COUNG" NGHEI 109
Mangsoo we"- ngoo nang ri: coung" nghei nyid
sam" za: atam" too:
Akhyeung" bang: yo' mhau, fain" yen" bang: ri ngoo ri dab, yu zain: oung: pyam boem bye:.
Nyangnu" gi nga" da" khyoo: ri mhau tid nyid boem.
Nga" da" khyoo: ri ashoeb khyo" juang" yi dang: khoin" yo,- nyangnu" tid nyid boem wigi
ce" yooboo we' abo jang" moo ngoo ri gyi koid shoo" koid nyid boem ago".
Ngoo gi nyangnu" ri jheddab ziyo' Nyangnu" shid re" noku byid: nyid rilang"
Nyangnu" gi ngoo ri thougtheung nyid boem ashi go.
Nyangnu" gi ge da" gung khoo: moo akhyeing" ashoeb zi jheddab wa gung khoo: moo
nheing" myeing" yo' ngoo ri latoo: doem phug byid: nyid ago".
Nga" da" gyivoo pho, ri dang: phyed byid: wa shid re"
akyang yoin" da" tarha" agyi ri nyeung too" wa.
Nya: gyivoo joem da" khoug: mo dayug yug gi nyang: ri yooboo foin: su: bui" nhang: nyid we'.
Nyang: gi myid: phe: sho: zi thoung" shau" wigi
shoid vhang: yooboo ri shau" myang nyid baja"-
nya: da" akyu" mho' thui: ri lang" youg: soin: jhen: soin: goo" baja".
Nya: kangso' we' kha myhoo anghoid ri thang lo" byug baja"
Nya: moo" zoo" ri byu gooji yu pyam byid: zi shoug" baja".
Nya: zoo: yigi coug" zoo joem bue" lo" byoug wigi
nya: yhoem: seing: myhi we' cougmoo" bue" lo" byug baja".
10 Nya: zoo: yigi yhoem: ajo, da" layoin: joem bue" lo" byug goo" baja"
Nyangnu" nghe: khau: nyid da" yhoem: gang: mo wigi we'
koin" thu' pyam zi shoug" goo" baja".
11 Nya: da" jhen: seing: gi ayu eung: da" jonu" dangain" ri we' bo yu pyam byid: goo" baja".
Tungbau byumyu" yi we' nyang: koid da" moo" zoo" mo
akyu" dangain" ri bo shau" kham' zoo: goo" baja".
12 Nyang: ri nheig yu" khyeug bang: gi hang" aboo loo: baja".
Nyang: too" khare" da" coug" zoo: yiri hang" we' ayu" agoin coung: lo: boem baja".
13 Nya: amyed ashen" yi dangain" we' shid: doem: lo" byug goo" baja"
nya: myeing: ri thang: phyang" pyaid moo: aboin: soo" loo: goo" baja".
14 Aseing gi nya: phoug" nya: phyid" yi koid da"
akhyeing" ashoeb moo" ri daboin: nyid baja"
nya: myhi shoid vhang: da" yooboo joem ri we'
khanham we' akhyoid pyam byid: loo: baja".
15 Aseing gi Nyangnu" da" yooboo joem ri khanham we'
daboin: nyid: nyid baja" Nghoid loug we'
Nyangnu" nyang: bain sho' to" myhed pyam zi shoug" nyid goo" baja".
16 Byu hau: yug gi: nheig khyeug wa khyoo: ri khanham we'
amyed yu" lo: ziyo' nyang: gi asho" ajhen: bang: ri we'
ca" nyid yo nyid bang: ri we'
pang" thoug yu wa byu ayoo" lo: mo, ri we'
shen" yhen said pyam nyid abye:.
17 Nyang: gi nheing" wa ziri gye" vho: nyid nyang: nyang: ri
nheing" khoin" doem tau" zang" baja".
Nyang: gi mainkaid jeju" byid: wa ziri
ngheung" nyid yoomo hang" we' nyang: ri mainkaid byid: lo baja".
18 Nyang: gi byimi ri void ci: yhang: ti" nheing" myeing" nheing" thui: ri main main datid nyid.
Hau: da" nheing" myeing" nheing" thui: gi
gyid yhang: ti" nya: gung moo: deung vang lo" wigi
shooxu: yhang: ti" nya: shooyoug: ju" sho' deug vang loo" baja".
19 Hau: nheing" myeing" gi byimi yhang: ti" nya: gung moo: nghoeb too" baja"
phyid" cu" yhang: ti" khanham we' nya: lheing goem moo: baid yeug too" baja".
20 Aseing we" houg: yhang: te" da" akhyeing" ashoeb khyoo: yo'
nga" gei sang: nyid da" nga" gyivoo joem ri houg: khyo" yooboo byid: we'.
21 Nghoid loug we' nga" gyi: myhang: thang da" Aseing we"
nang byid: too" bye: da" dangsoo" khoin" yo' dakhyoo" ti"
ngoo ri pang" thoug yu byid: we'.
Re" da" gye" ge jheddab emyed yoomo ngoo ri khyoid yu we'.
22 Ngoo gi asho" ajhen: su: yo' ci" we' ayoo" su: nghoid nyid.
Nga" nheigloem: khoin" jhung: moo: ju" sho'
thau" kyang nho: zi ngoo shoug" nyid.
23 Myen" thang: zoo" mo bid shoem: yoeb yhang: ti"
ngoo bei: lo" koung" nyid bye:-
tung: sang" bougsid, ri yhang: ti" vi: vi: khyoo: hau, tang" lo" zi ngoo shoug" nyid.
24 Zoo: noem thang byug yoomo nga" da" poid lug yoem: nu: bye:-
ngoo gi shooyoug: moo: shooyid te: lhoem" lo: su: ti" bue" lo" byug bye:.
25 Subi" ngoo ri: myang bang: gi ngoo ri juang" yi pyam nyid boem ago".
Nyangnu" gi aphoug" akhyoid khyo" koid wigi
nyangnu" da" vhuloem pyi: shoug nyid boem ago".
26 Nga" Aseing Mangsoo we"- re" da" jhed khyeing: kang khyeing: yoomo
ngoo ri pang" yu shi" we' ngoo ri khyoid yu we'.
27 Ngoo ri: khyoid yu su: gi nang nyang: nghoid nyid ziri
nga" gyivoo joem ri si' nhang: we' o".
28 Nyangnu" gi ngoo ri nheung" lho:
jham' tang: byid: boem nghoid loug we'
nang gi ngoo ri mainkaid byid: wa zi nghoid.
Ngoo ri: re" shen" yhen pyi: sho: nyid bang: joem: loo" goo" baja"-
re" da" deizoo: ngoo koem gi gau yi ngei pyo: nyid baja".
29 Nga" gyivoo joem gi myonhoo: shoem: lo" ziyo'
goeb jo, zi shoug" goo" baja".
Nyangnu" gi asho, ashid: khyoo: ri
mi, yhang: ti" gang" ci: goo" baja".
30 Ngoo gi Aseing ri thui: moo" kaid lho:
jeju" ri coung" byid: wa zi nghoid.
Ngoo gi: nyang: ri byumyu" yi da" mo, phung: gung moo
coung" nghei nyid wa zi nghoid.
31 Khasu" wim ga: ri nyang: gi
asho" ajhen: bang: ri goem loem byid: wigi
nyang: ri said wa ga: dang: phyed byid: nyid bang: da" lo, mo
khyoid yu yoomo nghoid nyid.