6
Nga" zoo: we"- nang gi byu goo" yug da" jhen: kham" voin wa shid re" dangsoo" too" bye: la". Nang rigi nanya: dang: khoin" wigi myeug to" zi shoug" lho:- nanya: dangsoo" khoin" moo: myi" jo, bye: la". Nghoid bye: nga" zoo: we"- nang gi hau: yug da" lo, khoug: moo: ju" jo, bye:- nghoid loug we' houg: mo yo" loid byoin loo" wa da" khyoo: gi hid: su" nghoid- nya: jhang khyoo: myab myab, yhe: lho: nang ri lhoid pyoin kaid wa shid mo mho' we'. Nanya: gung ri ayhoeb jo, nhang:- no: yu wa ein: lang" atheung: nyid. Shoo" beug su: da" lo, moo phang: loid lo" da" xaid yhang: ti" tei" mo loid lo" da" ngho' yhang: ti" phang: loid loo" we'.
Byu nei" yigi layed joem da" akhyoo" again ri jhau" yu wa shid re" ge nyid. Nyangnu" moo: gi amyeing" byid: su- shu" vhu" shi: su- vhoebkhang" su: ein: zi aboo. Nghoid loug we' lung yo, mo zoo: noem ri sho: young: to" lho:- ngam" yo, shid re" zoo: noem ri jen" jen" nyheung to" ago". Nei" nyid su: we"- kha: yo, ju" sho' yhoeb yoo moo: leung jo, wa lha". Nyang: gi kha: yo, ri to' loo zi nghoid abe. 10 Nyang: gi?Ngoo daso, yhoeb jo, shi" wa lo, loem: ci: lho: daso, no: yu shi" wa? ga: tid nyid. 11 Nghoid loug we' nyang: yhoeb jo, shi" uri sho" jhen: khyoo: gi sham: lham: ci: da" khyangtoug: joem yhang: ti"- nyang: ri khaid zain: loo wa.
12 Ce" phoug" we' adab, da" akhyeung" byu yigi mhau, dang: tid lam" yen" ago". 13 Nyangnu" gi nang ri mhau, jhu phyo wa shid re" myo, myeig myeug lho: aved tu shoug nyid ago". 14 Nyangnu" da" agyeung: nheigloem: joem moo akhyeung" khyoo: za: myid soin: yu" wigi yau: khe" kyi" khyeug khyoo: za: joyoo loem: khang" moo" moo: lhu: thu' nyid ago". 15 He: da" khyoo: joem yoomo yau: khi" shid: gyoin, joem gi nyangnu" ri atid poin" loo: za: ju" tain" lo wigi shid: moin: da" dam, gi nyangnu" shoug" wa zi nghoid bye:. 16-19 Aseing gi avhoo: angei ziyo' ayo" kham' zeung: khyoo: nyhed ja: bo. Hau: khyoo: joem gi Nghoid boin: da" myonhoo: aved Mhau' fain" da" yhoo:- yooboo adab, su: ri said pyam da" lo, Akhyeung" da" khyoo: ri myid soin" yu" nyid da" nheigloem:- Ashoeb da" moo" zei: wa ga: hain: nyid da" khyid:- mhau, fain' dang: dakhoin" thang: moo: dakhoin" tid lho: sagse: kham nyid su: yo' Zoem" khau: byencang" yi da" agyoo: moo yau: khe" kyi" khyeug joem ri lhu: pau: thu' nyid su: nghoid.
20 Nga" zoo: we"-Aphoo, tid da" dang: dangain" ri cang zei: we' Re" myhi' tid da" jhoug" myeing" ri we' khanham we' ato" myhed pyam. 21 Nga" tang: da" jhoug" myeing" jhoug" thui: ri khanham we' nang yo' dage"-Re" nheigloem: emyed moo: daxoem ci: we'. 22 Nang gyung: so" lo" da" bidnyid moo Nya: tang: da" jhoug" myeing" gi nang ri khyoo: toin" shed wa zi nghoid. Myen" ayo, moo: nang ri lhoug zung" lho: nyid" ayo, moo: nang ri phajhi" byid: loo wa nghoid. 23 Nyang: tang: da" khyoo: shed dang: joem gi bang da" bidbang nghoid- nyang: tang: da" tid nyheung tid feung khyoo: joem gi nang khasu" nyid yab yhe: loo" wa khyoo" ri jhau" byid: nyid. 24 Hau: zigi nang ri age da" myiyi: yi yo"- sube" yhoem: seing: myhi' wigi mhe, lo da" dang: mo, nang ri yo" goem coung: yu nyid. 25 Nyangnu" da" young" ziri ayu" ngei nyid nyangnu" da" mhau, mhoid" langi: koid myojid" moo: ayhe: myi" nyid. 26 Yuggi dayug gi zooyho, dakhe' da" aphoug" yo' shava myiyi: dayug ri yo" ngho" yu nghoid loug we' myi: lhoid su: gi nyang: yo" da" ziyoo dangain" youg: shoug" khyau" pyam ca" wa nghoid.
27 Nang gi re" da" mi, byi: ange" loo" sho' re" da" yang gang tho' moo: myizoo" yo" ke" ci: wa la". 28 Re" da" khyid: ange" loo" sho' nge" gyeung" da" myigyu: boem tho' moo nang yo" nang: so" loo" wa la". 29 Hau: da" moo" ri zei: su: gi sube" nya: myi: yo' yhoeb su: we' Hougsu" te" da" gyoug pho" su: nghoid. Hau: moo" ri zei: mo, hang" we' yau: khe" kyi" khyeug khyoo: thoung" shoug" wa zi nghoid. 30 Khausu gi zooyoid yoomo zoo: noem khoug" zo: ri subi" gi nyang: ri yu" co' pyam wa zi anghoid. 31 Nghoid loug we' nyang: ri shoug" myang nghoid rigi nyhed boem za: lang" aga"- nyang: doem shoug" khyoug" wa zi nghoid nyang: yo" da" ziyoo dangain" we' shoug" xab, byid: pyam ca" wa nghoid. 32 Nghoid loug we' sube" myi: lhoid su: koem gi nheig agyeing: loo: nyang: gi nya: gung du: ri nyang: za: dalhu: phyo' pyam nyid. 33 Nyang: gi asho' ashid: zi shau" wigi youg baid zi we' shoug" wa. Nyang: gi khanham we' myonhoo: shoem: zi shoug" nyid wa. 34 Yhoem: seing: phoo gi nyang: yu" no" nheigloem: no tho' moo gyi" sho' da" nheig khoo" yoo: nau khyoo: gi ajo, loo. Nyang: latoo: phoug da" dam, gi thang ga: zi ajo. 35 Nyang: gi ce" aphoug" we' lhoem: yu wa zi anghoid- nya: da" nheig yo: khyoo: gi ce" jhungshug joem yo" we' nheig shid nhang: wa zi anghoid.