16
Ngoonu" gi ngoonu" nya: moo" zoo" soin nyheung too" nghoid loug- lo" thang moo: gi Mangso wigi za: dayo" ze" bui" byid: nyid.
Nang zei: nyid da" moo" zoo" kha: ja: we' joo nyid ein: myid soin: nyid nghoid loug we' Aseing gi re" nheigloem: khoug: moo: myid soin: khyoo: ri dang: phyed byid: nyid.
Re" da" moo" zoo" moo: mainkaid byid: wa shid re" Aseing ri: mho' yoid we' hougsu" nghoid lang" re" da" moo" zoo" jid: zoo" moo oung: doid loo" wa zi nghoid.
Aseing gi byu dangain" mo, da" vhu" pi: lo, kyo' ri nyheung too" byid: bye:. Akhyeing" ashoeb bang: da" vhu" pi" lo, kyo, gi byo, yoin" lo" da" khyoo: nghoid.
Nheigloem: myhang: nyid bang: dangain" mo, ri Aseing gi ngheung" nyid. Nyangnu" ri shen: yhen, khyoo: mo khanham we' Nyang: lhoid pyoin kaid wa zi anghoid.
Ventang: tam" gyo: cang yhe: lho: nheigloem: zung" we' Houg: lang" Mangsoo gi re" yooboo ri khyoid pyam byid: wa zi nghoid. Aseing dang: tam" gyo: lho: nyid we' hau: akhyeung" da" khyoo: gi nang moo: thoung" shoug" wa zi anghoid.
Aseing ri nang nheugshid: nheugdeug nhang: ri nang gi re: gyivoo joem ri bidnoem yo" koid yu wa zi nghoid.
Ajoo aeung: khyo" vang da" ngei myoo" sho' yo" yu wa tho' re" deingmain" khyo" yo" yu da" zi dajhi' gi je" ge nyid.
Re" moo" zoo" joem ri nang kyam: too" nghoid loug we' Mangsoo gi hau: ziri khyoo: shed byid nyid.
10 Khokham gi Mangsoo byid: da" yoem: so' yo' tid nyid Nyang: myid phyed nyid khyoo: gi khanham we' jo, zi nghoid.
11 Aseing gi deingmain" da" jang yo' laki laxoem" vho: ngei nyid. Houg: yoomo ung" zoo: ung" shoug da" moo" zoo" dangain" moo deingmain" da" khyoo: bui" nhang: nau nyid.
12 Khokham yigi: akhyeung" da" khyoo: ri ayo" zeung: too" nghoid ago". Khasu" wim gari deingmain" da" khyoo: gi nyangnu" da" vhoebkhang" khyoo: ri yoem: boo nhang: nyid da:.
13 Khokham gi deingmain" da" dang: ri gyoo: nau nyid houg: yoomo deingmain" da" dang: tid mo, ri myonhoo: byed: loo wa nghoid nyid.
14 Phajhi" juyhi: boo su: gi Khokham myid pyoo: sho' yoem: kaid wa zi nghoid. Khokham nheig joem: yoo: lang" we' dayug yug gi shid: ca" loo wa zi nghoid.
15 Khokham wigi myonhoo: byid: zigi zain vang khoem" mo moug: ri voo byid: da" jhoemmoug" joem yo' du nyid. Hougmoo: kangso' bo nyid.
16 Sheing: yo' ngei ri yo" yu wa tho' re" phajhi" juyhi: yo' lasi laleug yo" yu zigi je" ge nyid.
17 Ge da" byu yigi akhyeing" ashoeb da" khyoo: ri jang" pyam lho fu" moo" khyoo: moo: so" nyid da" khyoo: nghoid. Hau: lho: nang khakhyoo: yhe: lo" ziri goolhoo: yu" we'. Houg: lang" re" da" kangso' ri nang yo" khyoid yu wa zi nghoid.
18 Nghoid boin: da" khyoo: gi byo, yoin" da" khyoo: khyoo: shu" lo" lho nghoid thui: gyo: da" khyoo: gi byo, yoin" lo" da" khyoo: nghoid.
19 Nghoid boin: lho: anoug ashoo" koid mo, yo' lhoid yu lo da" lanyhoeb bo gam zoo: wa tho' mo nheigloem: khyo' lho: asho" ajhen: nyid wa zigi je ge nyid.
20 Nang ri jhau" shed da" khyoo: ri goolhoo: za: gyo: yu we' Houg: lang" gi nang oung: doid loo" wa zi nghoid. Aseing ri loem khau: nyid we' houg: lang" nang ngei pyo: gau yi wa.
21 Ung: yeig phajhi" boo su: lang" gi nyang: se gyoo: yoomo coem phau" myang: zi shau" da:. Nyang: tid da" dang: thui: gi je gyoo: lang- nyang: wigi byu ri je yo" lang: zheung" nyid.
22 Phajhi" juyhi: gi ung: yeig phajhi" boo su: shid re" kangso' gyid bug nghoid nyid. Nghoid loug we' nheig agyeung: su: ri jhau" shed khyoo: gi- ayo, ze" thang khyoo: za: nghoid nyid.
23 Vhu" nug gi mo, gi aji thu' kaid shi" ri myid soin: yu" ago". Hougsu" myid soin: yu" lho: dang: ji ri nheigloem: je yo" lang: yu nyid.
24 Nheig khyeug da" dang: bi" gi byooyhid: ti" cau: lho: re" gung du: yang" zain" khyo: shid re" akyu" bo nyid.
25 Nang joo bye: ga: myid jho: da" khyoo: gi nang ri shed: jang" khyoo: shu" yhe: loo" se' nyid.
26 Moo" zei: su: da" nhoid mhain: zigi nyang: ri moo" je zei: nhang: nyid. Khasu" wim ga: ri nyang: zooyoid ziri nheugdeug nhang: noug yoomo nghoid.
27 Akhyeing" ashoeb, bang: gi subi" ri noo, nhang: wa khyo" za: soin, nyheung nyid boem ago". Nyangnu" da" khoin" thui: joem gi akhyeung" ziyo' byeung" jo, ago".
28 Akhyeing" ashoeb, bang: gi gei sang: shang pyang: khyo" tid fu" tid pyo: nyid ago". Nyangnu" gi yau: khe" khyoo: ri lhu: pau: thu' kaid lho: bidnoem yiri gang: go" loo" nhang: nyid.
29 Athoug" akhyoug: bang: gi nya: bidnoem yiri mhoug zo: lho: nyangnu" ri byo, yoin" loo" nhang: nyid.
30 Nang ri zei, ceung: shoug lho: myo, myeig myeug shug bang: ri jang" pyam we'. Nyangnu" gi akhyeung" zi daja: ja: myid ci: ago".
31 Khyoo: gi deingmain" su: shid re" aphoug" jhungshug nghoid. Vhuloem phyu: da" khyoo: gi phung" yoeb bidmug nghoid nyid.
32 Yoem: so' gyi: wa shid re" nheigloem: sheung: zigi je ge nyid. Voomoo" joem ri" khaid oung: yu wa tho' re" nanya: gung ri yo" khang" ung: wa zi je ge nyid.
33 Xangsu: byu yigi Mangsoo vho: da" khyoo: ri si' wa shid re" phid baid ago". Nghoid loug we' Tarha" ri dang: phyed byid su" gi Mangsoo nyang: nghoid nyid.