COUNG" NGHEI 28
1 Ngoo ri: goem coung: nyid da" Aseing nang ri ngoo mho' yoid nyid.
Nga" ngoug thui: ri tam" gyoo: byid: we'.
Nang atu" byid: rigi moovo moug: khyoo: gyoo" loo" mo, yo' dage" nyid nyid wa zi nghoid.
2 Aseing da" gyeung" shang: Noku Yhoem: Moo" khyoo:
nga" lo, voo: tu: ci: lho: pang" thoug byid: wa shid re" ngoo mho' yoid uri tam" gyoo: byid: shi" we'.
3 Age khyoo: koid da" byugang: yi yo' dage- ngoo ri yooboo dam akaid byid.
Houg: bang: gi nhoid young" boem nghoid loug we'
ngheung" da" nheigloem: boo mo, nghoid boem ago".
4 Houg: bang: zei: da" moo" yo' zei: shoid da" yooboo shid re"
nyangnu" ri yooboo dam kaid byid: we'.
Nyangnu" da" moo" zoo" yo' dakhyoo" ti" yooboo dam kaid byid: we'
nyangnu" da" yooboo yo' moin: yi da" dam ri kaid byid: we'.
5 Houg: bang: gi Aseing koid da" moo" zoo" joem ri we'
nyang: phain" so: to" da" ziyoo joem ri we' cishu: anhang: boem nghoid ago".
Hougsu" koid boem yoomo nyang: gi nyangnu" ri yooboo dam kaid lho:
apyaid atoo: moo: byo, yoin" joem: loo" nhang: wa zi nghoid.
6 Apyaid atoo mo Aseing ri coung" nghei nyid ge'- nyang: gi pang" yu wa shid re"
nga" ngoug thui: ri tam" gyoo: byid: bye:.
7 Aseing gi ngoo ri goem coung: lhoug zung" byid: lho: gyivoo joem ri ve, pyam byid:.
Ngoo gi nyang: moo: loem khau: nyid- nyang: gi ngoo ri pang" thoug byid: wigi
ngoo ri gau, yi ngei pyoo: nhang:.
Ngoo gi nyang: ri coung" nghei nyid.
8 Aseing gi nya: da" byuphung: yiri lhoug zung" goem coung: nyid.
Nyang: khyen: yu da" khokham ri nyang: gi lhoug zung" wigi khyoid khyi: yu nyid.
9 Aseing we" re" byu phung: yiri khyoid yu lho: nang seung: ci: mo, ri mainkaid jeju" byid: we'.
Nyangnu" ri yang lhoug su: yhang: ti" pyaid didu moo: yu" lhoug zung" byid: nyid we'.