COUNG" NGHEI 102
O" Aseing we" nga" akyu" mho' dang: ri tam" gyoo: byid: we'
pang" thoug byid: wa shid re" ngoo ngau yoid thui: ri tam" gyoo: byid: we'.
Ngoo yau: khe" kyi" khyeug zi shoug" nyid uri
nga" jang" mo vi: khyoo: alheung: loo-
ngoo mho' yoid uri: ngoo ri tam" gyoo: byid: lho: wigi myab myab, pang" yu we'.
Nga" da" kangso' gi myikhoug" vhu" su" bei: lo" byoug wigi
Nga" gung du: we' myi: yhang: ti" nge" nyid.
Ngoo gi vu" fu" kyug ri yhang: ti" nang: zeug ci: zi shoug" nyid wigi
zoo: noem ri: zoo: nau myid lang" aboo loo.
Ngoo gi gye" nyang:- nookyeing" dakyeung" nyid lo- ngoo gi shooyoug: yo'
shooyid mo jain" lho: ci" we' aboo loo.
Ngoo gi: siyoo mo kyang: da" ngho' dadu: yo' byo, yoin: she: pyam, too" bye: da"
khung" boeb, yhang: ti" za danghoid.
Ngoo gi ayo" yhoeb yoomo yhoemkhung: phoug tho' moo: zhoung: jo, da-
ngho' fang: khung" boeb ti" ngoo bue" nyid.
Nga" gyivoo joem dangain" mo, gi danyid goin" ngoo ri juang" yi nyid boem bye:
nya nu" gi nga" myeing ri lang: lho: nheing" nyid ago".
9-10 Khasu" wim gari re" da" nheing yo: ziyo'
nheig kho" yo: khyoo: yoomo myiyab gi nga" zoo: noem bue" nyid.
Nga" shug noem gi nga" ngoug byid gyid yo' lheug shoug nyid.
Nang gi: ngoo ri koid: lang: tu: kaid lho: vi: khyoo: du" lhei" pyam bye:.
11 Nga" da" kangso' gi bidvang zoo" mo bid shoem: yoeb, yhang: ti" nghoid nyid wigi
ngoo gi kyoug byoug da" vufu" yoo yo' dadu jo, lo.
12 Nghoid loug we' Aseing we"- nang gi khanham we'
dageung: teung jo, da" khokham nghoid nyid wigi
byu nyid xe: yam: khang" moo" mo mo, gi
nang ri daboin: so" nyid boem wa zi nghoid.
13 Nang to' lo wigi Ziun ri nheug khyeug wa zi nghoid- nyang: ri
nheug khyeug wa ayo, ju" lo nyid bye:-
hau: ayo, gi akhid" nyang: nghoid nyid bye:.
14 Nyang: gi byo, yoin" lo' zi shoug" nyid nghoid loug we'
re" da" dei zoo: yigi nyang: ri jheddab nyid.
Nyang: gi byo, yoin" jo, nghoid loug we'
nyangnu" gi nyang: ri nheug khyeug shoo" myen: myid bo nyid boem.
15 Byumyu" yigi Aseing ri gyoug phau" myang: lo boem wa.
Mougmyid mo khokham yi dangain" gi
Nya: da" yoem moo" ri gyoug phau" myang: lo boem wa nghoid.
16 Aseing gi Ziun ri: doem' so, koid to" uri nyang: gi: nya: da-
gyi: sheung: phung" yoeb ri pang shug wa zi nghoid.
17 Nyang: gi she: pyam, to" zi shoug" nyid da-
nya: mung" byu yi da" thui: ri shau" gyo: ziyo'
Nyangnu" da" akyu" mho' thui: ri gyoo: byid: wa zi nghoid.
18 Thang: pyaid myid: yam: zo: xeig bang: shid re"
Aseing zei: loo bye: da" moo: zoo" ri lhid" xoem" too" we'.
Hougsu" nghoid lang" gi akhid" akhu: ri" shi" mo, we'
re" shoug" coung" nghei lo boem wa zi nghoid.
19 Hau: Aseing gi myhang: thang da" nya: gyeung" shang: joyoo mo wigi goeb yu" nyid.
Nyang: gi mougkhung: mo myid jang: khyoo: goeb, yu" nyid.
20 Nyang: gi thung: lung" mo, da-
nookyeing" thui: ri shau" gyo: wigi said wa shid re"
dang: phyed too" shoug" bang: ri loid byoin loo" nhang: nyid.
21 Nya: myeing khyang" ri Ziun mo tid kyo" boem wa nghoid-
nyang: gi Yerusalem mo coung" nghei byid: ziri shoug" kham: yu wa zi nghoid.
22 Houg: lang" byumyu" ja: khang" moo" yo'
mungdain: yi dage" zeung: re" boem lho:
Aseing ri noku loem khau: boem wa nghoid.
23 Hau: Aseing gi ngoo ri ngi shi" ayo, mo wigi yoem neung: loo" nhang: bye:-
nyang: gi nga" da" kang: so' ri: leung" loo" nhang: bye:.
24 O" Mangsoo we"- ngoo amang: loo" shi" ri nga" kangso' ri ayoeb yu byid: shi.
nang gi apyaid atoo: moo: dadei nyid su: nghoid.
25 Nang gi goonham gooco' ri mougmyid yoosoo" ri phain to" lho:
re" da" lo, wigi mougkhung: mougdi ri nanya: lo, wigi koid too" bye:.
26 Houg: bang: gi byoug shang loo" Nghoid loug we' nang gi dageung: jo
Houg: bang: dangain" gi byimi joid yhang: ti"
axoug" bue" lo" wigi byimi ri yhang: ti" nang hau: ziri thid pyam lho:
bei: shoem: lo" byoug boem wa zi za: nghoid.
27 Nghoid loug we' nang koem gi dageung: teung nyid wigi
re" da" apyaid gi khanham we' thang ga: zi ajo.
28 Ngoonu" da" amyed ashen yigi
goug: goug: nyu: nyu: za: yo" nyid boem wa ziyo'
nyangnu" da" amyed ashen yigi re" goem loem da" khoug: moo
gau: nyu: nyid boem wa zi nghoid.