COUNG" NGHEI 25
1 Aseing we" ngoo gi nang ri noku nyid.
2 Nga" da" Mangso- ngoo gi nang ri za: loem khau: nyid.
Joem: lo" lho: sho' thu da" khyoo: mo ngoo ri khyoid yu we'.
Nga" gyivoo joem gi ngoo ri ayu" juang" nyid nhang:.
3 Nang ri loem khoug mo, gi asoem" lo" yu.
Nghoid loug we' nang ri thoug shang doin: lhoem" hain: nyid mo, za: soem" joem: lo" ago".
4 O" Aseing we" re" da" khyoo: ngoo ri jhau" byid: we'.
Hau: gu" ngoo ri si' nhang: we'.
5 Re" da" deingmain" khyoo: khyo" se' nyid sho' ngoo ri jhau" byid: we'.
Khasu" wim gari nang gi ngoo ri khyoid yu da" nga" Mangsoo nghoid.
Ngoo gi khanham we' nang ri za: daloem khau nyid.
6 Aseing we" re" da" nheug khyeug khyoo: yo'
geung: teung jhed khyeing: kang: khyeing: ri damyid boin: nyid we'.
Lai loo" bye: da" ayo, moo: yhang: ti" nang toin" shed nyid we'.
7 Zooyam, yo, mo wigi ngoo shoid vhang: yooboo yo' ajo da" khyoo: ri khyoid pyam byid: we'.
Aseing we" re" da" geung: teung jhed khyeing: kang: khyeing: yo'
ge da" khyoo: khyo" ngoo ri myid boin: so" nyid we'.
8 Aseing gi ge thang su: yo' deingmain" su: nghoid nyid yoomo
yooboo shoid vhang: nyid mo, ri ge soo" eung: da" khyoo: ri jhau" byid: nyid.
9 Nheigloem: nyhoem: khyo' nyid mo, ri
deingmain" da" khyoo: moo: shu" yhe: lo" lho:
nyang: myid vho: khyoo: nyangnu" ri jhoug" byid.
10 Nya: da" deizoo: ri tam" gyoo: byid: lho:
nya: dang: thang" cab ri cang ri cang mo, gi jheddab khyo" we'
deingmain" khyo" we' khyoo" shed vhu" she: lo" nyid.
11 Aseing we" nga" yooboo gi tid loo aoung: myo: tham: jo, bye:.
Houg: yoomo dang: theing khoin" ri: cang pyeung" khyo"
nga" yooboo ri khyoid pyam byid: we'.
12 Aseing ri gyoug: phau" nyid mo, gi nyangnu" soo" eung: da" khyoo: ri
nya: jang" moo jhau" yu boem wa nghoid.
13 Houg: bang: gi khanham we' yoo" zoo: yoo" shoug wigi nyangnu" da" nya: zoo: yigi
mungdain: ri shoug" seung: boem wa.
14 Aseing gi nya: mungdang: ri tam" gyo: cang nyid mo, yo' zoem" khau: nyid lho:
nyang: gi houg: bang: yo' nya: dang: theing khoin" ri geung: teung jo, nhang:.
15 Ngoo gi pang" thoug yu zi shoug" wa shid re" ayo, khang" moo" moo
Aseing ri yu" nyid lho: nyang: gi ngoo ri shid: gyoin' mo khyoid yu nyid.
16 Hougsu" nga" jhang khyoo: tau" lo lho:
ngoo ri nheug khyeug yu shi" we' o".
Khasu" wim ga: ri ngoo gi dayug kyeing" nyid lho: yoem: nu: su: nghoid.
17 Nga" da" myid myoo: ung: loug khyoo: dangain" jang" mo ngoo ri khyoid yu lho: wigi
yau: khe" kyi" khyeug khyoo: ja: khang" mo" mo khyoid yu we'.
18 Ngoo kham' zo: nyid da" kyi" khyeug ziyo'
kyi" khyeug dangain" ri myid boin: byid: lho:
nga" yooboo dangain" ri khyoid pyam byid: we'.
19 Ngoo moo: gyivoo khamyhoo, bo ziri bo yu" nyid we'.
nyangnu" gi ngoo ri: khayhi' ngheung" nyid boem ziri bo xoem" too" byid: we'.
20 Ngoo ri: coung: goem lho: khyoid yu we'.
Ngoo ri asoem" loo" nhang: lhe"- ngoo gi re" jang" moo: gau: nyu: nyid wa shid re" tain" lo.
21 Nga" ge da" khyoo: yo' gyoug phau" nheigloem: zung" khyoo: gi
ngoo ri lhoug zung" byid: nyid baja" khasu" wim ga: ri
ngoo nang ri loem khau: nyid.
22 O" Mangsoo we"- re" da" byu phung: Israela yiri
nyangnu" da" yau: khe" kyi" khyeug jang" mo khyoid yu we'.