1 Nga" zoo: we" ngoo nang ri jhau" byid: da" dang: khoin" yo' nang ri ngoo tid da" khyoo: ri khanham we' ato" myhed pyam. 2 Phajhi" boo da" dang: ri tam" gyo: nyid wigi hau: ziri se' gyo: phoid yu wa shid re" yoem: kaid nyid we'. 3 Nghoid bye: lasi phajhi" ri nang mho' wigi se' gyo: yu da" lasi phajhi" ri nang myid yu" we'. 4 Ngei, yo' yhoem" to" da" jonu" ziyoo: joem ri:-nang yoem: kaid cang sho: yen" ziyo' dakhyoo" ti" phajhi" ri we' hougsu" cang sho: yu we'. 5 Hougsu" nghoid lang" gi:-hau: zigi Aseing ri gyoug phau" myang: ein: da"-akhyoo" ri nang se' lo wigi Mangso khyoo: jhau" yu jang" moo: nang oung: doid wa zi nghoid. 6 Phajhi" juyhi: ri byid: nyid zigi Aseing nghoid wigi lasi laleug yo' se' gyo: jhang: yu da- lasi gi nya: jang" mo yo" yu nyid. 7 Nyang: gi deingmain" ziyo' nheigloem dain: bang: shid re" pang" thoug ziyo' goem loem khyoo: byid: nyid su: nghoid. 8 Nyang: gi gootu: byumyu" yiri deingmain" khyo" zoem" khoug: bang: ri lhoug zung" byid: nyid wigi nyang: moo: nheig tei too" bang: ri goem loem byid: nyid.

9 Nang ngoo tid da" dang: ri tam" gyo: nghoid rigi deingmain" da" khyo" tarha" dang: phyed da: khyoo: yo' ge da" nyeung veung" khyoo: ja: khang" moo" ri nang yo" se' loo wa zi nghoid. 10 Nang gi phajhi" si' su: bue" lo wigi re" da" lasi laleug gi nang ri gau yi ngei pyo: loo nhang: wa zi nghoid. 11 Re" da" nheigloem: phajhi" yo' se' gyo: phoid yu da" lasi gi nang ri myid pyo: vho: ngei khyoo: ri yo" byid: loo wa zi nghoid. 12 Hau: zigi shoid vhang: da" moo" ri zei: jang" mo toem xeing yu wa zi nghoid. Hau: tho' moo: gootu: nyangnu" tid da" dang: khyo" yau: khe" kyi" khyeug da" khyoo: ri lhu: tau: lhu: zhuang" byid: nyid da- byu yi yo' we: gang: loo" nhang: nyid. 13 Deingmain" da" kangso' khyoo: rigi she: pyam, kho' lho: wigi yooboo moug: coid khoug: moo: nyid da" byu yigi 14 Shoid vhang: da" moo" ri vho: ngei nyid boem ziyo' ce" akhyoo" we' abo da" akhyeing" ashoeb, moo" zoo" moo gau, yi nyid da" byu yi yo' 15 Loem, age" bang: da" lo' khoug: mo wigi nang ri khyoid yu wa zi nghoid.

16 Akyang" byo, ziyo' noid young" dang: tid khyo" nang ri mhoid" yu wa shid re" yoem: kaid lo da" myiyi: jang" mo nghoid loug we' nang yo" oung: pyam wa zi nghoid. 17 Nyang: nya: loxo, to" yuggi yo' nyeing" za: sadi zung" khyo" anyid loo: za: nya: da" younglho' dang: theing thang" cab, ri to" myhed pyam da" myiyi: yiri nang yo" ngeug pyam ca. 18 Hau" myiyi: myhi da" yhoem: moo: nang vang yhe: nghoid rigi shid: loo" wa da" khyoo: moo nang gyung: so" loo" bye: zi nghoid. Hau: joyoo khyoo: yhe: lo" zigi moovo moug: khyoo: jhang yhe: lo" nyid zi nghoid bye:. 19 Nya: jang" moo: yhe: lam" koin' bang: hang" nghoid loug we' doem yo" tau" lo yu" lo: zi anghoid. Kangso, khyoo: moo: nyang: khanham we' doem yo" tau" loo loo: zi anghoid. 20 Houg: yoomo nang gi- byugi yi da" ge khyoo: moo: cang so" loo" we' deungbyeung" da" khyoo: moo: kangso' dei nyid we'. 21 Deingmain" mo yo' joeb, byeung" da" byu yigi hid: nyhang" nya: moug: moo: shoug" khau: nghe: nyid boem wa zi nghoid. 22 Nghoid loug we' Mangsoo gi akhyeung" da" byu yiri hau: moug: mo she: thu' pyam wigi yooboo yoo" bang: ri we'-seiggam, ri yhang: ti"- phoin:, pyam zi shau" boem wa nghoid.