COUNG" NGHEI 36
1 Yooboo gi akhyeing" su: da" no, thang nheigloem: khoug: moo dang: tid nyid.
Nyang: gi Mangsoo ri ngeug pyam wigi
nyang: moo: Mangsoo ri: phau" gyoug khyoo: ci: we' aboo.
2 Khasu" wim gari nyang: gi nya: gung ri gye" nghoid yoo, so" nyid.
Mangsoo gi nya: yooboo ri myang wa zi anghoid-
yooboo dam we' kaid wa zi anghoid ga: nyang: jho: nyid.
3 Nya: da" tid sang: dang: gi akhyeing" ashoeb ziyo' mhau, fain" dang: yo' byeung" jo.
Nyang: gi phajhi" bo khyoo: yo' ge lho, khyoo: ri dajhi' we' akoid yu.
4 Nyang: gi nya: da" yhoeb yoo moo: leung jo, shi" mo akhyeung" da" moo" ri dasoin: yu" nyid.
Nyang: koid da" moo" gi ge zi ci" we' aboo.
Hau: lho: akhyeung" da" khyoo: ri nyang: khanham we' angeug pyam yu.
5 Aseing we" re" da" geung: teung jhed khyeing: kang: khyeing: gi
mougkhung: mougdi ju" sho' myhi: jo, wigi
re" nheigloem: zung" khyoo: gi mougkhung: ju" sho' ce" je: lo.
6 Re" da" deingmain" khyoo: gi boem lang joem yhang: ti" myhang: jo, wigi
re" da" nyeung veung" khyoo: gi panglai: gyid thi" yhi' no, jo.
Xangsu: byu yi yo' gougnyhoug goug: doo: joem gi re" da" lo, khoug: moo: bo jo.
7 Mangsoo we"- re" da" geung: teung jhed khyeing: kang: khyeing: gi
khayhi' gyeing" phoug" dab, jo, lha"
Re" da" dung soo" yoeb khoug: moo khau: nghi: joyoo ngoonu" yo" nyid boem.
8 Nang byid: da" agoin' ayu: zoo: noem mo ngoonu" shoug" zo: boem.
Re" da" reung: thang jeju" gyid lang mo nang ngoonu" ri shug nhang: bye:.
9 Nang ri gi kangso' dangain" da- ajhung: nyang: nghoid bye:
Re" bidbang yoomo ngoonu" bidbang ri shau" myang boem bye:.
10 Nang ri si' bang: ri khanham we' jheddab nyid we'.
deing: byeung" bang: ri khanham we' ge da" moo" zei: byid: we'.
11 Nghoid boin: phau: khaung nyid da" byu yi ngoo ri azain: loo nhang:.
akhyeing" ashoeb bang: we' ngoo ri azain: thu' pyam nhang:.
12 Yu" ge'- akhyeing" ashoeb koid bang: khayoo: leung yoin" to".
Hougsu" leung jo, da" joyoo mo nyangnu" gi ayo" doem too loo.