COUNG" NGHEI 143
1 Aseing we"- nga" da" akyu" mho' thui: ri tam" gyoo: byid: we'.
Re" da" deingmain" khyoo: moo nga" mho' yoid da" dang: ri gyoo: byid: we'.
Re" da" nheigloem: zung" khyoo: moo: ngoo ri tu" byid: we'.
2 Re" da" deizoo: ngoo ri tarha" dang: phyed khyoo: ashoug" nhang:-
Re" shidkhoin" moo: yooboo ayo" zi dayug we' anyid.
3 Nga" gyivoo joem gi ngoo ri cang khaid myhi: lo ziyo'
ngoo ri bain" sho' nyang: oung: pyam, boem bye:.
nang gi ngoo ri moug: coid thung: khoug: moo kaid to" lho:
ngoo ri: goonham, ayo, mo shid: loo" bang: ti" danghoid lo:.
4 Houg: yoomo ngoo gi asoem" kham' pyam, wa zi jen" jen" danghoid lo-
Ngoo gi gyisho' nheigloem: thang zi shoug" nyid bye:.
5 Ngoo gi: lid: loo" bye: da" bidnyid joem ri daboin: so" nyid.
nang koid shoug loo bye: da" moo" zoo' joem dangain" ri
myid soin: yu" nyid ngoo gi re" da" lo, moo" joem dangain" ri damyid yu" nyid.
6 Ngoo gi nga" lo, ri re" jhang khyoo: yhoin" to" lho: akyu" damho' nyid.
Moug: kyug gang: yhang: ti"- nga" soozoo: gi nang ri gyid su: dashed nyid.
7 Aseing we"- ngoo ri akhid" nyang: tu" byid: we'
nga" nheig byu jang: dangain" thang byug bye:.
re" myonhoo: nga" jang mo goo" khyoo: alheung: loo.
hougsu" anghoid rigi moovo moug khyo: vang lo" byug bye: bang: da" khoug: khyoo:
ngoo bo vang lo' wa nghoid.
8 Nang ri ngoo loem khau: nyid yoomo
nab soin: khang" moo" re" da" geung: teung jhed khyeing: kang: khyeing: gi
ngoo ri datid poin" nyid we'.
Nga" noku da" thui: joem gi re" jang" moo: kyang ju" loo bye:-
ngoo soo" eung: khyoo: ngoo ri toin" shed byid: we'.
9 Aseing we"- goem loem byid: wa shid re" re" jhang khyoo: ngoo re" lo nyid ri
nga" gyivoo joem da" lo, mo ngoo ri khyoid yu byid: we'.
10 nang gi nga" da" Mangsoo nyang: nghoid bye:-
nang myid vho: khyo" yo" zei: wa shid re" ngoo ri jhau" byid: we'.
Ge lho, da" khyoo: ri toin" shed byid: wigi
gau: nyu: da" khyoo: khyo" ngoo ri vhu" shi: byid: we'.
11 Aseing we"- re" da" dangsoo" byid: to" ziyo' dakhyoo ti" ngoo ri: xue: yu we'
re" da" ge lho' khyoo: khyoo: nga" yau: khe" kyi" khyeug khyoo: mo khyoid khyi: yu byid: we'.
12 Ngoo ri: nang jheddab nyid yoomo nga" gyivoo joem ri: said pyam byid: we'.
Ngoo gi re" da" deizoo: nghoid nyid yoomo
ngoo ri doin: zeig zo: nyid mo, dangain" ri mhoin' pyam, byid: we'.