14
1 Myiyi: yi da" phajhi" juyhi: yo'-yhoem: ri zhoug too" nghoid loug we'-ko" fang: da" khyoo: gi hau: yhoem: ri lhu: phyo' sain" pyam nyid.
2 Nheigloem: dain dain nyid su: gi Aseing ri gyoug phau" nyid su: nghoid bye:- adeing amain" khyo" nyid zigi Mangsoo ri aphoug" amyang: su: nghoid.
3 Ko" fang: su: da" nghoid boin: phau: khuang khyoo: gi dang: gye" tid nyid. Nghoid loug we' phajhi" boo su: da" dang: khoin" thui: gi nyang: ri goem loem byid: nyid.
4 Yoo phoug da" nujung joem anyid nghoid rigi re" gug jhi: gi akoem: za: nghoid wa. Nghoid loug we' hau: nujung loo: joem yoomo gug jhi: moo: gug shi" joem yo' byeung" jo, wa nghoid.
5 Loem ge" da" sagse: phoo gi deingmain" da" khyoo: ri khanham we' datid nyid. Nghoid loug we' loem agi" su: gi mhau, fain" da" dang: mo lid lho: gootu: ci" we' ase' tid.
6 Nghoid boin: da" byu yigi khanham we' phajhi" bo byu age bui"- nghoid loug we' lasi phajhi" bo da" byu yi koem gi- phajhi" ri lei za: yo" jhau" yu nyid.
7 Ko" fang: nyid mo, jang" mo vi: moo: nyid we' nyangnu" gi nang ri jhau" byid: wa zi ci" we' ayoo.
8 Ci: yoomo si su: jhang: su: gi phajhi" bo nyid lha". Khasu" wim gari nyang: zei: eung: da" moo" zoo" ri nyang: se' nyid yoomo nghoid. Ajoeb, abyeung" da" byu yigi ciyoomo ko" fang: nyid boem lha". Khasu" wim ga: ri nyang: gye" si' boin: nyid yoomo nghoid.
9 Byugang: yi gi yooboo koid nyid boem nghoid loug we' hau: ziri" cishu: anhang: nghoid ago". Nghoid loug we' byu gi yi koem gi yooboo khyoid pyam, byid: zi shoug" wa vho: nyid ago".
10 Re" da" gau, yi khyoo: gi: nanya: shid re" nghoid- re" nheig koug sho" jhen: khyoo: we' nanya: shid mo nghoid. Hang" we' hau: ziri: re" yo: vang gam yu pyam byid: wa zi anghoid.
11 Akhyeung" su: da" yhoem: ikoin deungkhu: gi byo, yoin" loo: wa nghoid- Nghoid sho' loug we' byugi yi da" yhoem: ikoin deungkhu: koem gi geung: teung jo, wa zi nghoid.
12 Deingmain" bye:? ga: nang myid soin: nyid khyoo: khaid gi nang ri moovo moug: khyoo: shu" yhe: loo" se' nyid.
13 Yi foo: khyo' da" khyoo: moo koug shu: khyoo: gi: gau" loung" jo, se' nyid gau yi khyoo: thang byug lang" gi- koug khyoo: gi khanham we' houg: moo: jo, nyid.
14 Byugang yigi nyangnu" yo' moin: yi" ziyo' dakhyoo" ti"- shoug" kham: yu wa zi nghoid. Byugi yi we' nyangnu" zei: to" ziyo' dakhyoo" ti"- aphoug" ri shoug" kham: yu boem wa nghoid.
15 Byugang: gi: ce" ja: ri: we' loem" nyid wa zi nghoid- phyiri: phala: da" byu yigi nyang: thoid ce" lo" da" khoobyi ri: lhed zed" nyid.
16 Phajhi" boo su: gi yau: khe" kyi" khyeug ashoug" sho' lhed zed" nyid. Nghoid loug we' ko" da" byugang: koem gi alhid azed" ziyo' ahain: akhyoid za: dakoid nyid.
17 Nheigloem: leung" su: gi koomoo" ri zei: nyid Phajhi" je" si' su: gi sam zoo: danyid nyid da:.
18 Lasi phajhi" abo, da" byu yigi nheig agyeung: da" ziyo' moin: yi" aphoug" ri" shoug" yu ago". Nghoid loug we' yeug da" byu yi koem gi lasi laleug jhungshug ri shoug" yu ago".
19 Akhyeing" ashoeb, da" byu yigi deingmain" da" byu yi shidkhoin" moo shoug" goeb, pid boem wa nghoid- khyo' nyhoem: zoore"- nyangnu" ri nheing khyeug wa khyoo: ri mho' ago".
20 Asho" ajhen: da" byu yiri gi nya: yhoem: kyoo" cang" za: anghoid hang" we' avhoo: nghoid ago". Nghoid loug we' yoo" su: di su: koem gi bidnoem seing" cang" myoo" sho' yo.
21 Ngilho' khyoo: ri nang vho: ngei nghoid rigi asho" ajhen: su: ri nang nheig khyeug we'. Hang" ri nghoid loug we' aphoug" akhyoid koid khyoo: gi yooboo nghoid nyid.
22 Nang ge da" moo" riza: zei: nyid nghoid rigi byu gooji yi da" loem khau: khyoo: yo' phau" myang: khyoo: ri nang shoug" kham: yu wa zi nghoid. Nang akhyeung" da" moo" ri dazei: nyid nghoid rigi nang shoid abye:.
23 Moo" ri zei: nyid we' re" voem: gyi: wa nghoid- nang agoin: zhoung: jo, lho: dang: za: datid nyid nghoid rigi asho" ajhen: khyoo: za: shoug: loo wa nghoid.
24 Phajhi" bo da" byu yigi jonu" yo' coung" nghei ngi: shab ziri shoug" kham: yu nyid. Nghoid loug we' ko" fang: da" byu yigi nyangnu" da" ko" fang: da" khyoo: moo: myonhoo: sho: nyid ago".
25 Nyang: gi deungmain" da" dang: tid nyid nghoid rigi hau: sagse: dang: gi kangso' ri khyoid yu nyid. Mhau fain" da" dang: ri tid nyid nghoid ri koem gi nyang: gi subi" ri mhau, fain" nyid su: nghoid.
26 Aseing ri gyoug phau" nyid da" khyoo: gi nya: ikoin deungkhu: byu yi yo' nya: shid re" loem khed" khyoo: yo' gau: yi khyoo: ri byid: nyid.
27 Nang gi shid: gyoin, noogyoin, ri jang" pyam, nau la". Aseing ri gyoug phau" nyid we'. Hau: zigi: kangso' gyid bug nghoid.
28 Khokham pho, da" gyi: sheung: reung: thang khyoo: gi Nyang: vhoebkhang" nyid da" mung" byu yi anyid- nyang: gi akoem: za: danghoid nyid.
29 Nang sam' zoo: tam" to" nghoid rigi nang phajhi" boo su: nghoid loug we' nang nheigloem: nge" loung nyid nghoid rigi nang khayhi' ko" fang: khyoo: ri za: toin" shed nyid khyoo: nghoid.
30 Ngei pyoo: myenjham" za: se' nyid da" nheigloem: gi gung du: ri yang" zain" nhang: nyid nghoid loug we' noo" zo: da" nheigloem: koem gi mung yhang: ti" nghoid nyid.
31 Ashoug" ajhen: bang: ri nang doin: zeig zo: nghoid rigi nyangnu" ri: phain" so: to" Mangsoo ri nang aphoug" akhyoid koid nyid khyoo: nghoid- nghoid loug we' asho" ajhen: bang: ri nheig khyeug da" nheigloem: yo" toin" shed su: koem gi Aseing ri noku coung" nghei da" aved nghoid nyid.
32 Athoug" akhyoug: da" byu yigi nyangnu" da" akhyeung" moo" zoo" joem khyo" wigi nyangnu" nya: da" joem: lo" khyoo: ri koid nyid ago". Byugi yi koem gi nyangnu" deing: byeung" moo" zoo" wigi nyangnu" ri goem loem byid: zi shoug" nyid ago".
33 Phajhi" juyhi: gi phug soo" lheig se' myid yu" bang: da- myid soin: khyoo: dangain" moo: bo jo. Byugang: yigi phajhi" juyhi: khyoo: ga: ziri ci" we' ase' gyoo: nghoid ago".
34 Deingmain" khyoo: gi mungdain: ri gyi: sheung: loo nhang: nyid. yooboo khyoo: gi khayhang: te" da" mungdain: ri we' sho' thu nhang: nyid
35 Khokham yigi koung rhe, da- mung" vhoeb zoug: yiri vho: nyid nghoid loug we' moo" a oung: da" zoug: yi rigi shen" yhen dam kaid nyid.