COUNG" NGHEI 119
1 Aseing tid to" da" tarha" yo' dakhyoo" ti" ce" yooboo adab, loo: za:
goug goug yi yi kangso' dei nyid mo, gi ngi lho boem.
2 Nyang: tid to" da" amyeing" tarha" ri cang lo" wigi nheigloem: emyed dangain" yo'
nyang: moo: tam" gyo: nyid bang: gi ngi lho nyid boem.
3 Nyangnu" gi khanham we' shoid vhang: da" moo" ri: zei: nyid mo, anghoid-
Nyangnu" gi Aseing da" khyoo: moo: so" nyid boem.
4 Aseing we" nang gi ngoonu" ri tarha" byid: to" lho:
hau: dangsoo" khoin" joem ri goolhoo: tam" gyo: cang yhi: wa shid re"
nang gi ngoonu" ri tid to" abye:.
5 Re" da' jhoug" myeing" joem ri yo" cang byeung" sho'
ngoo yo" zed" lhed nyid wa ziri ngoo gye" nheug byu nyid.
6 Nang tid to" da" tarha" joem dangain" ziri ngoo yo" tam" gyo: nghoid rigi
ngoo sho' shau" gyoug shau" wa zi anghoid.
7 Re" da" deungbyeung" tarha" joem ri shoug" jhau" yu wigi
gyeung" shang: da" nheigloem: yo'
ngoo nang ri coung" nghei nyid wa zi nghoid.
8 Ngoo gi re" da" tarha" joem ri tam" gyo: cang yhe: loo" wa nghoid.
ngoo ri khanham we' ashe: pyam too".
9 Zooyam, phoo gi nya: kangso' dei khyoo: ri
younglho' nyid sho khasu' yo" koid wa lha".
re" da" amyeing" tarha" ri tam" gyo: cang yhe: lo" khyo" za: yo" yu nyid.
10 Nga" nheigloem: ung: khoug: dangain" yo'
ngoo nang ri dei dei byid: wa shid re" yoem kaid wa zi nghoid.
Nang pyeung: to" da" Dang: theing khoin" ri
nung phoug pyam jang mo ngoo ri toem too" we'.
11 Ngoo gi re" da" tarha" ri
nga" nheigloem: ung: khoug: moo kaid to" khyoo: gi
nang ri ngoo yooboo azang" koid wa shid re" nghoid.
12 Aseing we"- nang ri ngoo coung" nghei nyid.
Re" da" khyoo: joem ngoo ri jhoug" byid: we'.
13 Nang byid: to" da" tarha" dangain" ziri thui: thain" thain: yo'
ngoo doem phoug tid kyo" nyid wa.
14 Zi yoo joem myoo" sho' ri: yo" kham: yu wa da" tho' moo gi
re" da" amyeing tarha" ri tam" gyo: cang nyid wa zigi ngoo je" vho: ngei nyid.
15 Ngoo gi re" da" khyoo: shed dang: joem ri jhau" yu nyid lho: wigi
Re" da" jhau" byid: khyoo: ri we' ngoo gi phoid: sho' yu" nyid.
16 Re" da" tarha" joem moo ngoo vho: ngei gau yi nyid. Ngoo gi
re" da" amyeing" tarha" ri to" myhed pyam wa zi anghoid.
17 Ngoo gi kangso, dei nyid lho: re" da" jhoug" myeing" jhoug" thui: joem ri
tam" gyo: cang yhi: wa zi nghoid yoomo
re" da" dei zoo: nga" atho' moo: ge lhoo nhang: nyid we'.
18 Re" da" tarha" mo mau" pho" deungmain" da" khyoo: joem ri
ngoo shau" myang wa shid re" nga" myojid" ri phang byid: we'.
19 Ngoo gi: he: da" mougmyid tho' moo daso' dadam za: date: nyid nyid.
Re" da" amyeing tarha" joem ri nga" jang" mo ayhoem" pyam byid.
20 Ayo, loem: khang" moo" moo re" da" tarha" dang: phyed da" khyoo: ri
ngoo si' nau nyid yoomo nga" nheigloem: ung: khoug: moo:
vho: ngei nyid ziyo' nheug nge nyid.
21 Nang gi phau: khuang nghoid boin: nyid mo ri gyikoid jhau" byid: nyid wa
re" da" amyeing" tarha" ri: do, rhui, bang: rigi
nheing" khoin" zang" nhang: nyid.
22 Ngoo gi re" da" tarha" joem ri cang pyeung nyid bye: yoomo
nyangnu" da" gei sang: shang pyang: ziyo'
aphoug" akhyoid koid nyid jang" mo ngoo ri loid byoin loo" nhang: we'.
23 Mung" vhoeb da" zoug: yigi phoung: foem: nyid boem lho:
ngoo ri goemlu koid wa zi sham: go" nyid boem.
Nghoid loug we' ngoo gi nang jhau" byid: da" khyoo: ri dajhau" yu nyid wa nghoid.
24 Re" da" jhau" mho' khyoo: shed da" dang: joem gi
ngoo ri nheigloem: pyoo: nhang: lho: wigi
hau: zigi ngoo ri phajhi" byid- khyoo: shed nyid bang: nghoid da:.
25 Ngoo soem" leung lo" wigi phei" lhoug: boem" moo: dajo, lo-
re" da" dang: soo" khoin" yo dakhyoo" ti"
ngoo ri yoem so, aseig byid: wigi doem tu: to' kaid we'.
26 Ngoo zei: loo bye: da" khyoo: dangain" ziri
ngoo yhen: yu bye: yoomo nang gi ngoo ri tam" gyoo: byid: bye:.
Nang vho: ngei khyoo: joem ngoo ri jhau" byid: we'.
27 Re" da" tarha" joem ri se' gyo: loo wa shid re"
ngoo ri: pang" thoug yu byid: we'.
Re" da" mau" pho" jhau" byid: da" khyoo: joem ri ngoo myid soin: yu" nyid wa zi nghoid.
28 Ngoo gi kougshu: ziyo' zeung" lhoung to" zi shau" nyid.
Re" da" dangsoo" khoin" yo' dakhyoo" ti"
ngoo ri yoem foin byid: we'.
29 Shoid vhang: da" khyoo: moo: so" yhe: lo" jang" mo ngoo ri khyoo: shed yu byid: we'
Re" da" ge lho, khyoo: moo: ngoo ri re" da" tarha" jhau" byid: we'.
30 Tam" gyo: lho: cang yhi: su: bui" wa shid re" ngoo khyen: yu ci: bye:.
Re" tarha" dang: phyed da" khyoo: ri ngoo tam" gyo: nyid bye:.
31 Aseing we"- ngoo gi re" da"
jhau" mho' khyoo: shed da" dang: joem ri cang lo nyid bye:-
ngoo ri sho' thu gyoug athu nhang:.
32 Nang gi ngoo ri je se, gyo: yeug loo wa phajhi" byid: nyid zi nghoid yoomo
re" da" amyeing" dang: joem ri ngoo gi goug goug yi yi tam" gyo: cang yhe: loo" wa.
33 Aseing we"- re" da" tarha" joem da" dang: kang: ngoo ri jhau" byid: we'.
Ngoo gi: hau: khyoo joem ri ayo, loem khang" moo tam" gyo: lho: cang yhe: loo" wa nghoid.
34 Re" da" tarha" ngoo ri tid pang shug we' houg: lang" hau: ziri
ngoo tam" gyo: nyid wa zi nghoid.
Nga" emyed dangain" yo' hau: ziri ngoo young: kaid too" wa nghoid.
35 Re" da" Dang: theing khoin" moo gau, yi ngei pyo: khyoo: ri: ngoo myang yoomo
hau: dang: joem ri tam" gyo: cang nyid nhang: wa shid mo ngoo ri zei: ci: we'.
36 Yo" loo de, loo wa tho' moo re" da" tarha" joem ri tam" gyo: cang loo" wa shid re"
vho: ngei nau da" emyed ngoo ri kaid byid: we'.
37 Ce" phoug" adab, ziri za: nheug byu nyid jang mo ngoo ri toem pyam byid: we'.
Re" da" dangsoo" khoin" moo: bo ziyo' dakhyoo" ti nga" tho' moo: ge lho nyid we'.
38 Nang ri gyoug phoug" bang: ri byid: to" da" dangsoo" khoin" ri
re" da" dei zoo: ngoo ri we' byid: we'.
39 Ngoo gyoug nyid da juang" yi ge sang: nyid boem da" dang: thui: mo ngoo ri khyoid yu we'.
Re" da" dang: phyed lo khyoo: joem gi
khayhi' gyeing" mau" pho" zi nghoid lha".
40 Ngoo gi re" da" amyeing" tarha" joem ri tam" gyoo: nau-
nang gi deungbyeung" su: nghoid nyid yoomo
ngoo ri kangso' aseig byid: we'.
41 Aseing we"- nang ngoo ri: khayhi' jheddab nyid ein: zigi ngoo ri toin" shed nyid we'.
Re" da" dangsoo" khoin" yo' dakhyoo" ti" ngoo ri khyoid yu byid: we'.
42 Re" da" dang: ri loem khau: nyid yoomo
ngoo ri aphoug" akhyoid koid nyid mo, ri
yo" phoug tu" wa zi nghoid.
43 Re" da" tarha" dang: phyed khyoo: joem moo
nga" nheig byu joyoo deingmain" da" dang: ri
ayo, khang" moo" moo: yo" tid wa shid re" ngoo ri pang" thoug yu we'.
44 Re" da" tarha" joem ri apyai" loo" nhang: loo: za:
pyaid moo: too: moo ngoo dacang nyid wa zi nghoid.
45 Re" da" jhoug" myeing" jhoug" thui: joem ri
ngoo tam" gyo: lho: yoem: kaid nyid yoomo
joeb, byeung" da" loid byoin akhang" moo ngoo shoug" nyid wa zi nghoid.
46 Re" da" amyeing" dang: joem ri khokham yiri:
ngoo tid fu" kyo" loo" wa zi nghoid lho:
ngoo gi gyoug sho' shoug" wa zi anghoid.
47 Ngoo gi re" amyeing" tarha" joem ri: jheddab nyid yoomo
hau: khyoo: joem ri tam" gyo: cang lo" jang" moo
nheugshid: gau, yi khyoo: ri ngoo shoug" shoo: wa zi nghoid.
48 Re" da" Dang: theing khoin" ri
ngoo gi phau" myang: lho: jheddab nyid.
Re" da" khyoo: shed dang: joem ri ngoo myid yu" nyid wa nghoid.
49 Re" da" dei zoo ngoo ri byid to" da-
dangsoo" khoin" ri daboin: so" nyid we'.
Hau: zigi ngoo ri nheig byu jang: byid: nyid.
50 Re" da" dangsoo" khoin" gi ngoo ri: kang so, dei nyid nhang: yoomo
kyi" khyeug yau: khi" uri lang"- nheig teing ung: teung ziri: ngoo shoug bye:.
51 Phau: khuang nyid bang: gi- ngoo ri: khanham we'
juang" yi nyid boem nghoid loug we'
re" tarha" ri ngoo to" pyam wa zi anghoid.
52 Lai loo" bye: da" ayo, mo re" da" tarha" dang: phyed khyoo: ri ngoo daboin: nyid.
Aseing we"- he: da" khyoo: joem gi ngoo ri nheig teing ung: teing byid: nyid.
53 Akhyeing" bang: gi re" da" tarha" ri lhu: phyo' pyam nyid ziri
myang da" uri: ngoo gi nheig yoo: nau nyid.
54 Nga" aleing" kyeung" da- mougmyid kang: so, gyung: khyoo: moo:
ngoo gi re" amyeing" tarha" yo' sen: da" jihkoin" joem ri ngoo lhid" nyid.
55 Aseing we"- myen" mo da" ayo, moo ngoo nang ri: myid boin: nyid wigi
re" tarha" da" khyoo: joem ri ngoo myid soin: yu" nyid zi nghoid.
56 Re" da" amyeing" tarha" joem ri tam" gyo: cang yhe: lo" jang" moo
nga" da" gau yi khyoo: ri ngoo shau" myang sho' yu nyid.
57 Aseing we"- ngoo vho: ngei nyid khyoo: dangain" gi nang za: nghoid.
Re" da" tarha" ri tam" gyo: cang loo" wa shid re" ngoo dangsoo" ri byid: bye:.
58 Re" da" dangsoo" khoin" yo' dakhyoo" ti" ngoo ri nheig khyeug yu wa shid re"
nga" nheigloem: emyed dangain" yo' nang ri ngoo mho' yoid nyid.
59 Ngoo gi- ngoo nya: aved, ri myid yu" bye:-
re" da" dangsoo" khoin" joem ri cang wa shid re"
nang ri ngoo dang: theing byid: too" bye:.
60 Re" da" amyeing tarha" joem ri anhe" nyid loo: za:
ngoo myab, myab, tam" gyo: cang nyid bye:.
61 Akhyeung" mo, gi: nga" shid re"
lhid thoung: to" boem nghoid loug we'
ngoo gi re" tarha" ri to" myhed pyam wa zi anghoid.
62 Ngoo ri: myen" gam gung ri yhoeb so" lo wigi
re" da" deingmain" tarha" dang: phyed khyoo: shid mo
nang ri: ngoo coung" nghei nyid wa zi nghoid.
63 Ngoo gi nang ri loem khau: nyid mo, dangain" yo' re" da"
tarha" ri tam" gyo: cang yhi: bang: dangain" bang: bidnoem nghoid.
64 Aseing we"- mougmyid yoosoo" gi
re" da" athang agoin jhed khyeing: kang: khyeing: yo' byeung" jo.
Ngoo ri re" da" Dang: theing khoin" joem joug" byid: we'.
65 Aseing we"- re" da" dangsoo" khoin" ri nang cang pyeing bye:-
Re" da" deizoo: nga" atho' moo ge khyo" koid byid: nyid abye:.
66 Re" da" amyeing" tarha" joem ri ngoo loem khau: nyid yoomo
ung: yeig phajhi" yo' lasi phajhi" ngoo ri byid: we'.
67 Nang ngoo ri ashen" yhen shi" rilang"-
ngoo gi khyo: vhang: loo" loo" da wim, nyid
nghoid loug we' akhid" koem gi re" dang: ri ngoo tam" gyo: nyid.
68 Nang gi khayhi' gyeing" ge lhoo su: nghoid ziyo'
nheig khayhi' se' khyeug su: nghoid nhung: lha".
Ngoo ri: re" amyeing" tarha" joem jhau" byid: we'.
69 Phau: khuang nghoid boin: nyid mo gi
nga" da" khyoo: ri mhau, fain" vo da" dang: ri tid nyid boem- nghoid loug we'
nga" emyed nheigloem: dangain" yo' re" da" khyoo" shed khyoo: ri ngoo gi tam" gyo: nyid.
70 Houg: bang: gi se' gyo: khyoo: abo boem nghoid loug we' ngoo gi
re" da" tarha" mo nheugshid: nheugdeug khyoo: ri sho: nyid.
71 Ngoo thoung" shoug" zo: ca" shen" yhen khyoo: gi nga" shid re" gye" ge zi nghoid.
Khasu" wim gari hau: zigi: ngoo ri re" amyeing" tarha" dang: joem ri jhau" yu nhang: nyid.
72 Nang ngoo ri: byid: to" da" tarha" gi mougmyid tho' mo-
ngei sheing: lug nyau da" tho moo phoug" je" dab, nyid.
73 Nang gi ngoo ri phain" so: to" lho: gau: nyu: goem loem byid: nyid.
Re" da" tarha" joem ri: ngoo yo" jhau" yu wa shid re" ngoo ri se' gyo: khyoo: byid: we'.
74 Nang ri gyoug phau" nyid bang- ngoo ri shau" myang lang- gau yi ngei pyo: nyid boem.
Khasu" wim gari ngoo gi re" da" dangsoo" khoin" ri loem" jeung" nyid yoomo nghoid boem.
75 Aseing we"- re" da" tarha" dang: phyed nyid khyoo: gi
deingmain" nyid ziri ngoo se' nyid.
Nang gi dang: zung" su: nghoid yoomo ngoo ri shen" yhen nyid zi nghoid.
76 Nang gi ngoo ri dangsoo" khoin" byid: too" bye: ziyo' dakhyoo" ti"
re" da" deizoo: ngoo ri re" da" athang agoin da" jhed khyeing: kang: khyeing: yo
ngei pyo: khyoo: byid: nyid we'.
77 Re" da" tarha" ri ngoo vho: ngei nyid yoo mo nga" tho' moo: nheug khyeug byid: we'
hougsu" nghoid lang she, ngoo dayo" dei nyid wa zi nghoid.
78 Phau: khuang nghoid boin: nyid bang: gi
ngoo ri anghoid ajo khyo" yooboo foin: nyid boem yoomo
sho' shoug" gyoug shau" nyid goo" baja".
Ngoo koem gi re" da" khyoo" shed, dang: thui: ri damyid yu" nyid wa zi nghoid.
79 Nang ri: gyoug phau" nyid bang: yo'
re" da" amyeing" dang: joem ri se' gyoo: bang: dangain" gi
nga" jang" moo: ju" loo goo" baja".
80 Ngoo gi: re" da" Dang: theing khoin" joem ri
ciyoo aboo loo: sho' tam" gyo: cang nyid bye: yoomo
sho' thu gyoug thu ziyo' soem" lo" zi ngoo moo: athoung" shoug" baja".
81 Aseing we"- ngoo gi myoung: dau nyid yoomo
ngoo ri khyoid yu wa shid re" nang ri za: dalang" nyid.
Re" mungdang: moo: ngoo loem khau: nyid.
82 Re" da" dangsoo" khoin" ri yu" lang" nyid yoomo
nga" myojid" joem gi: myoung: nyid bye:.
?Nang gi ngoo ri khanham she, dapang" thoug yu wa lha"? ein: wigi ngoo myid: nyid.
83 Ngoo gi she: pyam, too" bye: da" shooyid thung: joid yhang: ti"
ce" akyu" we' aboo loo nghoid loug we'
re" da" amyeing" dang: joem ri ngoo to" myhed pyam nyid zi anghoid.
84 Kha: myhang myang" sho' ngoo lang" nyid ca" wa la".
Ngoo ri: pyi: sho: shen" yhen nyid bang: ri nang kha: uri shen" yhen wa lha".
85 Re" da" tarha" ri acang nghoid boin: nyid mo, gi
ngoo ri myhi' yu wa ga: gyoin: du nyid abye:.
86 Re" da" Dang: theing khoin" joem dangain" gi nheugdeug loem ge" nyid zi nghoid.
Byu yigi mhau, fain" no" zo ziyo'
ngoo ri: shen" yhen boem bye:. Ngoo ri: pang" thoug yu we'.
87 Nyangnu" gi: ngoo ri alug lug yo" said pyam boem abye: goo".
Nghoid loug we' re" da" amyeing" dang: joem ri ngoo angheug pyam.
88 Re" da" athang agoin jhed khyeing: kang: khyeing: yoomo
ngoo ri ge lho' khyoo: toin" shed byid: we'.
Hougsu" lang" ngoo gi re" da" tarha" joem ri:
yo" tam" gyo: cang loo wa nghoid.
89 Aseing we" re" da" mungdang: gi apyaid atoo: moo: dageung: teung jo.
Hau: zigi mougkhung: tho' moo: apyaid atoo: dageung: teung jo.
90 Re" da" nheigloem: zung" khyoo: gi
pyaid moo: too: moo: dageung: teung jo.
Nang gi mougmyid ri joyoo nyheung xoem" too" byid: bye: ziyo'
houg: gi khanham we' dajo, jo.
91 Zi yoo jo, moo: jo, dangain" gi re" da" amyeing" dang: yoomo
akhid" nyid ju" sho' dajo, jo-
khasu" wim ga: ri nyangnu" dangain" gi
re" dei zoo: yi za: nghoid nyid.
92 Gyeing" nyang: re" da" amyeing" tarha" gi nga" shid mo
gau yi ngei pyo: da" apoem: ayang: ato' nghoid rigi
ngoo gi nga" da" phu" zo: khyoo: joem moo: shid: loo" wa zi nghoid.
93 Ngoo gi re" da" khyoo: shed dang: yo'-
ngoo ri kangso' dei nyid nhang: yoomo
hau: khyoo: yiri ngoo khanham we' ngeug pyam wa zi anghoid.
94 Ngoo ri nang seing: su: nghoid nyid ngoo ri khyoid yu we'.
Ngoo gi nang byid: to" amyeing" dang: joem ri
cang wa shid mo yoem: kaid loo bye:.
95 Akhyeung" da" byu yigi ngoo ri shid: loo" wa shid re"
lhoem: nyid boem nghoid loug we'
ngoo gi re" da" tarha" joem ri za: damyid yu" nyid wa.
96 Jo, moo: jo, gi laleug lake, khoug: moo: za: jo, jo,.
Nghoid loug re" da" amyeing" mungdang: koem gi
joeb byeung" da" khyoo: ri: ngoo shoug" jhau" yu bye:.
97 Re" da" tarha" ri ngoo khayhi' jheddab nyid lha".
Hau: khyoo: ri danyid goin" ngoo myid soin: yu" nyid.
98 Re" da amyeing" dang: gi ngoo yo' dage"
ayo, khang moo" moo: jo, jo wigi
hau: dang: gi nga" gyivoo yi tho' re"
ngoo ri ung: yeig phajhi" yo" yu nhang: nyid.
99 Ngoo gi re" da" khyoo: shed dang: joem ri
danyid" goin" yu nyid yoomo ngoo ri jhau" byid: da" sara: yi dangain" tho' re"
ngoo gi je' wigi se' yeug lo nyid.
100 Ngoo gi re" da" amyeing" dang: joem ri tam" gyo, cang yhe: lo" nyid yoomo
apyaid gyi: bye: bang: tho' moo: lang" ngoo je" wigi phajhi" bo nyid.
101 Ngoo gi re" da" mungdang: ri tam" gyo: cang yhe: loo" noug yoomo
ashoeb, da" aved, asam" dangain" ri ngoo jang pyam bye:.
102 Nanyang: nga" da" sara: nghoid nyid yoomo
re" da" khyoo: shed dang: khoin" joem ri
ngoo ngeug pyam nyid zi anghoid.
103 Re" da" khyoo" shed dang: khoin" joem gi gye" cau: zi nghoid nhung:
hau: zigi byooyhid: tho' re" lang" je" cau: nyid.
104 Ngoo gi re" tarha" joem mo ung: yeig phajhi" yo" yu nyid yoomo
ayung" adu, lo: da" sam" void dangain" ziri ngoo ngheing" bye:.
105 Re" da" mungdang: gi ngoo ri khyoo: shu" lo" da" myibung: yo'
nga" gyung: khyo: shid re" bidbang nghoid.
106 Re" da" deingmain" khyoo: shed dang: khoin" joem ri
tam" gyo: cang yhi: wa shid re" nga" geung: teung da" dangsoo" khoin" yo' dakhyoo" ti"
ngoo cang zei: pyeung nyid wa nghoid.
107 Aseing we"- ngoo phu" zo: nyid da-
kyi" khyeug gi gyeing" gyeing" nyang: gyoug pho" zi nghoid nyid.
Re" da" dang soo" khoin" yo' dakhyoo" ti"
ngoo ri kang so, dei nyid nhang: shi" we'.
108 Aseing we"- jeju" coung" nghei da" nga" akyu" mho' thui: ri
lhoem: yu byid: lho: re" da" amyeing" dang: joem ngoo ri jhau" byid: we'.
109 Ngoo gi gyoug pho" da" kangso' gyung: khyoo: moo
kang so, dain pyam lho: so" loo' wa shid re"
khanham we' jen" jen" nghoid nyid-
re" da" tarha" ri ngoo to" myhed pyam wa zi anghoid.
110 Akhyeung" da" byu yigi ngoo ri myhi' wa shid re"
lhid thoung: to" boem nghoid loug we'
ngoo gi re" da" amyeing" dang: joem ri atam" gyoo: loo: akoid lo yu".
111 Re" da" Dang: theing khoin" joem gi pyaid didu mo
nga" da" ziyoo jonu" joem nghoid nyid
hau: zigi nga" nheigloem: ung: khoug:
gau, yi ngei pyoo: jo yoo nghoid nyid.
112 Ngoo gi shid: lo" bidnyid ju" sho' re" da" tarha" joem ri tam" gyo: cang
yhi: wa shid mo myid phyed too" bye:.
113 Nang moo: bain sho' atam" gyo: nyid bang: ri ngoo gi ngheung" nyid.
Nghoid loug we' re" tarha" ri ngoo gi vho: ngei nyid.
114 Nang gi nga" da" khau: goo, su: yo' goem loem su: nghoid nyid
nga" da" nheig byu jang: gi re" da" dangsoo" khoin" khoug: moo: za: nghoid nyid.
115 Yooboo dab, da" byu yi we"- nga" jang" mo phang: thu' loo" we'.
Ngoo gi nga" Mangso amyeing" dang: joem ri tam" gyo: nyid wa nghoid.
116 Re" da" dang soo" khoin" yo' dakhyoo" ti"
ngoo ri yoem: foin byid: we'.
Houg: lang" ngoo gi kangso' yo" dei nyid wa nghoid.
Nga" nheig byu joyoo moo nheigloem: byo, yoin" loo" wa khyoo: abue" loo nhang:.
117 Ngoo ri: zei: ci: we' houg: lang" ngoo gau: nyu: nyid wa nghoid.
Ngoo gi re" da" amyeing? dang: joem ri
khanham we' tam" gyo: cang nyid wa zi nghoid.
118 Nang gi re" da" tarha" joem ri
atam" gyoo: bang: yugkhang" moo" ri he: ngeug pyam nyid da:.
Nyangnu" da" mhau, fain" soin nyheung khyoo: joem gi
ce: akyu" we' aboo nghoid da:.
119 Nang gi akhyeing" ashoeb bang: dangain" ri
phojoid, mhain" pyang yhang: ti" she: lhei" pyam, nyid.
Houg: yoomo ngoo gi re" da" khyoo: shed dang: khoin" joem ri jheddab nyid.
120 Nang yoomo ngoo gi gyoug nain" nyid bye:-
re" da" tarha" dang: phyed nyid khyoo: yoomo
ngoo moo: gyoug phau" emyed byoug jo.
121 Deingmain" ziyo' ge da" moo" zoo" joem ri- ngoo cang zei: nyid bye:.
Nga" gyivoo joem lo, moo: ngoo ri atoo" khoo.
122 Re" da" deizoo: phoo ri nang pang thoug yu wa dang soo" byid: we'
nheigloem: myhang: da" byu yigi ngoo ri adoin: zeug nyid nhang:.
123 Khyoid yu wa shid re" nang dang soo" too" bye:-
re" da" pang" thoug khyoid yu wa da" khyoo: ri
lang" nyid da" nga" myojid" yu" zigi: myo, myung: bye:.
124 Re" da" athang agoin da" jhed, khyeing: kang: khyeing: yo' dakhyoo" ti"
nga" atho' moo: ge nyid we'.
Re" da" amyeing" dang: joem gi ngoo ri jhau" byid: nyid we'.
125 Ngoo gi re" da" dei zoo: nghoid nyid re" da" jhoug" myeing" jhoug" thui: joem ri
ngoo yo" se' yu wa shid mo ngoo ri se' gyo: da" emyed kaid byid: we'.
126 Aseing we"- byu yigi re" da" tarha" ri atam" gyo: nyid boem yoomo
he: da" ayo, gi re" shid re" moo" zei: wa ayo, nghoid bye:.
127 Sheing: yo' gyeung thang da" sheung: tho' moo re" da" amyeing" dang: joem ri
ngoo je" vho: ngei nyid.
128 Houg su' nghoid yoomo re" da" khyoo: shed dang: khoin" joem dangain" ziri
ngoo cang pyeung nyid shoid vhang: khyoo: dangain" rigi ngoo ngheung" nyid.
129 Re" da" jhoug" myeing" jhoug" thui: joem gi mau" pho" zi nghoid.
Hau: khyoo: joem ri nga" nheigloem: ung: khoug: dangain" yo' ngoo tam" gyo: nyid.
130 Re" da" jhoug" myeing" jhoug" thui: joem ri tid pang kyo" da" khyoo: gi
bidbang ri pang byid: nyid wigi nheigboo ung:
agyeung: bang: ri nheigboo ung: gyeung" loo nhang:.
131 Re" da" amyeing" dang: joem ri kang: lung bu nyid wigi
nga" nhoid fo, lho: so, kho' kho nyid.
132 Nang ri jheddab nyid bang: dangain" mo, da" atho' moo nang koid ziyo' dakhyoo" ti"
nga" jhang khyoo: lheung: lo wigi ngoo ri nheig khyeug we'.
133 Re" da" dang soo" khoin" jo, ziyo' dakhyoo" ti"
nang mo ngoo ri tu: to' yu shi" we'.
Akhyeing" ashoeb ziyo' leung gyo lo" khyoo: gi ngoo ri a oung: pyam nhang:.
134 Ngoo gi re" amyeing" dang: joem ri
yo" cang loo" baja" ngoo ri doin: zeug ci: mo, da" lo, mo khyoid yu byid: we'.
135 Nang gi ngoo yo' dage" nyid lho: ngoo ri: mainkaid byid: wigi
re" tarha" joem ngoo ri jhau" byid: we'.
136 Byu yigi re" da" tarha" ri atam" gyo: nyid boem yoomo
nga" ngoug byid joem gi gyid zeing lang su" dayau, nyid.
137 Aseing we" nang gi deungbyeung" su: nghoid ziyo'
re" da" tarha" joem we' nyeung veung" khyoo: nghoid.
138 Nang byid: too" bye: da" tarha" akhyoo" again joem gi
dangain" gam mi gam shoo" yi" ziyo' deingmain" nyid.
139 Nga" da" gyivoo joem gi re" da" amyeing" dang: joem ri cishu: anhang: boem yoomo
nga" nheig khoo" yo: khyoo: gi myi: su" nge" nyid.
140 Re" da" dang soo" khoin" gi gye" deingmain" ngoo gi
hau: ziri khayhi' mo jheddab nyid lha.
141 Ngoo gi ce" yhoug: agyen: su: yo' yu" nge khyo' pyam zi shoug" su: nghoid nyid.
Nghoid sho' loug we' ngoo gi re" da" jhoug" myeing jhoug" thui: ri cishu: anhang: avoem" koid.
142 Re" da" deingmain" khyoo: gi pyaid moo: too: moo: dageung: jo, wa zi nghoid.
Re" tarha" we' khanham we' deingmain" jo, wa zi nghoid.
143 Ngoo gi gyoug nain" ziyo' myid myoo: ung: loug zi shoug" nyid.
Nghoid loug we' re" da" Dang: theing khoin" joem gi ngoo ri gau, yi nhang: nyid.
144 Re" da" khyoo: shed dang: khoin" joem gi khanham we' nyeung veung" zi nghoid nyid.
Ngoo kangso' dei nyid baja"- ngoo ri: se' gyo: da" emyed kaid byid: we'.
145 Nga" nheigloem: emyed dangain" yo' ngoo nang ri yoid nyid.
Aseing we"- ngoo ri: phoug tu" byid: we'-
re" amyeing" dang: joem ri ngoo tam" gyo: lho: cang yhe: loo" wa.
146 Ngoo nang ri yoid nyid ngoo ri khyoid yu we' re" tarha" joem ri
ngoo cang pyeung nyid wa nghoid.
147 Ngoo ri: pang" thoug yu wa shid re" bid axain" shi" ri
nang ri ngoo yoid nyid bye:- re" da" dangsoo" khoin" ri ngoo nheig byu nyid.
148 Damyen goin" ayhoeb, loo: leung jo, zoore
re" da" khyoo: shed jhoug" thui: joem ri myid yu" nyid.
149 Aseing we"- re" jhed khyeing: kang: khyeing: gi
ageung: jo, yoomo ngoo ri tam" gyoo: byid: we'.
re" da" nheig khyeug shoomyen: khyoo:
ngoo ri toin" shed nyid wigi nga" kangso' ri shoung: too" byid: we'.
150 Nheig khyeug shoomyen: ase' da" shen" yhen mo, gi
anam, khyoo: nyhen" re" lo boem bye:
byu houg: bang: gi re" da tarha" ri khanham we'
acang mo, nghoid boem ago".
151 Nghoid loug we' Aseing we"- nang gi ngoo yo'
jhang" jang" moo: nyid nyid su: nghoid yoomo
re" da" amyeing" dang: joem dangain" gi gyeig ayu" dageung: teung jo.
152 Goonham mo wigi re" da" khyoo: shed dang: khoin" joem akhyoo" ri
ngoo jhau" kham: yu loo bye:-
nang gi hau: ziri pyaid moo: too: moo geung: teung jo, nhang: bye:.
153 Re" da" tarha" ri ngoo angeug pyam yoomo
nga" kyi" khyeug khyoo: ri yu" lho: ngoo ri khyoid yu we'.
154 Nga" da" sei: ri goem loem byid: lho: ngoo ri: loid byoin nhang: we'
nang dang soo" byid: to" ziyo' dakhyoo" ti" ngoo ri khyoid yu we'.
155 Akhyeung" mo, gi re" da" tarha" joem ri
acang nyid yoomo khyoid yu zi nyangnu" gi shoug" goo' wa anghoid.
156 Nghoid loug we' Aseing we"- re" da" nheig khyeug khyo: gi
gyi: sheung: jo, yoomo re" shoomyen: khyoo: ri
toin" shed lho: ngoo ri khyoid yu we'.
157 Ngoo moo: gyivoo joem yo' doin: zeig zoo mo, myoo" sho' nyid.
Nghoid loug we' re" da" tarha" cang tam" gyo: da" khyoo: mo
yoem: neung: loo" wa zi anghoid.
158 Phoug leug loo" mo, ri yu" lho: ngoo nheig yu" no-
khasu" wim ga: ri nyangnu" gi re" da" amyeing" dang: ri acang boem.
159 Aseing we"- re" da" khyoo: shed dang: khoin" joem ri
ngoo khayhi' gyeing" jheddab nyid ziri yu" yu" we'
re" da" jheddab nheigloem: gi khanham we' thid lo" byug wa zi anghoid.
Houg: yoomo ngoo ri khyoid yu we'.
160 Re" da" tarha" akang gi deingmain" da" khyoo: nghoid-
re deingmain" da" tarha" dang: phyed khyoo: dangain" gi
apyaid atoo: moo: dageung: teung jo,.
161 Khoin" so, boo bang: gi ngoo ri atarha" khyo" zain: lo nyid boem nghoid loug we'
ngoo gi re" da" tarha" ri phau" myang: nyid.
162 Aseing re" dang soo" khoin" joem yoomo ngoo khayhi' gau yi ngeibu: nyid lha".
Myo: tham: da" jonu" ziyoo joem ri
shoug" seing: su: yhang: ti" gau yi ngeibu: nyid.
163 Ngoo gi mhau, fain' khyoo: joem dangain" ziri ngheung" ziyo' nheig no nyid.
Nghoid loug we' ngoo gi re" da" tarha" ri jheddab nyid.
164 Re" deungbyeung" dang: phyed da" khyoo: yoomo
nyid" khang" moo" nyhed lheing: lheing-
nang ri ngoo jeju" boin: nyid wa.
165 Re" tarha" ri jheddab mo, gi joeb byeung" da" goem loem khyoo: yoo" bang: nghoid wigi
ce: khyo" we' nyangnu" ri yo" tu: khyo' pyam wa zi anghoid loo.
166 Aseing we"- ngoo ri khyoid yu wa shid re" nang ri: ngoo lang" nyid.
Re" da" amyeing" dang: yo' dakhyoo" ti" ngoo zei: nyid bye:.
167 Re" jhoug" myeing" jhoug" thui: joem ri ngoo tam" gyo: cang nyid.
Hau: khyoo: joem ri: nga" nheigloem: emyed joem dangain" yo' jheddab nyid.
168 Re" amyeing" dang: joem yo' re" da" khyoo: shed dang: joem ri ngoo tam" gyo: cang lo nyid.
Ngoo zei: lo khyoo: dangain" ri we' nang myang nyid bye:.
169 Aseing we"- pang" thoug yu wa shid re" nga" da" mho' yoid thui: gi
re" jang" moo: ju" kyang do, loo baja"
nang dangsoo" byid: to" ziyo' dakhyoo" ti" ngoo ri se' gyo: emyed byid: we'.
170 Nga" akyu" mho' thui: ri tam" gyo: lho:
re" dangsoo" khoin" yo' dakhyoo" ti"
ngoo ri khyoid yu we'.
171 Nang gi ngoo ri re" da" tarha" joem jhau" byid: yoomo
nang ri ngoo gi khanham we' coung" byid: nyid wa nghoid.
172 Re" da" amyeing tarha" joem gi nyeung veung" zi nghoid yoomo
re" da" tarha" akhyoo" ri ngoo jihkoin" khoin" nyid wa nghoid.
173 Re" da" amyeing" dang: khoin" joem moo- ngoo cang nyid yoomo
ngoo ri pang thoug yu wa shid re" khanham we' jen' jen" koid nyid we'.
174 Aseing we"- nang pang" thoug da" khyoid yu khyoo: ri
ngoo khayhi' gyeing nheig nhei: nyid lha".
Ngoo re" da" tarha" khoug: moo: gau yi khyoo: shau" yu nyid.
175 Ngoo nang ri coung" nghei wa shid re" ngoo ri kangso' byid: we'.
Re" da" khyoo: shed dang: khoin" joem gi- ngoo ri pang" thoug byid: baja".
176 Ngoo gi byoug lo' da" yang dadu: yhang: ti" khyoo: vhang: du: dam: yen".
Houg: yoomo re" lho: re" da" zoo: phoo ngoo ri cang shoo: we'.
khasu" wim gari re" da" tarha" joem ri ngoo ngeug pyam nyid su: anghoid.