COUNG" NGHEI 144
1 Nga" goem loem su: Aseing ri coung" byid: ge'
nyang: gi ngoo ri gyimoo" jhau" byid: lho:
gyi pui" shid re" ngoo ri soin' nyheung byid: nyid
2 Nyang: gi nga" da" goem loem su: yo' gyivi su: nghoid.
Nyang: gi nga" da" nghe: khoug: joyoo yo' khyoid yu su: yo'
gau nyu: nyid wa shid re" ngoo loem khau: nyid su: nghoid.
3 Aseing we"- nang xoem" ci: da" byu-
nang yhouggyen: khyo" too" su: gi
byu za: date: nghoid ri ciyhang: te" su: nghoid lha".
4 Xangsu: byu yigi so, thid she: nyid da" lid yo' du nyid
nya: da" bidnyid joem gi lid lo" nyid da- bid shoem: yoeb ti" za: du nyid.
5 Aseing we"- mougkhung: ri lang: ceug phang lho: gyoo" lo we'.
boem lang joem ri zang" thoung" wigi
nyangnu" gi myikhoug" thu' nhang: kaid wa zi nghoid.
6 Lhab' ri myeug kaid wigi re" da" gyivoo joem ri byo sain" lo" nhang: we'.
Re" da" myooshi" joem ri beug kaid wigi
nyangnu" ri phang: loo" nhang: we'.
7 Tho' khyo" ju" gyoo" lo lho: no, thang thoem" thi" mo
ngoo ri lang: she: yu wigi khyoid yu byid: we'.
Tungbau byumyu" yi da" yoem: so' khoug: mo
ngoo ri khyoid khyi: yu byid: we'.
8 Nyangnu" gi deingmain" da" dang: ri khanham we' atid ziyo'
jham' tang: too" bye: khoug: moo: lang" damhau, nyid boem.
9 Mangsoo we"- jihkoin" dang: seig yo'
ngoo nang ri coung" ngei byid: wa nghoid.
teing baid lho: nang ri: ngoo jihkoin" khoin" nyid wa nghoid.
10 nang gi khokham yiri oung: doid loo" nhang: nyid ziyo'
re" deizoo: David ri khyoid yu bye:.
11 Nheig khyeug shoo" ase' myen: da" nga" gyivoo joem lo, mo ngoo ri: khyoid yu we'.
tungbau byumyu" da" yoem: so' khoug: mo ngoo ri khyoid khyi: yu we'.
Nyangnu" gi deingmain" da" dang: ri khanham we' atid nyid boem ziyo'
jham tang: too" bye: khoug: mo lang" gi damhau, fain" nyid boem ashi" go.
12 Ngoonu" da" yuggi zoo: yigi nyangnu" da"
void yam" pyaid moo seiggam nu" joem youg toid lo yhang: ti" bui" baja".
Nyangnu" da" myiyi: zoo: yi we' khanham we'
khokham khoo" yhoem: moo" jhoin: moo: lhoo, yhoug to" da-
lugzeing" bung: moo" joem yhang: ti" du nyid goo" baja".
13 Ngoonu" da" gug jhi: joem moo shivoo myoug: cang: joeb byeung" jo, baja".
Ngoonu" da" mhain" nu" dain" moo: nyid da"
yang phung: gi anu" khyeing" moin" xang" myo, loo baja".
14 Ngoonu" da" nukyung moo: xang" shoin' byoug lo" zi we' aboo looza-
myo: lung: je: be: lo" nyid baja".
ngoonu" da" fu" moo" khyoo: joem moo
myid myoo: ung: loug yoid ngau thui: we' athu, loo baja".
15 Hid: yhang: ti"- deingmain" khyo" nyid da" byumyu" yigi
ngilho' nyid Aseing ri Mangsoo ga: wigi
lhoem: yu loem" jeung" nyid da" byumyu" yigi ngilho' nyid boem o".