1 Nga" zoo: we"- ngoo nang ri tid kyo" da" dang: ri ato" myhid- nang cang zei: loo" wa shid re" ngoo akhyoo" shed to" dang: ri:-khanham we' daboin: so" nyid we'. 2 Nga" da" jhoug" myeing" gi nang ri kang: sheing: nhang: lho: nyid gi nyid de, loo nhang: wa zi nghoid. 3 Loem, ge" ziyo' jhug zoug da" nheigloem: ri khanham we' ashe: pyam. Hau: ziri re" da" leung zeung: moo" void ci: wigi re" da" nheigloem: khoug: moo: lhed" too" we'. 4 He: khyoo: moo: nang cang lo" nghoid rigi Mangsoo yo' xangsu: byu yi we' nang ri vho: ngei boem wa zi nghoid.

5 Re" da" nheigloem: emyed bain sho' yo' Aseing ri loem khau: nyid we'. Nanyang: si, boin: da" khyoo: moo khanham we' anghe: khau: nyid. 6 Nang koid da" khyoo: khaid gu: khang" moo" moo hau: Aseing ri boin: so" nyid we' hougsu" nghoid lang" nyang: gi deingmain" da" khyoo: nang ri toin" shed byid: wa nghoid. 7 Nang se' da" azhang mo jain" lho: phajhi" gye" se' yhang: ti" akoid. Aseing ri sam" dab, tung" tam" gyo: nyid zoore shoid vhang: da" moo" ri azei: wa shid re" ngeug pyam nyid we'. 8 Nang hougsu" yo" koid nghoid rigi nang moo: khe" no nyid da" noodam ri myenjham" loo" nhang: lho: dam noo joem ri ze: ge da" macid" zeing ti" nghoid wa. 9 Re" da" mougmyid mo thu' lo da- shivoo: shiloem dangain" jang" mo ge thang ja: yo' ngei" to' byid: khyo" wigi Aseing ri phoug" tab, ngi: byid: we'. 10 Nang hougsu" cang zei: pyeung nghoid rigi re" da" gug jhi: joem moo: gug zoo byeung" lo lho: re" da" jhi: moo: a oung: kaid loo: sho' myo: tham: da" zabyid yhid: joem ri yo" shoug" yu wa nghoid.

11 Nga" zoo: we"- nang ri Aseing tid poin" uri hau: ziri goolhoo: gyo: xoem" yu wigi ato" myhid loo: kham: yu, ci: we'. 12 Nya: phoo gi nyang: jheddab da" zooshang: ri jhau" mho' nyid ziyo' dakhyoo" ti"- Aseing gi nyang: jheddab bang: ri jhau" mho' nyid. 13 Phajhi" se' lho: wigi se' gyo: khyoo: ri yo" yu su: gi ngilho' nyid. 14 Hau: da" atu" amyaid, gi ngei atu" amyaid tho' moo: je, phau" ziyo' houg: gi re" shid mo sheung: tho' re" je phau" nyid. 15 Phajhi" juyhi: gi lug nyau tho' moo: je phoug" dab, nyid ziyo' hau: zigi nang vho: ja: ce" noem yo" we' ayo" tu, goo" nghoid da:. 16 Phajhi" juyhi: gi nang ri kang: sheing: nhang: ziyo' dakhyoo" ti"- jonu" yo' myonhoo: ngilang: ri we' shoug" kham: yu nhang: nyid. 17 Phajhi" juyhi: gi re" da" kangso' dei khyoo: moo ngei pyoo: nhang: nyid ziyo' hau: khyoo: moo: nang ri goem loem byid: lho: shu" yhe: lo" nyid. 18 Hau: da" phajhi" ri si' bang: gi ngei pyo: boem wa phajhi" juyhi: gi nyangnu" ri kangso' dei nyid nhang: wa nghoid. 19 Aseing gi nya: da" phajhi" yo'- mougmyid yoosoo" ri phain" so: to" wigi nya: da" lasi laleug yo' wigi mougkhung: mougdi ri nyheung koid too" bye:. 20 Nya: da" phajhi" juyhi: yo' gyid moo" lang joem ri shau, kaid lho: mougmyid tho' moo: jhoem" moug" mo moug: ri voo nhang: nyid.

21 Nga" zoo: we"- re" da" phajhi" juyhi: yo' nheigloem: phajhi" ri khanham we' dakaid ci: nau nyid we'- hau: ziri re" jang" mo khanham we' athu, loo" nhang:. 22 Hau: zigi nang ri khanham we' ngei pyo: ziyo' gau, yi da" kangso' khyoo: moo pang" thoug byid: nyid wa zi nghoid. 23 Re" da" khyoo: moo: nang gau: nyu: ziyo' yo" so" lo" wigi re" khyid: vhu" khanham we' thung" wa zi anghoid. 24 Nang yhoeb joyoo khyoo: vang lo" ri gyoug ci' ca" wa zi anghoid. Myen goin" su- nang ngei pyo: ziyo' yo" yhoeb jo, wa zi nghoid. 25 Akhyeing" ashoeb bang: da" atho' moo: gi uglid moo" hau, lid lo" yhang: ti"- dalheing: dam nyid dain, tung"- shid: gyoin' ju" lo ziri nang agyug noo". 26 Aseing gi nang ri goug: nyu: tung" lhoug zung" byid: wa zi nghoid. Nyang: gi nang ri lhid moo: myi" nhang: wa zi anghoid.

27 Ge da" moo" ri zei: wa shid mo ca" yo nyid bang: shid re" ge bue" da" ayo, khang" moo" moo nang dazei: byid: nyid we'. 28 Re" da" yhoem: kyoo" cang" ri akhid" nyang: nang yo" pang" thoug zi nghoid nyid ri nab kyoo' ju" sho' lang" nhang: ja: nang khanham we' akoid. 29 Re" da" yhoem: kyoo" cang" ri noo nhang: ja- ce: noem we' akoid. Nyang: gi re" da" anam, moo: nyid nyid wigi nang ri nghe: khau: nyid su: nghoid. 30 Nang ri khanham we' ci: anoo nhang: yu" su: ri ce: yooboo we' abo da" jang" moo ngeug phyen: go" zi ayhe: koid. 31 Athoug" akhyoug: koid nyid bang: ri nang ayu" no" nyid nyangnu" koid nyid yhang: ti" nang abo koid. 32 Khasu" wim gari Aseing gi akhyeing" ashoeb, da" moo" zei: mo, ri ngheung" nyid. Nghoid loug we' deingmain" da" byu yiri gi nyang: myid vho: nyid. 33 Aseing gi akhyeing" bang: da" yhoem: ikoin deungkhu: ri nheing" khoin" kaid wigi deingmain" bang: da" yhoem: ikoin deungkhu: ri koem gi mainkaid jeju" byid: nyid. 34 Nheigloem: myhang: lho: nghoid boin: wigi juang" yi nyid mo, ri nyang: gi juang" pyam nghoid loug we' khyo' nyhoem: se' da" byu yiri koem gi jeju" koid byid: nyid. 35 Phajhi" bo da" byu yigi myeing fu" da" myo, nhoo: ngilang: ri shoug" kham: yu nyid boem nghoid loug we' nheig agyeung: da" byu yi loem gi nyangnu" da" asho, ashid: moo" ri je" wigi myo: lo nyid nhang: boem.