COUNG" NGHEI 139
1 Aseing we"- nang gi nga" khyoo: ri phoid: sho: yu" lho: si' bye:.
2 nang gi ngoo koid khyoo: dangain" ri myang se' nyid.
Vi: mo nyang:- ngoo myid soin: khyoo: dangain" ri se' gyo: nyid.
3 Ngoo, moo" zei: nyid ziyo' doug no: nyid ziri nang myang nyid.
Ngoo cenoem koid nyid ziri nang dangain" si' bye:.
4 Aseing we" ngoo ci" we' atid shire- ngoo ce: noem tid wa ga: ziri
nang dangain" si' gu nghoid.
5 Nga" da" gung yam gung qei: moo:
nang khanham we' lheung khoem to" wigi
re" yoem: moo" yo' ngoo ri nghoeb shung ci: bye:.
6 Hid: yhang: te" re" da" lasi phajhi" gi nga" shid mo
no, thang zi nghoid yoomo ngoo gi atho' se' gyoo: loo.
7 nang yo' ve: gang: loo' sho' ngoo khakhyoo: se' loo" wa lha".
re" da" myo, shid ti: mo ngoo khakhyoo: se' phang: loo" wa
8 Ngoo gi mougkhung: khyoo: to' yo" do' loo" nghoid loug we' nang gi hougmoo: nyid nyid.
Moovo moug: moo: lo" leung jo, nghoid loug we' nang hougmoo: nyid nyid.
9 ngoo gi bid thu' shoid khyoo: dang: phang: lo"-
hougsu" anghoid lang" bidvang shoid mo ve: thang joyoo moo: nyid nghoid loug we'.
10 nang ngoo ri khyoo: shed wa shid re" hau: joyoo moo: nyid wa,
nang gi ngoo ri pang" thoug wa shid re" hau: joyoo moo: nyid nyid wa zi nghoid.
11 Ngoo gi moug: coid" ze wigi ngoo ri nghoeb ci: we' ein: tid lho:
nga" ayam, aqei: moo: jo, jo, da" bidbang ri we'
myen" bue" loo" we ga: tid.
12 Nghoid loug we' re" da" shidkhoin" moo: gi
moug: coid teing: no, da" khyoo: ajo, myen" we' nyid khyoug yo' dakhyoo" ti"
bang jo wa zi nghoid.
Re" shidkhoin" moo moug: coid yo' moug: boo" gi dakhyoo" ti" za: nghoid.
13 Nang gi nga" da" gung goin" ri phain" so: too" bye:.
nga" myhi' da" ung: khoug: mo nyang:-
nang gi ngoo ri azuang zhoug zhoem: too" bye:.
14 Nang gi gye" gyoug pho" ziyo' mau" pho" da"
phain" so: too" shoug" yoomo nang ri jeju" boin: so" nyid.
Re" da" lo, moo" joem gi gye" mau" pho" khyoo: nghoid-
hau ziri nga" nheigloem: dangain" yo' se' nyid.
15 Nga" shooyoug: joem gi nga" myhi' oung: khoug: moo:
goolhoo: za: zhoug zhoem: bue" loo nyid da" ayo, moo: we'
ngoo gi yhoem" shoung: to" joyoo moo: nyid gyi: lo da" ayo, moo: we'
ngoo hougmoo: nyid nyid ziri nang si' bye:.
16 Ngoo akhu: loo shi" re, nang ngoo ri myang bye:-
nga" bidnyid khyeing: thoem" shilo, joem ri ngoo cilang" atho' bui" shire
re" da" mougsoug" pug moo: dangain" ziri
lhid" xoem" too" gu, nghoid bye:.
17 Mangsoo we"- nga" shid mo, nang myid soin' to" da" khyoo: joem ri- ngoo atho' oung: si' loo.
Hau: khyoo: joem gi nghab, loo a-ung: myo: tham: jo, bye:.
18 Hau: ziri to' nghab, yu" nghoid rigi midcoo: tho' moo: je, myoo: wa
Ngoo boin: so" lo da" uri ngoo gi nang yo' dage" nyid lang".
19 O" Mangsoo we"- nheigloem: guid" da" akhyeing" bang: ri said pyam we'.
Athoug akhyoug: koid mo, ri ngoo yo' ve: gang: loo" nhang: we' ein: mho' nyid.
20 Houg: bang: gi re" khyoo: ri akhyeing" khyo" tid nyid lho:
re" myeing khyang" ri ashoeb, khyo" thougtheung dang: tid nyid boem ago".
21 O" Aseing we"- nang ri ngheung" nyid mo, rigi ngoo we' bo ngheung" nyid.
nang ri tu: lhoem" thougtheung mo, rigi ngoo gyisho' nyang: co' ngheung" nyid.
22 Ngoo gi nyangnu" ri ngheung" thang bye:- ngoo gi nyangnu" ri
nga" gyivoo khyo" nyang: soin" too" bye:.
23 O" Aseing we"- nga" nheigloem: ri se' wa shid re" ngoo ri phoid: sho' kyo" yu" we'
nga" myid soin: khyoo: ri myang wa shid re" ngoo ri ca: yu" we'.
24 Nga" nheigloem: khoug: moo: age zi daja: ja: bo nghoid rigi
phoid: sho: yu" lho: wigi apyaid atoo: mo kang: so, khyoo: moo ngoo ri shu" yhe: loo" we'.