COUNG" NGHEI 106
1 Aseing ri coung" byid: we'. Nyang: gi ge lhoo su: nghoid yoomo
Aseing: ri jeju" boin: nyid we'.
Nya: da" jheddab emyed we' pyaid moo: too: moo dakhyoo" ti" dageung: teung jo.
2 Nyang koid shug bye: da" nghoid thang moo" zoo" ri hang yo" se' tid kyo" lha".
Nyang: ri moin: yi" sho' hang" yo" se coung" byid: wa lha".
3 Nya: da" amyeing" tarha" ri tam" gyo: phau" cang nyid wigi deingmain" da" moo" ri
khanham we' zei: nyid mo, gi ngilho' boem wa nghoid.
4 Aseing we"- re" da" byumyu" yiri nang pang thoug da" uri ngoo ri we' bo boin: so" nyid we'.
Nyangnu" ri nang khyoid yu da" uri ngoo ri we' bo khyoid yu we'.
5 Re" da" byumyu" yi yo" loo, de, lo khyoo:
ngoo ri we' myang nhang: we'
re" da" byumyu" yi ngeibu: khyoo: joem ri we' ngoo ri bo kham' zoo: nhang: we' o".
6 Ngoonu" da" phoug" phyid" yi yhang: ti"-
ngoonu" gi yooboo ri doem koid shoid boem bye:-
ngoonu" gi akhyeung" bang: yo' ashoeb bang: bue" nyid bye:.
7 Egutu mung" moo nghe: khau: nyid da"
ngoonu" phoug" phyid" yigi Mangso da" mau" pho" moo" zoo" joem ri ase' gyoo: nghoid ago".
Nyangnu" ri myoo" sho' lheing: nyang: toin" shed bye: da-
nya: jheddab da" emyed ri myoo" sho lheing: zheung: to" myhed pyam boem wigi
nyangnu" gi hau: athang agoin yoem moo" bo da Aseing ri lang"
hau: gyid ni thoem" mo: gyi koid boem abye:.
8 Nghoid lug we' nyang: gi nya: da"
gyi: sheung: zoug: myeing" yoem so, ri toin" shed wa shid re"
dangsoo" khoin" too" bye: ziyo' dakhyoo" ti nyangnu" ri khyoid yu bye:.
9 Nyang: gi gyid ni thoem" ri amyeing byid: kaid lang"
hau: zigi: kain" lo" byug bye:.
Hougsu" wim nyang: gi nya: da" byumyu" yiri
kyug kyiri da" midcoo: yoo khyo" shu" gu: lid loo bye:.
10 Nyang: gi nyangnu" ri ngheing" bang: da" lo, mo khyoid yu bye:.
Nyangnu" da" gyivoo joem lo, khoug: mo nyangnu" ri khyoid yu bye:.
11 Nghoid loug we' nyangnu" da" gyivoo joem gi
gyid ni thoem" moo: noeb lo" byoug boem wigi dayug we' ayo" loid lo: boem.
12 Hau: thang: ri nya: da" byumyu" yigi
nyang: to" da" dang: theing khoin" ri loem" jeung lo boem wigi
Aseing ri: jikhoin" yo' coung" nghei lo boem.
13 Nghoid loug we' nyangnu" gi nyang: koid shug bye: da" moo" zoo" joem ri
phyid" za to" myhed pyam byid: boem ziyo'
Nya: da" phajhi" byid: khyoo: ri alang" nyid loo: za: koid pyam boem bye:.
14 Siyoo khoug: moo nyangnu" vho: ngei nyid khyoo: gi byeung" jo, bye: ziyo'
Mangsoo ri ca: yu" boem abye: go.
15 Houg: yoomo nyangnu" mho' da" khyoo: nyangnu" ri khyoo, byid: bye:
nghoid loug we' nyangnu" ri gyoug pho" noo, phyoo" kyi" khyeug we' bo khyoo, byid: bye:.
16 Nyangnu" gi hau: siyoo khoug: moo
Moshe yo' Aseing da" gyeung" shang: deizoo: gi Arun ri yu" no" nyid abye: go.
17 Houg: lang" mougmyid go, fo, lo wigi Dathan ri myhau: pyam byid: bye:.
Abiram yo' nya: yhoem: byu yiri we' boid zeug said pyam bye:.
18 Nyangnu" da" thang cang mo, da atho moo myi: gyoo" lo wigi
hau: akhyeing bang: ri nge" joem: pyam bye:.
19 Nyangnu" gi Sina pa: moo sheing: nujung nu" soolhoo: koid lho:
hau: soolhoo: ri zheung: noku nyid boem.
20 Nyangnu" gi Mangso da" myonhoo: phung" yoeb ri vufu" zo: da"
gougnyhoug soolhoo: yo' thid go" pyam bye:.
21 Egutu mung" moo nya: da" mau" pho" moo" zoo" joem yo' Nyangnu" ri
khyoid yu to" da" Mangsoo ri nyangnu" to" myhed pyam boem bye:.
22 Hau: mung" moo: nyang: koid shug bye: da" moo" joem gi
khayhi' gyeing" mau" pho" ja: nghoid lha".
Gyid ni thoem" moo: nyang: koid shug bye: da"
moo" zoo" joem gi khayhang: te" da" mau" pho" ja: nghoid lha".
23 Nya: da" byumyu" yiri phyo' shoin pyam wa ga: Mangsoo tid nyid da: uri
nya: da" khyen: yu dei zoo: Moshe gi
Mangso shid, khoin" moo: to' yab lho:
nyangnu" ri amhoin' pyam baja" ga: nyang: nheigloem: nge" nyid ziri jham" loo" nhang:.
24 Houg: lang" nyangnu" gi
Mangso dangsoo" khoin" ri aloem" jeung boem loo: yoomo
ngei pyo: mung" khyoo: vang loo" wa ziri
Nyangnu" ngeug pyam boem abye: go.
25 Nyangnu" gi nyangnu" da" zoem" moo:
zheung: loung" jo, lho: nheug yo: myeung myhu" go" nyid ago".
Aseing da" amyeing" dang: ri: we' anau tam" gyoo: loo: nghoid ago".
26-27 Hougsu" nghoid yoomo Aseing gi nyangnu" ri siyoo khoug: moo
shid: thang pyam nhang: wa yoomo we' nyangnu" da" myiyi: zoo: yiri
aloem akhau: bang: da" mungdain: khyoo: shid: lo" byug nhang: wa yoomo we'
nheing" myeing" nheing" thui: yo' Nyangnu" ri sadi byid: bye:.
28 Hau: thang ri Mangso byumyu" yigi
Bala yu phara" ri Petura joyoo moo: noku nyid boem ziyo'
yu phara" shid: joem ri xoin" to' byid: da" zoo: noem ri we' zo: nyid boem bye:.
29 Nyangnu" gi nyangnu" zei: lo da" moo" zoo" joem yo'
Aseing da" nheug yo: phoin: loo nhang: khyoo: ri lhu: tau: lhu: nhung byid: nyid boem ziyo'
gyoug pho" da" noophyoo" ri nyangnu" jang" moo: bue" thu' loo nhang: nyid bye:.
30 Nghoid sho' lug we' Phineha to yab ziyo' yooboo dab, bang: said pyam byid: yoomo
hau: noobau: phyoobau: gi doem bei: lo" byug bye:.
31 Hau: Pineha koid da" akyu" ri hau: nyid" mo khanham we' damyid boin: nyid boem ziyo'
hau: ziri dapyaid yo' dapyaid moo daboin: so" nyid boem wa nghoid.
32 Byumyu" yigi:Meriba gyid bug moo Aseing ri zheung: ze" sho" ziyo'
Nyangnu" zei: thu lo da" aved asam" yoomo
Moshe we' kyi" khyeug yau: khi" zi shoug" bye:.
33 Nyangnu" gi Moshe ri kyid" kyid: khoo" sho
nheigloem: noo nhang: boem yoomo
nyang: gi: amyed yu" loo: za: atid eung: da" dang: ri tid shoid pyam bye:.
34 Nyangnu" gi tungbau byumyu" yiri said toem" pyam wa shid re"
Aseing Nyangnu" ri byid: to" da" amyeing" dang: ri acang tho' moo: agoo".
35 Tungbau byumyu" yi yo' Nyangnu" deungkhu: qei" ziyo'
Mangsoo ayoo" mo, da" asam" aved ri nyangnu" xo ci: lo boem bye:.
36 Mangso da" byumyu" yigi yu phara" soolhoo: joem ri loem khau: noku lo boem ziyo'
hau: zigi nyangnu" ri lhu: phyo' pyam da" mo" bue" loo nhang: nyid.
37 Nyangnu" gi nyangnu" da" zoo shang yiri nghe' to' byid: xoin" khyo" wigi
Khannan yu phara" soolhoo: joem ri shugbyid: nyid boem ago".
38 Nyangnu" gi ce: yooboo adab da" zooshang yiri: said boem.
Hougsu" byu said boem yoomo mungdain: ri anyhoin: athung" bui" nhang: bye:.
39 Nyangnu" zei: da" moo" zoo" joem yo' Nyangnu" ri aco' ajhoid koid pyam boem wigi
Nyangnu" gi Mangsoo moo: nheigloem: azoung" boem loo: nghoid ago".
40 Hougsu" nghoid yoomo Aseing gi
nya: byumyu" yiri nheug yoo: nau nyid wigi
Nyangnu" ri co' nheug no nyid bye:.
41 Nyang: gi nyangnu" ri byumyu" yi da"
yoem so, khoug: khyoo: ab pyam byid: wigi
Nyangnu" da" gyivoo joem gi nyangnu" ri vhoebkhang" ci: abye: go.
42 Nyangnu" gi nyangnu" da" gyivoo joem wigi
doin: zeug shen" yhen shoug" zo: nyid boem ziyo'
gyivoo joem da" lo, khoug: moo bain sho' vang lo" byoug boem bye:.
43 Aseing gi myoo" sho lheing: nya: byumyu" yiri khyoid yu nyid Nghoid loug we'
Nyangnu" gi nyang: ri gyi koid wa khyoo: za: khyen yu nyid boem yoomo
yooboo thoem" moo: daje, noeb vang lo" byoug boem ago".
44 Nghoid loug we' nyangnu" mho' yoid uri Aseing gi shoug" gyoo: byid: ziyo'
Nyangnu" da" myid myoo: ung: loug da" khyoo: ri nyang: gi boin: soo" byid: nyid.
45 Nyang: gi nyangnu" da" akyu" yoo" wa shid mo
nya: dang: theing khoin" ri boin: soo" byid: ziyo'
nya: da" gyi: thang jheddab nheigloem: yoomo
nya: yo: phoin: nyid nheigloem: ri jham" loo" nhang:.
46 Nyangnu" ri shen" yhen pyi: sho: nyid bang- dangain" mo, da"
nheigloem: ung: khoug: moo nyangnu" ri nheug yu" khyeug nyid.
47 Ngoonu" da" Aseing Mangsoo we"- ngoonu" ri khyoid yu we'
byumyu" yi da" akhoug: mo ngoonu" ri doem shu" tau" loo we'.
Hougsu" nghoid lang- re" da" gyeung" shang: myeing khyang" ri
coung" nghei lho ngoonu" nang ri jeju" boin: nyid boem wa.
48 Israela da" Mangsoo hau: Aseing ri coung" nghei nyid we'.
Nyang: ri akhid" mo zi pyaid moo: too: moo: ju" sho' coung" nghei nyid we'.
Byu yugkhang" moo" Amen ein: tid nyid we'.