COUNG" NGHEI 147
1 Aseing ri coung" ge'. yha" da" Mangso ri jikhoin" yo' coung" nghei wa zi ge nyid.
Hau: zigi vhoo: ngei khyoo: nghoid nyid wigi
nyang: ri coung" nghei wa zi moin: yi" nyid.
2 Aseing gi Yerusalem voomoo" ri doem zhoug to" wigi
goomeing: khyoo: khaid thu' pyam zi shoug mo, ri doem shu" tau" loo wa.
3 Nyang: gi nheigloem: gyau: moin" loo" mo, ri ze: gi byid: lho:
nyangnu" da" dam, noo joem ri thoeb byid.
4 Kyi: joem da" nghab, youg ri soin: to" lho:
cab, khang" moo" ri myeing myheing byid: to".
5 Ngoonu" da" Aseing gi tho' mo su: nghoid nyid yoomo
athang agoin da" yoem: moo" yo' byeung" jo, su: nghoid.
Nya: da" lasi phajhi" ri hang yo" tho' ke' yu" wa zi anghoid.
6 Nyang: gi khyo' nyhoem: mo, ri tu: to' kaid lho: wigi
akhyeung" bang: rigi myid jang: moo: ju" sho' re" mhoin' sain" pyam nyid.
7 Aseing ri jikhoin" dang: seig yo' coung" nghei nyid ge'-
nyha" da" Mangsoo ri teing baid myheung da" thui: yo'
coung" nghei jikhoin" khoin" nyid we'.
8 Nyang: gi mougkhung: moo: jhoemmoug" joem ri pei: khang to"-
myid jang: shid re" moug: ri voo byid: ziyo'
bouggung gyeing: kang joem moo: we' vufu" ri youg loo nhang:.
9 Nyang: gi gougnyhoug joem ri zoo: noem byid: nyid ziyo'
kano, ngho' nu" joem myeung nyid uri voem: byid: zho" nyid.
10 Yoem: bo da" myang: joem ri nyang: gi avhoo: angei nyid zi anghoid.
Re", da" gyivoo: yiri nyang: gi yu" gau, nyid zi anghoid.
11 Nghoid loug we' nyang: ri gyoug phau" nyid mo, yo'
Nya: da" jhed khyeing: kang: khyeing: ri
loem khau: nyid mo, ri nyang: vho: ngei nyid.
12 Yerusalem we"- Aseing ri coung" nghei nyid we'.
Ziun we" re" da" Mangsoo ri coung" nghei nyid we'.
13 Nyang: gi re" da" voogung khoem" mo" duang: ri geung: teing nhang: wigi
Nyang: gi re" da" byumyu" ri mainkaid byid: nyid.
14 Nyang: gi re" da" mougkyoo" joem ri goem loem byid: wigi
main, da" sungsoo: gug yo' nang ri: nheugshid: nheugdeug nhang: wa zi nghoid.
15 Nyang: gi mougmyid yoosoo" khyoo: amyeing" dang: byid: kaid wigi
Nyang: tid da" dang: gi myab, myab, bue" lo nyid.
16 Nyang: gi gyu: ri mi, yhang: ti" khyo' phoem" to" lho:
gyu khi, joem ri myidzhoo" phei" yhang: ti" sain" kaid da:.
17 Nyang: gi leigvoo ri lug zoo: joem yhang: ti" khyo' kaid lho: wigi
nyang: nhang: kaid da" ngam" jham" khyoo: ri hang" we' ayo" kham boem.
18 Hau: thang: ri nya: amyeing" byid: kaid wigi gyu: ri yau, loo" nhang:
nyang: gi lid ri houg nhang: kaid wigi gyid ri youg nhang:.
19 Nyang: gi nya: byumyu" yiri nya: mungdang: byid: kaid.
Israela yiri nya: dangsoo" khoin" joem yo' tarha" joem ri byid: nyid.
20 Nyang: gi gootu: byumyu" yi shid re" hidsu" akoid byid: zi nghoid yoomo
Nyangnu" gi nya: tarha" joem ri ase' gyo: boem nghoid ago".