COUNG" NGHEI 115
1 Aseing we"- re" da" athang agoin jhed khyeing: kang khyeing: yo'
dang: zoung" khyoo: yoomo ngoonu" ri anghoid.
Re" da" myeing khyang" ri za: phung" yoeb myonhoo: byid: boem baja o".
2 ?Nanu" da" Mangsoo gi khayoo: nyid lha"? ga: wigi byumyu" yigi
ngoonu" ri ciyoomo myid: nyid boem lha".
3 Ngoonu" da" Mangsoo gi
mougkhung: tho' moo: nyid wigi ce" noem ri nghoid loug we'
nyang: vho: khyo" dakoid nyid.
4 Nyangnu" da" yu phara" joem gi
ngei sheing" joem yo' koid to" wigi
hau: zigi byu joem da" lo, ze koid to" da" zi za: nghoid nyid.
5 Nyangnu" moo: nhoid dab, nghoid loug we' dang: ase tid.
Myojid" dab, nghoid loug we' myo, amyang nghoid ago".
6 Nyangnu" moo: nukhyab dab nghoid loug we' ashoug" gyoo:-
nhoo: dab nghoid loug we' ase' shoem: nam.
7 Nyangnu" moo: lo, dab nghoid loug we' ayo" zei: nghoid ago".
Khyid: dab, nghoid loug we' ayo" so" loo" nghoid ago".
Nyangnu" gi ce" thui: ri we' ayo" thu kaid nghoid ago".
8 Hau: yu phara" soolhoo: ri baid kyoung" lhid" too" bang: yo'
hau: ziri loem khau: nyid mo, gi
Nyangnu" koid to" da" yu phara" soolhoo: yo' dakhyoo" ti: nghoid nyid goo" baja".
9 Israela byumyu" yi we"- Aseing moo: loem khau: nyid we'.
Nyang: gi nanu" ri pang" thoug byid: wigi
nanu" ri goem loem byid: nyid.
10 Mangso da" khainjung yi we"-
hau: Aseing moo: loem khau: nyid we'.
Nyang: gi nanu" ri pang" thoug byid: nyid wigi nanu" ri goem loem byid: nyid.
11 Aseing ri noku loem khau: nyid bang: dangain" mo, we"-
Aseing ri loem khau: nghe: nyid ge'-
nyang: gi nanu" ri pang" thoug byid: wigi nanu" ri: goem loem byid: nyid.
12 Aseing gi nanu" ri daboin: so" nyid wigi mainkaid byid: wa nghoid-
nyang: gi Israela byumyu" yi yo'
Mangso khainjung yi dangain" ri mainkaid byid: wa zi nghoid.
13 Nyang: gi nyang: ri gyoug phau" da" byu yugkhang" moo" mo nge zi gyi: zi aga-
dangain" mo, ri mainkaid byid: wa.
14 Aseing gi nang yo' re" da" amyed ashen yiri
zoo: du yi dabyid: nyid baja".
15 Mougkhung: yo' myidjang ri phain" so: to" da" Aseing gi
nanu" ri: mainkaid byid: nyid baja".
16 Mougkhung: mougdi ri Aseing za: te: seung: ci: nghoid loug we'
mougmyid yoosoo" ri koem gi xangsu: byu yiri ab byid: bye:.
17 Shid: byug bye: mo, yo' jham" dung" khe" da" joyoo khyoo: ju" vang loo" bye: bang: gi
Aseing ri yo" coung" byid: lo: boem wa anghoid.
18 Nghoid loug we' kangso' dei nyid shi" da"
nanu" koem gi akhid" mo zi apyaid atoo: moo: ju" sho'
nyang: ri jeju" boin: coung" nghei nyid boem wa zi nghoid.