COUNG" NGHEI 145
1 Nga"Mangsoo yo' khokham phoo we"-
re" da" phoug" dab, reung: thang khyoo: ri
ngoo kho" kyoo" wa nghoid.
Ngoo gi nang ri apyaid atoo: moo jeju" boin: lho:
coung" ngei nyid. wa.
2 Nyid" khang" moo" nang ri
ngoo jeju" boin: dacoung" nghei nyid loo: wa.
Nang ri ngoo apyaid atoo: moo:
dacoung" nghei nyid wa nghoid.
3 Aseing gi gyi: sheung: nyid yoomo gye" nyang: coung" nghei gi su: nghoid bye:-
nya: da" gyi: sheung: khyoo: ri hang" we' atho' se' gyoo.
4 nang zei: da" moo" zoo" jid: zoo" joem ri
byunyid xiyam: moo: dacoung" ngei nyid boem wa
re" da" phung" yoeb myo, nho: moo" zoo" ri we'
nyangnu" kho" kyo" nyid boem wa zi nghoid.
5 Re" da" myonhoo: phung" yoeb yo' khokham khoin" so, khyoo: ri we'
nyangnu" tid fu" kyo" boem wa nghoid.
Re" da" mau" pho" moo" zoo" jid: zoo: joem ri: we'
ngoo damyid soin: yu" nyid wa zi nghoid.
6 Re" da" gyi: myhang: moo" zoo" joem ri-
byumyu" yi tid kyo" nyid boem wa nghoid.
Re" da" gyi: sheung: khyoo: ri ngoo we' kho" kyo" nyid wa zi nghoid.
7 Nyangnu" gi re" da" ge lho' khyoo: dangain" ziri tid kyo" boem wa nghoid.
Re" da" nheig khyeug shoo" myen: khyoo: ri
nyangnu" gi jihkoin" yo' coung" nghei nyid boem wa zi nghoid.
8 Aseing gi jheddab ziyo' nheig se' khyeug su: nghoid yoomo
nyang: gi nheig khoo" yo: khyoo: ri yo" kham: zeung: ziyo'
athang agoin jheddab myid yo' byeung" jo.
9 Nyang: gi dangain" bang: da" atho' moo: gisu: nghoid nyid wigi
nyang: phain" so: to" da" zi dangain" da" atho' mo: we'
nheig khyeug nheigloem: bo nyid.
10 Aseing we"- nang phain" so: to" da" dei moo: dei bang: gi
nang ri coung" nghei boem wa ziyo'
re" da" byumyu" yi dangain" bang: we' nang ri
jeju" boin: coung" nghei nyid boem wa.
11 Nyangnu" gi re" da" zau: myeing" myonhoo: phung" yoeb bang yo'
re" da" athang agoin yoem moo" ri tid kyo" boem wa zi nghoid.
12 Hougsu" gi re" da" zoug: myeing" myonhoo: phung" yoeb bang yo'
re" da" athang agoin yoem" moo" ri tid kyo" boem wa zi nghoid.
13 Re" da" vhoeb khang khyoo: gi pyaid moo: too" moo:
dageung: jo, lho: wigi apyaid atoo: mo khokham phoo nyang: nghoid bye:.
14 Nyang: gi yau: khi" zi shoug" nyid bang: ri pang" thoug byid: lho: wigi
leung gyo" jo, bang: ri tu: to' kaid byid: nyid.
15 Kang: dei so, shi: bang: dangain" gi
nang ri nheig byu nyid zoore dayu" nyid boem zi nghoid yoomo
Nyangnu" zoo: noem, ca" nyid da" uri
nyangnu" ri: nang gi zoo: noem byid: nyid.
16 Nyangnu" ri nang myoo" sho' byid: nyid wigi
byu dangain" mo, da" ca" yo, khyoo: dangain" ri
nang gi joeb byeung loo nhang: nyid.
17 Aseing gi nyang: zei: da" moo" dangain" jang" moo
deing: byeung" nyid zi nghoid yoomo
nya: moo" zoo" dangain" jang" moo: nheig yu" khyeug nyid su: nghoid.
18 Nyang: gi nyang: ri yoid ji nyid bang: yo' nheigloem: dain: khyo" nyang: ri yoid khi: bang: da"
nam, tain" moo: nyid nyid.
19 Nyang: ri gyoug phoug" bang: da" ca" yo, nyid khyoo: joem dangain" ri
nyang: jhoeb, byeing byid: nyid wigi
nyangnu" da" mho' yoid thui: ri shau" gyo: lho: nyangnu" ri khyoid yu bye:.
20 Nyang: ri jheddab nyid mo, dangain" bang: ri
nyang: goem loem byid: nyid lho:
akhyeung bang: ri koem gi nyang: phyo' shoin' pyam wa zi nghoid nyid.
21 Ngoo gi Aseing ri khanham we' coung ngei nyid wa nghoid.
Nyang: phain" so: to" da" dei, moodei loeb mooloeb, bang: gi
nya: da" gyeung" shang: myeing khyang" ri pyaid moo: too: moo: ju" sho'
dacoung" nghei nyid goo" baja" o".