COUNG" NGHEI 140
Aseing we"- akhyeing" ashoeb mo, lo, mo ngoo ri khyoid yu we'.
athoug" akhyoug: koid nyid bang: da" lo, mo ngoo ri: gau: nyu: nyid nhang: we'.
Nyangnu" gi khanham we' akhyeing" ashoeb da" moo" ri dasoin' go" nyid ziyo'
khanham we' myeing" myoo: yhoo: she: khyoo: joem za: lhu: pau: thu' nyid boem ago".
Nyangnu" da" yhoo: joem gi yo" shid: loo" nhang: da"
lhangmyu, joem yhang: ti" we' nyangnu" da" dang: khoin" thui: joem gi
lang byau, dug yhang: ti" we' du nyid boem ago".
Aseing we"- akhyeing ashoeb, mo, da" yoem: so' mo
ngoo ri goem loem yu byid: we'.
Ngoo ri: joem: gyo" loo" wa shid mo
nyheung soin nyid da" athoug akhyau koid mo, lo, mo-
ngoo ri: goem loem gau: nyu: nhang: nyid we'.
Nghoid boin: lho: phau: khuang nyid bang: gi
nga" shid re" tei" khyo' to abye: go"- nyangnu" gi ngoo ri myheug yu wa shid mo
khyoo: thang sho' moo: lhid thoung: to" abye: go".
Ngoo gi Aseing ri ?Nang gi nga" Mangsoo nghoid nyid da? ein: tid nyid.
Aseing we" pang" thoug yu wa shid mo
nga" da" ngau, yoid thui: ri gyoo: byid: we'.
Nga" myhang: thang da" Aseing yo' nga" yoem: moo" bo da" gyivi su: nang gi
ngoo ri meing: zain: jang: moo: goem loem byid: loo bye:.
Aseing we"- akhyeing ashoeb mo, Nyangnu" vho: ngei nyid khyoo: ri abyid.
Nyangnu" da" soin nyheung khyoo: joem ri we'
oung: doid lo" da" khyoo: ri abyid: nyid.
Nga" gyivoo joem ri aoung: loo" nhang:- nyangnu" koid da"
ngoo ri kyug nhain' thougtheung da" khyoo: joem gi
nyangnu" moo: doem tau" zang" loo" goo baja".
10 Nge" ne, jo, da" myigyu: joem gi nyangnu" da" tho' moo: gyo" gyoin: goo" baja"
nyangnu" gi duang: khuang" khoug: moo: du" khyo' kaid zi shau" boem wigi
khanham we' ayo" doem thu' ri loo: goo" baja".
11 Subi" ri shoid vhang: khyo" yooboo zhoug nyid mo, ri aoung: doid loo" nhang:-
akhyeing" ashoeb da" moo" zoo" gi
athoug" akhyoug: da" byu yiri: khaid myhi: lho:
nyangnu" ri phyo' shoin' pyam, goo" baja".
12 Aseing we"- nang gi sho" jhen mo, da" sei: yo'
ca" yo nyid mo, da" yoo" moin: da" khyoo: joem ri
goem loem byid: nyid khyoo: ri ngoo se' nyid.
13 Deing: byeung" mo, gi nang ri deing" deing nyang: coung" nghei lo boem.
Nyangnu" gi re" shidkhoin" moo: danyid nyid boem wa zi nghoid.