COUNG" NGHEI 30
Ngoo Aseing ri coung" nghei nyid khasu" wim ga: ri nang ngoo ri khyoid yu lho:
nga" gyivoo joem ngoo ri ung: wa khyoo: aphang byid.
Nga" Aseing Mangsoo we' pang" thoug byid: wa shid re" nang ri mho' yoid nyid yoomo
nang gi ngoo ri nga" noodam' mo ge loo nhang: bye:.
nang ngoo ri loeb duang: khoug: mo nyang: khyoid yu bye:.
Ngoo gi loeb duang: khoug: khyoo: l vang loo" bye:-
nghoid loug we' Aseing gi ngoo ri ashid: nhang: loo: za: kangso' doem xo' byid.
Aseing nya: da" nheigloem: zung" byu yi dangain" mo
Aseing ri coung" nghei jikhoin" khoin" nyid we'.
Gyeung" shang: su: koid bye: da" moo" zoo" ri myid boin: so" lho:
nya: jeju" ri boin: soo" byid: nyid we'.
Nya: nheug yo: khyoo: gi daso' kyeing- nya: ge da" khyoo: gi dapyaid goin" moo: dajo, jo.
Myen" ayo, moo: ngoug byid gyo" nyid nghoid loug we' nab soin: ayo, moo: gi gau yi ngei pyo: khyoo: ju" lo.
Ngoo gi gau: nyu: khyoo: ri kham' zo: lho: ngoonya: gung ri ngoonyang:
?ngoo khanham we' soem" joem: loo" wa zi anghoid? ein: tid.
Aseing we" nang gi nga" tho' moo gye" ge nyid.
Boem tho' mo gyidab, yhang: ti" ngoo ri lhoug zung" byid: nyid.
Nghoid loug we' nang nga" jang" mo myonhoo: goo" khyoo:
lheung: loo" lang" gi ngoo gyoug dain' zi shoug" nyid.
Aseing we" ngoo gi nang ri mho' yoid nyid
re" da" pang" thoug khyoo: ri ngoo mho' nyid.
?Ngoo shid: lo" jang" mo nang ce: noem yoo" wa lha".
loeb duang: khoug: moo ngoo vang loo" yoomo ce noem akyu" boo wa lha".
Sushid: joem gi nang ri yo" coung" nghei goo" wa la".
Nyangnu" gi re" da" yoem: bo- ge khyoo: ri yo" tid fu" byid: goo" wa la".
10 Aseing we" ngoo ri nheug khyeug shoo" myen: lho: gyoo: byid: we'.
Aseing we" ngoo ri pang" yu we'.?
11 Nang gi nga" da" sho" jhen: koug shu: khyoo: ri yu pyam byid: lho:
ngei pyo: gau yi ziyo' lheung khoem too" nhang: bye:.
12 Hougsu" nghoid yoomo ngoo gi: sam" zoo: tam" too" lo: wa zi anghoid.
Nang ri coung" nghei jikhoin" khoin" nyid wam: bye:.
Aseing we" nang gi nga" Mangsoo nghoid-
ngoo gi nang ri apyaid atoo: moo jeju" daboin: so" nyid wa,