11
1 Aseing gi adeing amain" da" joid" jang ci: bang: ri ngheung" nyid. Deingmain" da" jang shi" joem ri nyang: vho ngei nyid.
2 Phau: khuang nyid da" byu yigi daso, ri nyang: gi asho' ashed: zi thoung" shoug" wam: bye:- khyo, nyhoem: da" nheigloem: koem gi phajhi" je boo su: nghoid nyid.
3 Nang ge lho' nyid nghoid rigi deingmain" da" khyoo: moo: so" nyid su: nang nghoid bye:. Nheigloem: age mo, koem gi nyangnu" da" adeing amain" da" khyoo: yoomo phyo' shoin pyam ziri thoung" shoug" nyid ago".
4 Re" da" jonu" gi yooboo dang: phyed da" bidnyid moo: nang ri ce" akyu" we' yo" byid: wa zi anghoid- nghoid loug we' deingmain" da" khyoo: koem gi shid: lo" khyoo: mo yo" khyoid yu nyid.
5 Yooboo adab, da" nheigloem: dain: khyoo: gi dain: da" khyoo: khyoo: shu" yhe: lo" nyid akhyeung" mo, koem gi nyangnu" da" age khyoo: moo: joem: loo" goo" wa zi nghoid.
6 Deingmain" da" khyoo: gi nheigloem dain: da" byu yiri khyoid yu nyid nghoid loug we' loem age su: gi nya: da" vhoo: boo myo, no, da" khyoo: moo myi" jo, zi shoug" nyid.
7 Akhyeung" da" byu shid: lo" nyid" ri nya: da" myid byu khyoo: gi nyang: yo' dage" byo, yoin" loo" bye:. Jonu" moo: nghe: ci: su: gi akoem: za: danghoid nyid.
8 Deing: byeung" bang: gi kyi" khyeug yau: khe" khyoo: mo lhoug zung" yu zi shoug" nyid ago". Hau: da" kyi" khyeug yau: khe" khyoo: gi nya: jang" moo: ju" wa gung khoo- akhyeing" su: jhang khyoo: ju" loo" wa zi nghoid.
9 Mangsoo abo da" byu yi tid sang: da" dang: yo' nyangnu" byo, yoin" lo" zi ge shau"-nghoid loug we' deing: byeung" su: da" phajhi" juyhi: gi nanu" ri yo" khyoid khyi: yu nyid.
10 Nheig loem dain: da" byu yi nyid gi nyid de, lo ri davoo goin" mo, gau yi ngei pyo: nyid lho: akhyeung" da" byu yi shid: lo" nghoid ri koem gi hau: voogung moo: gau yi nyho: phau: nyid boem ago".
11 Deing: byeung" da" byu yi mainkaid dang: tid ri voo thoem" gi gyi: sheung: loo nghoid loug we' akhyeung bang: da" dang: khoin" joem yo' voogung gi byo, yoin" lo" zi shoug" nyid.
12 Byu gooji ri aphoug" akhyoid dang: tid su: gi byugang: nghoid. Nang nheigboo ung: gyeing: su: nghoid rigi sam: zoo: nyid wa zi nghoid.
13 Lu wim gei sang: yen" mo, hang" ri nghoid loug we' zau" too" ca" da" khyoo: moo: age loem- nghoid loug we' loem gi" su: rigi nang ge loem nyid.
14 Mungdain: moo: khyoo: shu" vhu" she: zi ajo, lang" gi mungdain: gi soem" joem: loo" wa nghoid- phajhi" byid: bang: myoo" sho' nyid nghoid rigi gau: nyu: khyoo: yo" yu nyid.
15 Tungbau yi da" jhen: ri nang xab, byid: wa dangsoo" byid: nghoid rigi nang koug wa zi nghoid. Hau: jang" moo: nang abo vang lhu: tab, nghoid rigi nang gi je" ge nyid.
16 Sam" dab, ri young" da" myiyi: gi phau" myang: zi shoug" nyid. Nghoid loug we' aved, age da" phoug" shoid yen" myiyi: gi asho' ashed: zi shoug" nyid.
Nei" su: gi khanham we' ngei yoo" wa zi anghoid. Nghoid loug we' athoug" akhyoug: su: gi yo" loo de, loo wa zi nghoid.
17 Nang gi nheig khyeug si su: nghoid rigi nanyang: ri nheig khyeug wa khyoo: koid nyid su: nghoid. Nang athoug" akhyoug: koid nyid su: nghoid ri koem gi nanya: gung ri nyang: nang dam tab, nyid su: nghoid.
18 Akhyeung" da" byu yigi gyeing" nyang: ci" we' yo" yu wa zi anghoid. Nghoid loug we' deingmain" da" khyoo: ri nang dazei: nyid nghoid rigi coung" nghei ngi: shab jhungshug ri nang deing" deing shoug" khau: yu wa zi nghoid.
19 Ge da" moo" ri zei: wa shid mo myid phyed too" su: gi kangso' dei nyid wa. Nghoid loug we' shoid vhang: da" moo" ri danyhen" zei: lo" nyid su: gi shid: loo" wa zi nghoid.
20 Aseing gi ashoeb, da" nheigloem: boo mo, ri ngheung" nyid. Nghoid loug we' deingmain" da" moo" ri zei: nyid mo, rikoem gi jheddab nyid.
21 Ashoeb, da" byu yigi shen" yhen khyoo: shoug" wa ziri nang goolhoo: nyang: si' bye: nghoid loug we' deing: deing" da" byu yi koem gi loid byoin, loo" wa zi nghoid.
22 Phug soo" lheug ase' myid yu" da" myiyi: yigi myonhoo: yung" nghoid loug we' Vu, nhoid phu" moo: lhang" to" da" sheing: khuang: yo' dadu nyid.
23 Byu gi yigi ge da" akyu" ri koid wa zi khanham we' myid vho: nyid. Tarha" aci: bang: gi nyangnu" vho: khyoo: ri shoug" kham: yu da" uri byu yug khang moo" gi nheig yo: nyid boem bye:.
24 Byu dayham" gi nyangnu" da" ngei sheing: ri agoin agoo" ci: yhoung: pyam nghoid loug we' je, yo" je, de, lo nyid boem. Dayham" bang: gi gye" jhoid: ci: loo" nghoid loug we' je" wigi sho" jhen: lo" boem.
25 Agoin' ayu: gam, byid: we' houg: lang" nang yo" loo de, loo wa nghoid. Byu gooji ri pang" byid: thug byid: we' hougsu" koid lang" gi pang" thoug yu zi nang shoug" wa nghoid.
26 Gug ri young: to" lho: wigi gu do' wa myid lang" nyid su: ri subi" coem nheung" ago". Nghoid loug we' hau: ziri oung" thu' kaid su: ri koem gi nyangnu" coung" byid: nyid boem.
27 Nang soin nyheung nyid khyoo: ge zi nghoid zikoem gi nang ri phau" myang: zi shoug" wa Nghoid loug we' kyi" khyeug khyoo: ri nang cang sho: yen" nghoid rigi hau ziri nang shoug" kham: yu wa zi nghoid.
28 Nyang: tu: nya: da" jonu" ri za: nheig nhei: too" mo, gi xung" gung mo seig fu' joem yhang: ti"- shu: gyo" lo" byug wa. Deing: byeung" bang: koem gi zain vang khoem" mo seig fu' joem yhang: ti" nyau, young" lo boem wa nghoid.
29 Nyang: nya: da" yhoem: ikoin deungkhu: khoug: moo kyi" khyeug yau: khe" khyoo: ri ci: vang loo su: gi:-lo" thang moo gi akoem: za: bue" loo" wa zi nghoid.
Nheig agyeung: mo, gi phajhi" boo mo, jang" moo khanham we' deizoo: shoug" bue" nyid wa.
30 Deingmain" khyoo: gi kangso' ri byid: nyid nghoid loug we' athoug" akhyoug: koid da" khyoo: gi kangso' ri yu pyam byid: nyid.
31 Byu gi yigi he: da" mougmyid tho' moo: ngi: shab jhungshug ri shoug" kham: yu nyid boem- akhyeung" ziyo' yooboo dab, nyid da" byu yi koem gi deing" deing shen" yhen zi shoug" wa nghoid.