COUNG" NGHEI 112
1 Aseing ri coung" byid: nyid ge'-
Aseing ri gyoug phau" lho: nyang: tid to" tarha" ri
tam" gyo: cang yhi: wa vho: ngei nyid su: gi ngilho' nyid.
2 Byugi da" nya: zoo: yigi mougmyid tho' moo:
zoug: myeing" yoem: so' yo" loo wa nghoid.
Nya: da" amyed ashen yi we' mainkaid jeju" ri
shoug" kham: yu boem wa zi nghoid.
3 Nya: da" ikoin deungkhu: byu yi we' jonu" myo: lo wigi
yoo" zoo: yoo" shoug lo boem wa nghoid.
Nyang: gi pyaid moo: too: moo myo: tham: je: be: loo wa zi nghoid.
4 Nheig se' khyeug khyoo: nheig khyeug shoo" se' myen: go" khyoo: yo'
deingmain" da" byugi yi shid re"
bidbang gi moug: coid moo: bang yi jo.
5 Nyang: gi agoin agoo" jhid" byid: wigi nya: voem: doug: khu:
moo" zoo" ri zei: so, lho: deing: byeung" nyid su: ngilho' nyid.
6 Byu gi phoo gi khanham we' soem" gyo" loo" wa zi anghoid-
nyang: ri khanham we' boin: so" nyid zi shoug wa nghoid.
7 Age da" lu dang: ri shau" gyo: ri nyang: hau: ziri agyug nghoid da-
Nya: da" loem khau: khyoo: gi geung: teung jo, lho:
nyang: gi Aseing ri loem khau: nyid.
8 Nyang: moo: myid myoo: ung: loug ziyo' gyoug dain' da" myid aboo-
nyang: gi nya: gyivoo joem da" soem" joem: lo" ziri
deing" deing nyang: shau" myang wa zi nghoid.
9 Nyang: gi ca" nyid yo nyid su: ri agoin' ayu: byid: gam nyid wigi
nya: da" nheug khyeug khyoo: gi khanham we' yoem: nu: lo" khyoo: ajo.
Nyang: gi amyeing" yoem: so' yo' phau" myang: khyoo: ri shoug" yu loo wa zi nghoid.
10 Akhyeing ashoeb bang: gi hau: khyoo: ri myang lho: nheig yo: nyid boem ago-
Nyangnu" gi ngheung" ziyo' yu" zhoug to" lho: byug khare" boem bye:.
nyangnu" da" nheug byu jang: we' apyaid atoo: moo: jha" byo, yoin" lo" boem bye:.