shoug" kham yu boem wa zi nghoid.
20 Nghoid loug we' akhyeing" ashoeb bang: gi shid: boem: loo" goo" wa nghoid.
Aseing da" gyivoo joem we' siyoo, mo da" bain: joem yhang: ti"
shoem: lo" byoug wigi nyangnu" gi myikhoug" su" bei: lo" byoug boem wa.
21 Akhyeing" ashoeb su: gi jhed" ci: lho: khanham we' ayo" doem xab, loo.
Nghoid loug we' byugi yigi nyangnu" da" jhungshug jhung: lang: joem ri agoin: ayu byid:.
22 Aseing wigi mainkaid byid: zi shoug" mo, gi mungdain: ri shoug" seung: boem wa.
Nghoid loug we' nya: jang" mo nheing" khoin" zang" jo, mo, koem gi
koin" thu' pyam zi shau" boem wa.
23 Aseing gi byu ri nyang: yhi: eung: da" khyoo: moo vhu" she: nyid lho:
nyang: vho: ngei bang: ri lhoug zung" byid: nyid.
24 Nyangnu" gi to' leung loo" nghoid loug we' jha" leung jo, wa zi anghoid.
Khasu" wim ga: ri Aseing gi nyangnu" ri pang" tu: to' kaid wa zi nghoid.
25 Akhid" gi ngoo mang: bye:- ngoo gi ayo, myang" sho' nyid loo bye:.
Nghoid loug we' byugi yiri Aseing wigi she: pyam to" ziri
byugi yi da" nya: zoo: yi zoo: noem mho' zo: yen" ziri ngoo khanham we' amyang yu".
26 Nyang: gi ayo, khang moo agoin' ayu: byid: nyid wigi gooji yiri yo" jhed" byid: nyid.
Nya: zoo: nya: myid: yi we' jeju" jhungshug bue" nyid boem.
27 Akhyeung" khyoo: ri jang" pyam, lho: ge da" moo" ri zei: nyid we'.
Houg: lang" re" da" amyed ashen yigi
hau: moug: moo: khanham we' shoug" nyid nyid boem wa nghoid.
28 Khasu" wim ga: ri Aseing gi deungmain" da" khyoo: ri jheddab nyid wigi
nheigloem: zung" da" nya: byumyu" yiri ashe: pyam.
Nyang: gi nyangnu" ri apyaid atoo: moo lhoug zung" goem loem byid: nyid loug we'
akhyeing" ashoeb su: da" amyed, ashen yi rigi koin" thu' pyam zi shau" boem wa nghoid.
29 Deung byeung" da" byumyu" yigi mungdain: ri yo" seung: boem wa ziyo'
hau: mungdain: moo: khanham we' shoug" nyid nyid boem wa nghoid.
30 Byugi dayug da" nhoid moo: gi phajhi" dang: bo nyid.
Nyang: gi khanham we' akhyoo" jang lho: young" du nyid.
31 Nyang: gi Mangso tarha" ri nya: nheigloem: ung: khoug: moo: shoung: to" wigi
hau: tarha" ri khanham we' ashe: pyam nghoid da:.
32 Akhyeing" ashoeb su: gi byugi yiri co' nyid wigi
nyang: ri said pyam wa shid re yoem: kaid nyid.
33 Nghoid loug we' Aseing gi nya: da" gyivoo pho, da" lo, moo: ab byid: pyam wa zi anghoid.
Nyang: gi dang: phyed zi shoug" nyid uri
yooboo dam kaid zi shoug" nhang: wa zi anghoid.
34 Aseing moo: nheug byu nyid wigi nyang: pyeung: to" da" dang: ri tam" gyo: nyid we'.
Nyang: gi nang ri mungdain: byid: khyo" nang ri coung" nghei ngi: shab wa.
Hau: lho: akhyeing" ashoeb bang: rigi koin" thu pyam ziri nang shau" myang wa nghoid.
35 Zeig zoo: ung: zo: nyid da" akhyeing" ashoeb su: ri ngoo dalheung: se' yu" bye:.
Nyang: gi Lebanon boem mo shamu gam yhang: ti" yugkhang" mo, atho' moo: nghoeb ci: abye:.
36 Nghoid loug we' hau: thang: moo: ngoo lid lo' yu" uri nyang: hau: joyoo moo: anyid lo.
Nyang: ri ngoo sho: yu" nghoid loug we' nyang: ri amyang loo.
37 Byugi yiri xoem" too" ge'- deungbyeung" su: ri yu" nyid we'.
myenjham" su: gi amyed ashen myoo" sho' yo.
38 Nghoid loug we' yooboo dab da" byu yigi jhoid" nyang: byu xuid" vooyoem: zi shoug" lho:
nyangnu" da" amyed ashen yigi shoem" thu' pyam zi shoug" nyid.
39 Aseing gi deing byeung" mo, ri khyoid yu wigi yau: khi" zi shoug" nyid da" ayo, moo
Nyangnu" ri zung" byid: lhoug byid: nyid.
40 Nyang: gi nyangnu" ri pang" thoug lho lhoid pyoin yu nyid.
Nyangnu" gi nya: jang" moo goem loem yu byid: wa shid re" ju" re" nyid boem yoomo
nyang: gi nyang: nu" ri akhyeing" ashoeb bang: da" lo, mo khyoid yu byid: nyid.