31
1 He: khyoo: gi Khokham Lemuela da" nya: myhi' khyo" wigi nyang: ri tid kyo" da" phoug" dab, phajhi" dang: joem nghoid.
2 Nang ri ngoo akyu" mho' lho: yo" yu da" nga" zoo: nghoid lhe"- nang ri ngoo khasu" tid kyoo" wa la".
3 Re" da" yoem: vhoo" dangain" ri myiyi: yo' zoem" go" jang" moo: aci: pyam- re" ngei zi dangain" we' myiyi: yi, moo: za: ayhoung: pyam. Nyangnu" gi Khokham yiri lang" yo" lhu: phyo' shoin' pyam abye: go.
4 Lemuela we" tam" gyoo: we' khokham yigi zabyid yhid: ri shug agi- anghoid lang" yhid: ri age shug.
5 Nyangnu" gi yhid" shug lang" tarha" ri to" myhed pyam, lho: sho" jhen: bang: yo" yu moin: da" khyoo: joem ri yu" khyo' pyam byid.
6 Yhid: ein: zigi shid: lo" nyid mo. shid re" koug shu: nyid mo, shid re" nghoid nyid.
7 Nyangnu" gi yhid: shoug lho: wigi nyang: nya: sho" jhen: khyoo: yo' myid myo: khyoo: ri to" myhed pyam, goo" baja".
8 ?Nyang: nya: myhen: shang: ayo" tid yu mo, shid re" bo tid byid: wa pang" thoug yu wa byu ayoo" mo, shid re" yoo" moin: da" akho, akhang" ri bo yu" nyheung byid: wa.
9 Nyangnu" shid re" bo tid byid: lho: deingmain" da" tarha" agyi bui" byid: nyid we'. Myung sho" lho: ca" yo, nyid bang: ri goem, loem byid: nyid we'.
10 Loem, khau: da" yhoem: seing: myhi' dayug shoug" yu wa zi khayhi' yau: nyid lha". Nyang: gi lug nyau, tho' moo: je" phoug" dab.
11 Nya: yhoem: seing: phoo gi nya: atho' moo myid loem' myid khau: nghe: nyid lho: khanham we' amyoung shoo" wa.
12 Nyang: dei nyid da" bidnyid bain sho' moo yhoem: seing: pho, shid re" age khyoo: khanham we' akoid- ge ziza: dakoid byid.
13 Nyang: gi soug" khyeing: yo' zin: yung" khyeing: wigi yo, gain: yo, lho: moo" zei: khang nyid.
14 Nyang: gi phaga gyid sangphoo bi" yhang: ti" vi: mo zoo: noem, ri yhoem: khyoo: ci: lo nyid.
15 Nyang: gi moug: aboo" shi" ri yhoeb to' lho: yhoem: byu yi zoo: wa shug wa zoo: noem ri nyheung soin' byid: nyid. Dei zoo: myiyi: nu" yiri moo" pyoo: byid: nyid.
16 Mougmyid ri cang yu" lho: qei, yu nyid" da- nyang: shoug" sho: yo" da" ngei yo' zabyid khyam: ri sho" to".
17 Nyang: gi moo" gye" khang lho: wigi yoem: bo, ziyo' khyid: lo, zhang" yang nyid.
18 Nyang: gi nyang: koid da" lo, moo" gu, aphoug" ri si' yoomo moug: gye" coid sho' moo" khang nyid.
19 Nyang: nya: khyeing: thei" lho: nyang: nya: da" byimi, ri yo, yu da:.
20 Nyang: gi myoung sho" lho: ca" yo, nyid mo, ri acen" loo za: gam, zhoo" gam, jhoug nyid.
21 Nya: yhoem: byu yigi loem nyu: da" byimi, shoug" void: wigi gyu: khyo' lo rilang" agyug loo: nghoid ago".
22 Nyang: gi phyang" myhu" myhu" to" lho: khalham" void zin: yung" byimi gi ri void ci.
23 Nya: yhoem: seing: phoo gi myeing gyi: lho: mung" byu yiri shu" vhu" she: nyid da- byuzeing dayug nghoid nyid.
24 Nyang: gi byimi, yo' phyid" cu" ri yo, wigi phaga: byu yiri ung" byid: nyid.
25 Nyang: gi yoem: bo wigi sube" ze phau" myang: zi shoug" lho: ju" loo wa da" ayo, shid re" ce" gung ayoug loo: nghoid da:.
26 Nyang: gi nu" nham' tung"- ung: yeig phajhi" dang: se' sang: nyid.
27 Nyang: gi khanham we' moo" khang nyid lho: wigi nya: yhoem: byu yi ca" da" ja: ri yu" coung: byid: nyid.
28 Nya: zoo: yigi: nyang: ri phoug" tab dang: sang: lho: nya: yhoem: seing: phoo gi nyang: ri coung" byid: nyid.
29 Myiyi: myoo" sho' bang: gi ge da" myhi' zeing yi nghoid ago- nghoid loug we' nang gi nyangnu" dangain" bang: tho' re" je" ge thang ga: tid nyid boem.
30 Yu" young" lamyhu: gi mhau, fain" da" khyoo: nghoid wigi gung du: young" zigi byo, yoin" loo" se' nyid. Aseing ri phoug" tab ngi: byid: nyid su: koem gi coung" nghei byid: wa zi moin: yi" nyid.
31 Nyang: zei: nyid da" moo" zoo" dangain" mo aphoug" nyang: ri byid: ge'. Nyang: rigi yugkhang" mo" wigi phau" myang: ziri shoug" kham: yu wa moin: yi" nyid.