COUNG" NGHEI 105
1 Aseing da" jeju" ri coung" byid: ge'-
nya: da" gyi: sheung: nghoid thang khyoo: ri tid fu" byid: nyid ge'-
nyang: zei: bye: da" moo" zoo" jid: zoo" joem byumyu" yiri tid kyoo" we'.
2 Aseing ri jikhoin" yo' coung" nghei byid: ge'-
nyang: koid shug bye: da- mau pho" moo" zoo" bain sho ri tid we'.
3 Ngoonu" ri nyang: seung: ci: yoomo gau yi nyid ge'-
nyang: ri nau loem khoug: bang- ngei pyo gau yi nyid goo" baja".
4 Pang" thug baja" ga: mho' wa shid re" Aseing jhang khyoo: yu: zeung yhi: we'.
Yaku amyed ashen yi we' Mangsoo zei: shug bye: da" alho: again joem yo'
nyang: byid: too" bye: da" tarha" dang: kho khyoo: ri boin: so" nyid we'.
5-6 Nya: dei zoo: Abraham da" amyed ashen yiri
nyang: khyen: yu bye: da" Yaku amyed ashen yi we'
Mangsoo zei shug bye: da" alhoo: again joem yo'
nyang: byid: too" bye: da" tarha" dang: kho khyoo" ri boin: so" nyid we'.
7 Aseing gi ngoonu" da" Mangsoo nghoid-
nya: amyeing" tarha" gi moug gyab, goin" bang: shid re" nghoid nyid
8 Nyang: gi nya: dang: theing khoin" ri
apyaid atoo: moo: geung: jo, nhang: wa zi nghoid-
Nya: dangsoo" khoin" gi byuyam: dakhyeung" shid re" nghoid nyid.
9 Nyang: gi Abraham yo' myid veung" theing go" to" da- dang: theing khoin' yo'
Isag ri: byid: too" bye: da- nya: dangsoo" khoin" ri geung: teung jo, nhang: wa zi nghoid.
10-11 Ngoo nang ri Khanan mung" byid: wa
hau: ziri nang shoug" deing: wa ga:
Aseing gi Yaku yo' dang: theing go" to" ziyo' dakhyoo" ti"
12 Mangso byumyu" yigi nghab, youg khyo" gi dajhi' kyeung za: nghoid.
Nyangnu" gi Khanan mung" moo tungbau being" voo khyo" danyid nyid boem
13 Nyangnu" gi damung" mo zi damung" khyoo: Khokham mungdain:
daloem: mo zi daloem khyoo: so" leung: yen" ago".
14 Nghoid loug we' Mangsoo gi
nyangnu" ri doin: zeig zoo: wa da" akhang hang" ri we' abyid: nyid nghoid da:.
Nyangnu" ri goem loem byid: lho: khokham yiri sadi byid: to".
15 Hau: sadi byid: da" dang: joem gi
ngoo khyen: nyheung to" da" dei zoo: yiri anoo, nhang: goo"-
nga" lapi: yiri azang" thung" goo" ga: wigi tid to".
16 Aseing gi nyangnu" da" mungdain: moo zooyoid, phang khoug gyoo" nhang: lho: wigi
nyangnu da" zoo: noem dangain" ri shoem" shoung: pyam byid:.
17 Nghoid loug we' nyang: gi join, khyo" oung: pyam shau" da" Yoseb ga: da" byu dayug ri
Nyangnu" da" shid khyoo: nhang: kaid abye:.
18 Nya: khyid: ri myeug tei" to" zi shau" wigi nya: leung zeung: moo: we'
joto' jangcoo" yo' tei" to" zi shoug" khyoo: ri
19 Nyang: tid to" da" Lapi: dang- joeb byeung" lo da" ayo, ju" sho'
Hau: nyid" ri Aseing da" mungdang: gi
nya: da" deingmain" khyoo: ri thang" cab toin" shed nyid.
20 Hau: uri Egutu khokham phoo gi nyang: ri phoid: kaid.
Byumyu" bain sho' mo, da" zoug: phoo gi nyang: ri lhoid pyoin kaid bye:.
21 Khokham phoo gi nya: da" mungdain: vhoebkhang" da"
moo" zoo" moo shu" vhu" shi: wa shid re"
nyang: ri soin nyheung to" ziyo' mungdain: goin" jang moo:
vhoeb khang wa da" zoug nyang: ri bui" nhang: bye: zi nghoid yoomo
22 nyang: gi khokham pho da" vhoebkhang" zoug: yi da" atho moo: we'
Nya: da" phajhi" byid: da" zoug: ludaid yiri
jhau" byid: mho' byid: wa da" akhang" we' nyang: yo" kham: yu abye:.
23 Hau: thang ri Yaku gi Egutu mung" khyoo: gyoo" lo" lho:
hau: mung" moo: jha" yhe: nyid.
24 Aseing gi nya: da" byumyu" yiri amyed ashen yi myoo" sho' khu: myhu: loo nhang: wigi
Nyangnu" da" gyivoo joem tho' moo yoem: je" wigi bo loo nhang: nyid.
25 Nyang: gi Egutu byu yiri nya: da" byumyu" yiri ngheing" nhang: lho:
nya: da" dei zoo: yi tho' moo mhau, pyeug shen" yhen da" moo" ri ze" bui" nyid nhang: wa bye:.
26 Hau: thang: ri nyang: khyen: yu lho: nyheung soin' too" bye: da
Nya: dei zoo: tang- Moshe yo' Arun ri nyang: nhang: kaid bye:.
27 Nyangnu" gi Mangso phung" yoeb yoem: so' bo da- moo" zoo" joem yo'
alhoo: again aja: ja: ri Egutu mung" moo: toin" shed abye: go.
28 Mangsoo gi hau: mungdain: da" atho' moo
moug: ri coid loo nhang: nghoid loug we'
Egutu byu yigi nya: amyeing tarha" dang: ri atam" gyoo: nghoid ago".
29 Nyang: gi nyangnu" mo gyid zeing lang ri
suid" lang bue" loo nhang: wigi
hougmoo: nyid da" wimdo, dangain" ri shid: loo" nhang: pyam.
30 Nyangnu" da" mungdain: moo poo" yo' za: byeung" jo, wigi
khokham khoo" khoug: moo: ju" sho'
poo" yo' za: byeung" shoin: lo.
31 Mangso amyeing" yo' dakhyoo" ti" mho' yo' yang: khung" joem gi
mungdain: goin" jang" moo: neung" ug lo.
32 Nyang: gi nyangnu" da" mungdain: moo moug: voo wa
gungthid leug voo yo' moug lhab' ri myeug nhang: kaid.
33 Nyang: gi zabyid nei yo' lafoem khyam: ri lhu: phyo' pyam byid: lho:
mungdain: goin" jang" mo seiggam joem ri youg khyau" mhoin' pyam byid.
34 Nyang: nhang: kaid ziyo' moin moin sen sen atho' nghab da-
myo: tham: jhenkhyeug nyoug joem ju" lo nyid abye:.
35 Houg: bang: gi mungdain: goin" jang" mo seig nyug dangain" ri
zo: pyam lo ziyo' gug shi" shivoo shiloem dangain" ri we' myhau: pyam byid: boem abye: go.
36 Egutu mung" moo yhoem: ikoin deungkhu: khang" moo" mo
zooshid" yug gi nu" dangain" ri said pyam byid: abye:.
37 Hau: thang: ri nyang: gi Israela byumyu" yiri
shu" phang: thu lo wigi nyangnu" gi ngei sheing: joem ri we'
tho phang: lo" boem- nyangnu" dangain" bang: gi
yang" zain" ziyo' yoem vhoo" byeung boem ago".
38 Egutu byu yigi nyangnu" ri gyoug nyid boem ziyo'
Nyangnu" phang thu lo" boem uri gau yi nyid boem
39 Mangsoo gi nya: byumyu" yi da" atho' moo jhoemmoug" nghoeb too" byid: wigi
myen" ri gi nyangnu" ri myi: thoin" byid: nyid.
40 Nyangnu" gi zheung: mho' nyid ziyo' dakhyoo" ti" ngho' tu' joem ri khyo' kaid byid-
Nyangnu" nheugdeug sho' shoug" zo boem wa shid mo
mougkhung: mo zoo: noem nyangnu" ri: khyoo, byid: nyid.
41 Nyang: gi lug moo" boem ri phang kaid wigi
gyid doid dang: thu lo lho: kyug kyiri jang" moo
gyid moo" dalang yhang: ti" yau, nyid.
42 Nyang: gi nya: dei zoo: Abraham yo' too" go" da-
gyeung" shang: da" dang: theing khoin" ri boin: so" nyid.
43 Houg: yoomo nyang: gi khyen: yu shau" da"
nya: byumyu" yiri shu" phang: thu lo wigi
Nyangnu" gi gau yi ngei pyo: nyho phau: ziyo'
jikhoin" thu: yo' coung" nghei nyid boem.
44 Nyang: gi subi" gooje da" mougmyid ri nyangnu" ri byid: lho:
nyangnu" gi subi" gooje da" khyam: yoothung joem ri shoug" seung: nyid boem bye:.
45 Hougsu" koid da" khyoo: gi nya: da" byumyu" yiri nya: da" tarha" gyoo: lho:
nya: da" amyeing" tarha" dangain" ziri yo" cang pyeung goo" wa shid re" nghoid.
Aseing ri coung" nghei nyid ge' o".