COUNG" NGHEI 22
1 Nga" Mangsoo we"- nga" Mangsoo we"-
nang cikoid wigi ngoo ri she: pyam to" lha".
Ngoo ri pang" thoug yu wa shid re" ngoo nyho: yoid nyid.
Nghoid loug we' akhid" ju" sho' are" pang" yu shi.
2 Nga" Mangsoo we"- nyid" kyo, ayo, ri
ngoo mho' yoid, nghoid loug we' nang atu" byid: nghoid da:.
Myen" khoug" sang" gam, ri yoid mho' nghoid loug we' myenjham" khyoo" ayoo.
3 Nghoid loug we' nang gi gyeung" shang: su: nghoid lho:
khoo" zhung: nhang: da:.
Israela byumyu" yi coung" nghei ziri
kham: yu moin: yi" su: nghoid nyid.
4 Ngoonu" da" phoug" phyid" yigi nang ri loem khau: boem.
Ngoonu" gi nang ri loem khoug: yoomo
nang gi ngoonu" ri khyoid yu abye:.
5 Nyangnu" gi nang ri nyho: yoid, mho' nyid yoomo
shid: gyoin mo loid byoin lo" boem bye:.
Nyangnu" gi nang ri loem khoug: yoomo
nheigloem: byo, yoin" zi ashoug.
6 Nghoid loug we' ngoo gi byu dayug a nghoid loo.
Tungsang" lugdung: danghoid lo- dangain" mo, gi
ngoo ri aphoug" akhyoid she: pyam lho:
ngheung" nyid boem bye:.
7 Ngoo ri: myang mo, dangain" gi ngoo ri juang" yi nyid boem.
Nyangnu" gi yhoo: ri toid lho: vhu" pyi: pyi: nyid ago".
8 Nyangnu" gi ?Nang Aseing ri loem khau:? ga: lho:
nyang: gi nang ri ?Ciwim akhyoid yu lha".
Aseing gi nang ri jheddab vho ngei nghoid rigi
ciwim wigi nang ri apang" yu lha"? ga: tid nyid boem.
9 Nang gi ngoo ri nga" myhi' ung: khoug: mo nyang:-
ce: noo aboo loo: khu: loo nhang: su: nghoid bye:.
Noug" nu" nghoid nyid yo, ri we' nang gi ngoo ri gau: nyu: nhang: loo bye:.
10 Ngoo gi khu: re" nyid" mo wigi nang ri za: loem khau: lo lho:
Khanham we' nang za: nga" Mangsoo nghoid nyid.
11 Houg: yoomo nga" jang" mo ave: loo- yau: khe" khyoo: gi jhang loo bye:.
Nyangnu" gi dayug we' ngoo ri ayo" pang" yu.
12 Nga" gyivoo joem gi nuloo joem yhang: ti" lheung khoem lo.
Nyangnu" gi Bashan mo gyoug ge da" nuloo: joem yhang: ti"
ngoo ri lheung khoem to" boem bye:.
13 Nyangnu" gi khangkhyi, joem yhang: ti" nhoid fo, gyab, lho:
ngoo ri ngaid wa ga: soin nyid boem.
14 Nga" da" yoem: vhoo"- myidjang moo: leung shoin: pyam da"
gyid yhang: ti" kyoug kain" loo" khari" bye:.
Nga" da" shooyoug: dangain" gi youg: xeig byed, jo, bye:.
Nga" da" nheigloem: gi byoo shung" yhang: ti"
yau, yu: lo" byug bye:.
15 Nga" da" khyung" kang: gi myidzhoo" phei" yhang: ti"
kyoug jo, lho: nga" da" yhoo: we' vhoo: moo: dab, byug bye:.
Nang gi ngoo ri shid: wa shid re pheilhoug: boem" moo: she: pyam, too" bye:.
16 Akhyeung" da" byu daphung gi ngoo ri lheung khoem to" boem bye:.
Nyangnu" gi zeigni joem yhang: ti" nga" nam, moo: zeung: foem: lo lho:
nga" khyid: lo, joem ri ngaid phyed pyam byid: boem bye:.
17 Nga" shooyoug: dangain" ri myang nyid bye:-
gyivoo joem gi ngoo ri yu" zhoug to" lho: gau, nyid boem.
18 Nyangnu" gi nga" da" byimi joem ri
phid baid lho: gam, go" pyam boem.
19 O" Aseing we" nga" jang" mo ave: loo-
ngoo ri myab, re" khyoid yu we'.
20 Sham: gyi lham: gyi mo ngoo ri khoid yu we'-
nga" kangso' ri he: zeigni joem lo, mo khyoid yu we'.
21 Ngoo ri: he: khang khyi joem da" lo, mo khyoid yu we'.
He: nulam" joem da" shid: gyoin, moo ngoo gi phang: khoug: jang: ayoo" loo.
22 Nang zei: da" moo" zoo" ri nga" byumyu" yiri ngoo tid kyoo: wa nghoid.
Nyangnu" da" zoebphung: moo: ngoo gi nang ri coung" nghei wa nghoid.
23 ?Aseing da" deizoo: yi we' nyang: ri coung" nghei nyid we'.
Yaku da" nya: myid: nya: zoo: yi we' nyang: ri myonhoo: byid: we'.
Israela byumyu" yi we" nyang: ri noku goeb pid nyid we'.
24 Nyang: gi sho" jhen mo, ri ashe: pyam too"-
nyangnu" da" sho" jhen kyi" khyeug khyoo: ri
ayu" goin coung: loo: nyid wa zi anghoid.
Nyang: gi nyangnu" jang" mo myonhoo: goo" shoid shu: loo" wa zi anghoid.
Nyangnu" yoid mho' da" uri tu" byid: nyid.?
25 Byumyu" yi zeung: foem: da" phung moo" gung moo
nang koid da" moo" zoo" joem shid re" ngoo nang ri coung" nghei wa.
Nang ri coung" pid mo, da" shidkhoin" moo
ngoo gi dang: theing to" da" xoin" ri ngei" byid: wa.
26 Sho" jhen mo, gi gyi" gyi: shoug" zo: boem wa.
Aseing jhang khyoo: yu: tain" ri" mo, gi nyang: ri coung" ngei boem wa zi nghoid.
Houg: bang: gi khanham we' yoo" zoo: yo" shoug nyid boem baja".
27 Byumyu" yi bain sho mo, gi Aseing ri boin: so" loo wa.
Mougmyid gyab, goin" mo mo, gi re" jhang khyoo: doem tau" lo boem wa nghoid.
Byukung: byuko' dangain" gi nyang: ri noku coung" pid lo boem wa nghoid.
28 Aseing gi khokham zeing nyang: nghoid yoomo
byumyu" bain sho mo, ri vhoeb khang nyid.
29 Nghoid boin: lho: nheigloem: gyi: nyid bang: dangain" gi
nyang: ri goeb pid lo boem wa.
Shid: loo" se' da" byu yi dangain" mo, gi re" shidkhoin" moo: goeb pid lo boem wa.
30 Doem ju" loo wa da" byunyid xiyam: yigi nyang: ri dei dei byid: lo boem wa.
Byumyu" yigi ju" loo wa da" byuxeig byuyam: yi moo Aseing da" khyoo: ri tid kyo" lo boem wa nghoid.
31 ?Aseing gi nya: byumyu" yiri khyoid yu bye:? ga: wigi
akhu: ri" shi" da" byumyu" yiri tid kyo" lo" boem wa ga: tid.