COUNG" NGHEI 148
Aseing ri coung" byid: we'.
Myhang: thang da" joyoo moo: nyid nyid mo, we"-
Nya: da" moug: lagyoo: joem dangain" mo, we"-
nyang: ri coung" byid: ge'.
Nya: da" moug: lagyoo: joem dangain" mo, we"-
nyang: ri: coung" byid: ge'-
mougkhung: mougdi gyizoo: yi dangain" bang: we"-
nyang: ri coung" byid: ge'.
Bid yo' lhammoo" nyang: ri coung" pid ge'-
bang nyid da" kyi: joem we"-nyang: ri coung" byid: we'.
Myhang: thang da" mougkhung: mougdi joem yo'
moug tho' moo: jo, jo, da" gyid phung: joem we"
nyang: ri: coung" byid: we'.
Aseing da" myeing khyang" ri
nyangnu" dangain" mo, coem, coung" nghei nyid goo" baja".
Re" da" mungdang: khyo" jo, moo: jo, gi phain" so: to" zi shau" nyid wigi
Re" da" amyeing" mungdang: yo' dakhyoo" ti"-
nyangnu" da" joyoo joem moo: pyaid didu dageung: teung jo, boem ago".
Houg: bang: gi nya: amyeing" dang: ri ayo" lid nghoid ago".
Panglai: main jung: joem yo' no, thang da" nammugdara dangain" we'
Mougmyid mo wigi Aseing ri coung" ge'-
lhab' myeug ziyo' leigvoo- gyu: yo' jhoemmoug" joem.
Nya: amyeing" dang: ri tam" gyo: da" thain: uglid, zoo" joem we"
nyang: ri coung" nghei nyid ge'.
Boug gung joem yo' boem lang joem
shigam joem yo' siyoo sigam: joem
10 Me" da" gougnyhoug joem yo' kyang: da" gougnyhoug joem dangain" do: yu: yen" ja: yo'
ngho' joem dangain" nyang: ri coung" nghei nyid we'.
11 Khokham yi yo' byumyu" yi dangain"- Khokham yug gi zoo: yi yo' gootu: da" zoug: khoin" voin mo, dangain"-
nyang: ri coung" we'.
12 Zoolu: yi yo' zoomyi: yi zookho' yi yo' zooshang: mi" we"-
nyang: ri coung" byid: nyid we'.
13 Aseing da" myeing khyang" ri nyangnu" dangain" mo, coung" nghei nyid goo" baja"-
nya: myeing khyang" gi gootu: tho' moo: je gyi: jo-
Nya: myonhoo: bug thu' sheing: jhu" khyoo: gi
mougmyid yoosoo" yo' mougkhung: mougdi tho' moo byeung" jo.
14 Nyang: gi: nya: da" mungdain: ri yoem: boo nhang: nyid.
Hougsu" nghoid yoomo nya: da" byumyu" yi dangain" mo, gi
nyang: ri coung" nghei nyid boem.
Nyang: ri gye" jheddab da" Israela byumyu" yigi
nyang: ri: coung" nghei nyid boem.
Aseing ri coung" nghei byid: we'.