COUNG" NGHEI 107
MOUGSOUG" WIM: PUG
Nyang: yoomo khyoid yu khyoo: shoug" bye: bang: dangain" mo, gi
Aseing ri jeju" boin: coung" nghei jang" moo
he: dang: ri xo loo: xo' datid nyid we'.
Nyang: gi nanu" ri nanu" da" gyivoo joem lo, mo khyoid yu bye: zi nghoid.
Nyang yoomo khyoid yu khyoo: shoug" bye: bang: dangain" mo, gi
Aseing ri jeju" boin: coung" nghei jang" moo
he: dang: ri xo loo: xo' datid nyid we'.
Nyang: gi nanu" ri nanu" da" gyivoo joem lo, mo khyoid yu bye: zi nghoid.
Nyang: gi moug: vhoem" moug: thang: bid thu bidvang
mungdain: loem khang" moo" mo nanu" ri doem shu" tau" lo abye:.
Byu dayham" gi khyoo: abo da" siyoo khoug: moo byo sain" yen" boem ziyo'
nyangnu" gi nyangnu" nyid wa da" voogung lo" khyoo: ri we'
ashu" sho: boem loo: nghoid ago".
Nyangnu" gi zooyoid gyidshed shoug" nyid boem ziyo'
nheug byu jang: dangain" ri ci: phyug pyam boem abye: go.
Houg: lang nyangnu" gi yau: khi" shoug" nyid bidnyid moo
Aseing ri mho' yoid nyid boem wigi
nyang: gi nyangnu" da" kyi" khyeug yau: khe" khyoo: mo
nyangnu" ri khyoid yu byid: bye:.
Nyang: gi nyangnu" ri nghe: khau: nyid wa joyoo khyoo:
dain: da" khyoo: khyo" shu" lo" abye:.
Nyangnu" shid re" nyang: koid shug bye: da"
mau" pho" moo" zoo" joem yo' nya: da" athang agoin jhed khyeing: kang: khyeing: yoomo
Nyangnu" gi hau: Aseing ri jeju" boin: coung" byid: boem wa nghoid.
Nyang: gi gyid shed bang: ri gyid shoin: jhoug lho:
zooyoid shoug" bang: ri ge da" zoo: noem yo' gyi: nhang:.
10 Dayham" gi moug: coid khoug: yo' shid: lo" da" moug: coid, yoeb khoug: moo nyid nyid boem.
Nyangnu" gi: joto' jangcoo" yo' tei" too" shau" da" thung: byu yi nghoid boem.
11 Khasu" wim gari nyangnu" Mangsoo byid: to" da"
athang agoin amyeing" dang: khoin" joem ri
thougtheung pyam boem lho: wigi
nya: da" jhoug" myeing jhoug" thui: joem ri: we'
alhoem: yu boem yoomo nghoid nyid ago".
12 Nyangnu" da" emyed ri yau: khi" da" moo" zoo" moo
nyang: gi doin: khyo' pyam byid: wigi
Nyangnu" leung lo" ri pang thug byu hang dayug we" aboo.
13 Houg: lang nyangnu gi yau: khi" zi shoug" nyid da" bidnyid moo
Aseing ri mho' yoid nyid boem yoomo
nyang: gi nyangnu" ri kyi" khyeug yau: khe" khyoo: mo khyoid yu abye:.
14 Nyang: gi nyangnu" ri moug: coid khoug: yo'
shid: lo" da" moug: coid yoeb, khoug: moo shu" thu' loo bye: ziyo'
Nyangnu" ri tei" to" da" joto' jangcoo" ri we' lang: phyed pyam byid: bye:.
15 Nyangnu" shid re" nyang: koid shug bye: da"
mau" pho" moo" zoo" joem yo' nya: da"
geung: teung jhed khyeing: kang: khyeing: yoomo
Nyangnu" gi hau: Aseing ri jeju" boin:
coung" nghei byid: nyid boem wa zi nghoid.
16 Nyang: gi voogung gyid: mid" khoem" moo" duang: joem ri ne, khyoeb, pyam lho: wigi
joto' khoem kyang young: joem ri adu atoem koid pyam byid: abye:.
17 Nyangnu" koid da" yooboo joem yo'
nyangnu" koid da" akhyeing" ashoeb moo" zoo" joem yoomo byu dayham" bang: gi
nheug agyeung: boem ziyo' amyen akhyoid khyoo: ri phu" zo: nyid boem bye:.
18 Nyangnu" gi zoo: noem shug phoo" rilang" anau yu" lo boem ziyo'
shid: loo" no lo" da" khoem" duang: khyoo: jhang yhe: lo" abye: go.
19 Houg: lang" Nyangnu" gi yau: khi" zi shau" da" bidnyid moo
Aseing ri mho' yoid nyid boem yoomo
Nyang: gi nyangnu" ri yau: khe" kyi" khyeug khyoo: mo khyoid yu abye:.
20 Nyang: gi: nya: da" amyeing" dang: yo'
nyangnu" ri ze: gi byid: ziyo' loeb duang: khoug: mo nyangnu" ri: xue: yu bye:.
21 Nyangnu" shid re" nyang: koid shug bye:
mau" pho" moo" zoo" yo' nya: da" geung: teung jhed khyeing: kang: khyeing: yoomo
Nyangnu" gi hau: Aseing ri jeju" boin: so" coung" nghei byid: boem wa zi nghoid.
22 Nyangnu" gi xoin" du: joem yo' nyang: ri jeju" boin: coung" nghei boem wa zi nghoid.
Gau, yi da" jikhoin" dang: yo' nyang: koid shug bye: khyoo: dangain" ri tid kyo" boem wa nghoid.
23 Byu yi dayham" bang: gi nammugdara gyid tho moo
sangphoo lhid yo' so" yen" boem wigi
panglai: gyid yi da" atho moo nyangnu" da"
voem: doug: khu: moo" zoo" ri zei: so, nyid boem ago".
24 Nyangnu" gi hau: Aseing cenoem koid bye: da" moo" zoo" joem yo'
panglai: gyid tho' moo: nyang: toin" shed bye: da"
mau" pho" moo" zoo" joem ri shau" myang nyid boem ago".
25 Nyang: amyeing" byid: kaid lang" phung" yoeb yoem" moo" zeing yo'
uglid hau being: mhoid joem doin: lhoem" to' lo.
26 Sangphoo lhid joem gi lid tho' moo: dang: to' lo" wigi
no, da" gyid thoem" thi" moo: noeb vang lo" nyid.
Hid: yhang: te" da" gyoug noem bue" loo yoomo
byu yigi nyang: nya: yoem: nu: lo" byoug bye:.
27 Nyangnu" gi yhid: yed bang: yhang: ti" apyi: afeing so' yen" ziyo'
Nyangnu" da" gye' yeug koung ga" da" phajhi' joem gi
akoem: za: danghoid boem lo: ago".
28 Houg: lang nyangnu" gi yau: khi" lo da" ayo, moo
Aseing ri mho' yoid nyid boem yoomo
nyang: gi nyangnu" ri yau: khe" kyi" khyeug khyoo: mo khyoid yu bye:.
29 Uglid moo" ri nyang: no: loo" nhang: lho:
beung: mhoid joem ri we' tam" loo" nhang:.
30 Uglid no: loo" bye: yoomo nyangnu" gau yi nyid boem ziyo'
Nyangnu" loo" nau da" gu: khuang khyoo:-
gau: nyu: khyo" Nyangnu" ri shu" vhu" loo" bye:.
31 Nyangnu" shid re" nyang: koid shug bye: da-
mau" pho" moo" zoo" joem yo'-
nya: da" geung: teung jhed khyeing: kang: khyeing: yoomo nyangnu" gi
Aseing ri jeju" shoug" coung" byid: boem wa zi nghoid.
32 Nyangnu" gi nya: da" gyi: reung: thang khyoo: ri
byumyu" yi da" mo, phung: gung moo: thoid tid kyoo" wa zi nghoid.
Vhujhung: yi da" phoung: foem: moo nyang: ri yo" coung" byid: boem wa zi nghoid.
33 Hau: Aseing gi gyid zeing joem dangain" ri: kyoug kain" loo" nhang: wigi
gyid bug joem ri jhed pyam byid: bye:.
34 Akhyeing" da" byu yi nyid da- myid, xu: yo' byeung" joyoo joem ri
xoo" mougmyid bue" lo" nhang: pyam bye:.
35 Nyang: gi midcoo: doem joem ri: gyid thoem" khyo" kyug kyiri da" mougmyid ri
gyid bug yau: lo da" mougmyid khyo" bui" nhang: bye:.
36 Nyang: gi zooyoid gyid shed nyid da" byumyu" yiri hau: joyoo moo: nyid yab nhang: lho: wigi
Nyangnu" nghe: khau: nyid wa shid re voogung ri tam: yu boem.
37 Nyangnu" gi khyam soin" koid lho: zabyid shi" joem ri sho" wigi
gug shi" meishi" ri myoo" sho' shoug" shab yu ago".
38 Nyang: gi nya: da" byumyu" yiri mainkaid byid: lho:
nyangnu" moo nya: myid: nya: zoo: yi myo: loug je: bue: lo nyid.
Hau: lho: nyang: gi nyangnu" da" gougnyhoug joem aneung: loo" baja" ga: lhoug zung" byid: nyid.
39 Nheug khyeug shoo" myen: khyoo: abo da- doin: zeig shoug" nyid ziyo'
Mangsoo byumyu" yigi yau: khe" kyi" khyeug shoug" nyid khyoo: joem yoomo
soem" joem: lo" zi shoug" nyid uri
40 nyangnu" tho' moo: doin: zeig zoo: bang: ri nyang: gi latoo: phoug lho:
nyangnu" ri khyoo: abang" da" siyoo khoug: moo: so" du: dam: yen" nhang:.
41 Nghoid loug we' nyang: gi ca" yo, nyid bang: yo'
nyangnu" da" kyi" khyeug yau: khi" da" akhoug: mo khyoid khyu: yu ziyo'
nyangnu" da" ikoin deungkhu: byu yiri
yang phung: joem ri yhang: ti" myo: loung: loo nhang:.
42 Deungbyeung" da" byu yigi hau: khyoo: joem ri myang wigi
gau yi nyid boem nghoid loug we' akhyeing ashoeb bang: dangain" ri koem gi
no: jham" loo" nhang: pyam bye:.
43 Phajhi" boo bang: gi he: moo" zo" da" akhyoo" ri myid soin: yu" nyid goo" baja".
Nyangnu" gi Aseing da" geung: teung jhed khyeing: kang khyeing: ri
myid yu" nyid goo" baja" o".