COUNG" NGHEI 130
Aseing we"- nga" nheigloem: thang noeb jo, jang" mo
nang ri ngoo yoid mho' nyid.
Aseing we"- nga" ngau yoid thui: ri tam" gyoo: byid: we'.
pang" thoug yu wa shid mo-
nga" mho' sang: dang: ri tam" gyoo: byid: we'.
Ngoonu" da" yooboo joem ri nang to' lhid" xoem" to" byid: nghoid rigi
kha: yug gi yooboo dang: phyed jang" mo yo" phang: loid loo" wa lha".
Nghoid loug we' nang gi ngoonu" ri yooboo khyoid pyam byid: nyid.
Houg: yoomo ngoonu" gi nang ri gyoug phau" tam" gyo: nyid boem.
Ngoo gi Aseing da" pang" thoug khyoo: ri kang: lung bu lang" nyid wigi
Nya: da" mungdang: ri ngoo loem khau: nyid.
Zung" lhoug mo, gi moug: boo" so, ri lang" nyid yhang" ti" nghoid bye:.
Lhoug zung" mo, gi moug: boo" so, ri lang" nyid mo, tho' mo je wigi
ngoo gi Aseing ri kang: lungbu ziyo' lang" nyid.
Israela byumyu" yi we"- Aseing ri loem khau: nyid we'.
Khasu" wim ga: ri nya: da" jhed khyeing: kang: khyeing: gi
dageung: teung jo, wigi nyang: gi ngoonu" ri khanham we' khyoid yu nau nyid.
Nyang: gi nya: byumyu" Israela ri nyangnu" da" youg: noo yooboo dangain" jang" mo
khyoid khyi: yu wa zi nghoid.