COUNG" NGHEI 111
Aseing ri coung" nghei nyid ge'- nga" nheigloem: dangain" yo'
nya" byumyu" yi da" mo, phung: gung moo:
ngoo gi Aseing da" jeju" ri coung" nghei nyid wa nghoid.
Aseing zei: loo bye: da" moo" zoo" joem gi khayhi' mau" pho" zi nghoid nyid lha"-
hau: moo" zoo" moo: vho: ngei nyid bang: dangain" mo, gi
hau: khyoo: ri se' yu nau nyid ago".
Nyang: koid da" khyoo: ja: khang" moo" moo zoug: myeing" yoem: so'
myonhoo: phung" yoeb yo' byeung" jo-
nya: da" deingmain" khyoo: gi byunyid xiyam: moo: dageung: teung jo,
Aseing gi nya: da" mau" pho" moo" zoo" joem ri
ngoonu" to" myhed pyam wa da" akhang" abyid.
Nyang: gi jheddab ziyo' nheug khyeug shoo" gyoo: su: nghoid nyid.
Aseing gi nyang: ri gyoug phoug" mo, ri zoo: noem byid: nyid wigi
nyang: gi nya: dang: theing khoin" ri khanham we' ato" myhid nghoid da:.
Tungbau byumyu" yi da" mougmyid- nyangnu" ri yu byid: khyo"
nyang: gi nya: byumyu" yiri zoug: myeing" yoem: so' ri toin" shed byid: nyid.
Nyang: zei: bye: da" moo" zoo" dangain" jang" moo
nyang: gi nheigloem: zung" ziyo' deingmain" su: nghoid-
nyang: tid to" da" dangsoo" khoin" joem dangain" gi loem ge" zi nghoid nyid.
Hau: da" dangsoo" khoin" joem gi byunyid xiyam: moo: dageung jo-
hau: dangsoo' khoin" joem gi jo ziyo'
deungbyeung" khyo" cang loo" ca" zi nghoid.
Nyang: gi nya: da" byumyu" ri lhoid pyoin kaid lho:
nyangnu" yo' apyaid atoo: mo dang: theing thang" cab, ri koid too" bye:.
Nyang: gi gyeung" shang: nyid ziyo' athang agoin yoem: moo" boo su: nghoid nyid.
10 Aseing ri gyoug phau" nyid khyoo: gi
ung: gyeing: phajhi" bo loo wa khyoo: nghoid-
nya: da" dang: khoin" dangain" ri tam" gyo: cang loo" mo, dangain" ri
nyang: gi deungmain" da" dang: phyed khyoo: ri byid: nyid.
Nyang: gi apyaid atoo: moo coung" nghei khyoo: ri shoug" kham: yu wa zi nghoid.