COUNG" NGHEI 31
O" Aseing we" coung: goem yu wa shid re" nang moo: loem khau: tain" tab loo bye:.
Ngoo ri: khanham we' ajoem: gyo" loo" nhang: lhe.
Ngoo ri: tam" gyoo: byid: we' akhid" ngoo ri khyoid yu we'.
Ngoo ri: goem coung: byid: wa shid re" nga" phang: khoug: jang: nghoid bye:.
Ngoo ri: khyoid yu da" nga" gyidab, nang nghoid.
nang gi nga" phang: khoug: jang: yo' gyidab, nghoid yoomo
nang dangsoo" byid: to" ziyo' dakhyoo" ti" khyoo: shed vhu" shi: byid: we'.
Ngoo ri: kuang mo, du: to" da" gyoin: mo loid byoin loo" nhang: we'.
Gyoug ci' khyoo: mo nghoeb shoung byid: we'.
Ngoo gi ngoo nya: gung du: ri re" da" lo, khoug: moo: ab too" bye:.
Aseing nang gi ngoo ri khyoid yu wa zi nghoid. Nang gi nga" deingmain" da" Mangsoo nghoid nyid.
Nang gi yu yo' soolhoo: ri coung" pid nyid bang: ri ngheung" nyid.
Nghoid loug we' ngoo gi nang ri za: loem khau: nyid wa zi nghoid.
Re" da" geung: teung jhed khyeing: kang: khyeing: yoomo
ngoo gi gau yi ngei pyo: nyid wa nghoid.
Nang gi nga" yau: khe" khyoo: ri se' nyid.
Nang gi ngoo ri gyivoo joem da" lo, khoug: moo: avang loo" nhang:.
Ngoo ri yhi: nau da" joyoo moo khyang: khyang: yo" so" yen" nhang:.
Ngoo gi yau: khe" kyi" khyeug zi shoug" nyid yoomo Aseing we"
ngoo ri nheug khyeug shi" we' o"- gyisho' ngau nyid yoomo nga" myojid" gi phyeig gyang nyid.
Nga" yoem: so' we' dangain" kyoug kain" loo" bye:.
10 Koug shu: myid myo: khyoo: yoomo ngoo gi myoung: dau yoem: nu: loo" bye:.
Sung ngoug yoomo nga" kang: so' gi leung" loo" bye:.
Ngoo gi ngoo nyang: thoung" shau" da-
yau: khe" kyi" khyeug khyoo: yoomo yoem: neing: so, neung: jo, bye:.
Nga" shoo" young: joem lang" yoem: zam: loo" bye:.
11 Gyivoo joem dangain" bang: yo' yhoem: kyoo" cang" yigi ngoo ri kyoug lho nyid boem ago".
Nyangnu" gi khyoo: moo: ngoo ri myang lang- phang: lo" ago".
12 Ngoo ri: byu myoo" sho' mo, gi shid: byug bye: su: ri yhang: ti" to" myhed pyam, boem ago".
Ngoo gi she: pyam to" da" zi gang: yhang: ti" danghoid nyid lo.
13 Gyivoo joem dangain" mo, gi nga" da" khyoo: gau" so, go" nyid ziri ngoo shoug" gyo.
Nga" da" ayam aqei: moo: gyoug noem lheung khoem to".
Nyangnu" gi ngoo ri said wa shid re" soin go" nyid.
14 Nghoid loug we' o" Aseing we" ngoo gi nang ri za: daloem khau: nyid.
nang gi nga" Mangsoo nyang: nghoid.
15 Nga" da" bidnyid khyeing: thoem" shilo, gi re" da" lo, moo: dabo nyid.
Ngoo ri: gyivoo joem yo' shen" yhen nyid mo, lo, mo khyoid yu byid: shi" we' o".
16 Nheug khyeug ziyo' re" da" join phoo ri yu" coung: byid: we'.
Re" da" geung: teung jhed khyeing: kang: khyeing: yo' ngoo ri khyoid yu we'.
17 Aseing we" ngoo gi nang ri mho' yoid nyid.
Ngoo ri sho thu gyoug athu nhang:- akhyeing" ashoeb mo, koem gi
sho shoug" gyoug shoug" nyid goo" baja".
Nyangnu" gi moovo moug: khyoo: sam" zoo: gyoo" loo" go" baja".
18 Mhoug foeb, joem gi nghoid boin: lho: cishu: anhang: khyoo:
deingmain" mo, da" khyoo: ri gei sang: shang pyang: si' mo, ri tam" loo" nhang: we'.
19 Nang ri gyoug voem phau" myang: nyid mo, shid re"
nang shoug: too" byid: da" ge lho, khyoo: joem gi
khayhi' mau" pho" khyoo: nghoid nyid lha".
Nang gi khayhi' gi su: nghoid ziri we' nang ri nghe: khoug: mo, ri
lhoug zung" goin coung: byid: da" khyoo: ri we' yugkhang" moo" se' nyid bye:.
20 Byu yi da" gau" myid soin: sham: go" khyoo: mo
nang gi re" shidkhoin" moo: ngoonu" ri yhoem" to".
Nyangnu" da" gyivoo joem wigi rue" jang" mo
nang gi nyangnu" ri goin coung: myenjham" nhang: nyid bye:.
21 Aseing ri coung" nghei nyid ge'- ngoo ri lheung khoem khaid zain: lo da" uri
nyang: toin shed da" jhed khyeing: kang: khyeing: nya: mau" pho" khyoo: gi
khayhi' gyeing" mau" pho" khyoo: nghoid nyid lha".
22 Nyang: gi ngoo ri nya: shidkhoin" mo khaid thu too" bye: ein: wigi
ngoo gyoug dain' myid myoo: ung: loug nyid bye:.
Nghoid loug we' pang" thoug wa shid re"
ngoo nang ri yoid nyid uri nga" ngoug thui: ri nang tam" gyoo: byid: bye:.
23 Nya: da" deungbyeung" da" byu yi dangain" bang: we' Aseing ri jheddab nyid we'.
Deung byeung" nyid mo, ri Aseing gi goin coung: lhoug zung" nyid.
Nghoid loug we' nghoid boin: lho: nheigloem: gyi: nyid mo, rigi yooboo dam kaid byid: nyid.
24 Aseing ri nheug byu nyid bang: dangain" we'
yoem: boo boo voem" da" nheigloem: bo ci: we'.