COUNG" NGHEI 146
1 Aseing ri coung" ngei ge o" nga" soozoo: we"-
Aseing ri coung" nghei nyid we'.
2 Ngoo dei nyid daloo gyoo: moo-
nyang: ri: coung" nghei nyid we'.
Nga" kang: so' gyoug: khyoo: bain: sho' moo
Mangsoo ri jihkoin" dakhoin" nyid wa nghoid.
3 Xangsu: byu mo zoug: yiri nanu" aloem khau: nyid goo"-
Xangsu: byu yi hang" we' nanu" ri yo" khyoid yu wa zi anghoid.
4 Nyangnu" shid: loo" lang" gi
myidzhoo" khyoo: doem tau" vang loo" goo" wa zi za: nghoid.
Hau" bidnyid moo: nyangnu" myid too" khyoo: joem dangain" we' thang lo" byug wa zi nghoid.
5 Yaku da" Mangso pang" thoug khyoo: yo" yu su: yo'
Aseing nya: Mangsoo moo: khau: nge: nyid su: gi ngilhoo' su: nghoid nyid.
6 Nyang: gi: mougkhung: myidjang panglai: yo'
hougmoo: nyid zi jo, zi dangain" ri phain" so: too" su: nghoid.
Nyang: gi nya: da" dangsoo" khoin" joem ri zoem ci: su: nghoid nyid.
7 Nyang: gi doin: zeug zi shau" nyid mo, da" shid re"
dang: phyed byid: lho: zooyoid su: ri zoo: noem byid: nyid.
Aseing gi thung: lung" bang: ri loid byoin lo nhang: lho:
8 Myo, jed su: ri myo, myang loo nhang:-
nyang: gi: leung jo, mo, ri lang: tu: kaid lho:
nya: deing byeung byu yiri jheddab nyid.
9 Nyang: gi: mungdain: mo being" voo joem ri goem loem byid: lho:
coug" zoo: cougmoo" yiri pang" thoug byid: nyid
nghoid loug we' akhyeung" mo, da" khyoo: rigi
nyang: byo, yoin' lo" nhang: wa zi nghoid.
10 Aseing gi apyaid atoo: moo: khokham" koid wa zi nghoid-
O" Ziun we"- re" da" Mangsoo gi pyaid yang: thang moo
khoo" zhung: wa nghoid.
Aseing ri coung" nghei we'.