3
Mangnhung" yi we" lo" thang khyo" tid shang ein: rigi hau: Aseing moo dayug za: yo" bue" yoomo gau yi nyid ge- shid phyang" nanu" jhang khyoo: ngoo lhid" kaid yu" bye: da" khyoo: ri doem pug lhid" wa shid mo ngoo moo yoovoin alid" nyid loo: za: nanu" shid re" je wigi gau: nyu: khyoo: ri yo" yu nyid. Akhyeing" ashoeb da" moo" zei: nyid bang ri lhid zid" nyid ge'. Lakhuid" joem ri zid" nyid ge'. Nyang: tu: nya: gungshoo" joem ri yham" phyed pyam bang: ri zid" nyid ge. Athang: yham" da" khyoo: agyeing" ri kham: yu mo, gi nyangnu" anghoid- nyhanu" she' danghoid nyid boem- khasu" wim gari nyhang" gi Mangsoo ri nya: Venyi: yo' noku coung" nghei wigi Khristu Yesu moo dayug za: yo" bue" da" kangso dei khyoo: moo gau yi phau: khuang mo, nghoid boem- ngoonu" gi noku thung" mo nghe: shoid khyo" alhoo: aved, ri aloem" jeing". Datid shang ein: rigi houg: yhang: te" da" moozoo" moo ngoo we' loem khoug: jang" yoo" su: nghoid nyid nanu" mo dayug gi nghe: shoid mo aved asam" da" moozoo" joem moo loem khoug: jang: yo" ein: jho: nghoid rigi ngoo gi je" wigi loem khoug: jang: yoo" su: nghoid. Ngoo gi apyaid ngi shi" da" ayo, mo nyang:- athang: yham" ci: bye:- Israela byumyu" Benyamin akung: ako' yo' Hebre byumyu" yi mo we' Hebre suid" agyeing" nyang: nghoid nyid Yuda yi da" toung; to" tarha" ri cang pyeing shang ga: rigi ngoo Pharishe" nyang: nghoid bye:. Myid loem" yoem: kaid khyoo: ri da tid shang ga: rigi ngoo gi phung ri shen" yhen loo su: nghoid- tarha" cang byeung" shoid, khyo" deing byeung" khyoo: ri tid shang ein: rigi ngoo moo ce" yooboo we' adab- Nghoid loug we' shid phyang" nga" shid re" amyaid' nghoid bye" ein: soin" to" da" khyoo: dangain" gi akhid" uri gi Khristu yoomo soem" lo" khyoo: nghoid ein: ngoo soin: pyam bye:. Mau: tho' moo gootu- nga" da" Aseing Yesu Khristu ri yo" se' boin: gyeung: lo da" khyoo: gi gu, jhoo: aphoug" dangain" tho' moo je" phoug" dab thang zi nghoid yoomo ngoo yoo" mooyoo" dangain" gi soem" pyam bye" ein: soin: pyam bye:- ngoo yoo" mooyoo" dangain" gi soem" pyam bye:- ngoo Aseing shid re" nga" ziyoo jonu" dangain" ri she: pyam bye:- Khristu ein: da" amyaid' ri yo" yu wa ziyo' Khristu yo' dadeing: daloem: za: yo" bye" loo" wa shid re" jo, moojo, ri joid' nhoin soid' boem ti" soin: pyam bye:. Ngoo gi toung: to" da" tarha" ri cang byeung" yhe: lo" khyo" wigi deing" byeung" khyoo: ayo" yu- akhid" Khristu ri loem" jeing" lo khyo" wigi deing byeung" khyoo: ri ngoo yo" yu bye hau: khyoo: gi loem" jeing" yoomo Mangsoo byid: da" nheig khyeug jeju" jhungshug za: nghoid nyid. 10-11 Ngoo gi Khristu ri yo" se' lo khyoo: Nyang: doem dei to'' lo da" yoem: vhoo" ri shau" myang kham zo: wigi ngoo nya: gungdu: nyang: shid: jangmo doem dei to'' yu wa ziri nheig byu zoore nya: da" shid: kham: ziyo' du goo" wa ziri za: ngoo vho: ngei nyid.
12 Ngoo gi akhid" lang" he: da" khyoo: moo oung: doid' bye: ein: we' joeb, byeung" bye" ein: we' atid noug- Khristu nyang: ngoo ri nya: da" byu bue" loo nhang: bye: yoomo ngoo we' jhungshug ri yo" yu sho' yoem: kaid lho: gei loo" bye:. Ngoo gi hau: jhungshug ri yo" yu sho' we' shid moo jo, da" zi joem ri myhi: sho' we' nga" thang: mo khyoo: dangain" ri to" myhed' pyam. 13 Mangnhung" yi we"- ngoo gi hau: jhung shug ri yo" yu bye: ein: gyeing" nyang: ngoo amyid- nghoid loug we' ngoo koid da" khyoo: dangain" gi nga" nungthang mo zi joem dangain" ri ngoo to" myhed pyam wigi shid moo jo, da" zi joem ri yo" myhi: loo" sho' yoem: kaid yhe: lo". 14 Hougsu" nghoid yoomo ngoo gi hau" jhungshug ri yo" yu wa shid re" bain: zeing ju" sho' dain" dain: yoem: kaid gei yhe: lho: hau: jhungshug gi mougkhung: moo kangso yo" dei nyid sho' Khristu Yesu khyo" wigi Mangsoo khe: yu da" khyoo: nghoid nyid.
15 Venyi: khyoo: moo nheig bo lho: myheung yang" bye: da" ngoonu" gi he: da" myid nyid azoo" yo' dakhyoo" ti" myid nyid ca" boem bye:. Nghoid loug we' nanu" dayham" mo adu go" khyoo: ri myid nyid mo, to' boo shi" nghoid loug we' Mangsoo gi hau" khyoo: ri we' myang loo nhang: shi" wa zi nghoid. 16 Kha: khyo" nghoid loug we' ngoonu" gi akhid" nyid" ju" sho' ngoo nyang: cang lid loo bye: da" akhyoo" aved, joem yo" dakhyoo" ti" shid khyoo: jhen" yhe: lo" nyid boem shang.
17 Mangnhung" yi dangain" mo we"- nanu" dangain" nga" jhang mo khooshid: ri yu" yu ge'. Ngoonu" toin" shid too" bye: da" akhyoo" again ge da" khooshid: ri yu" yu lho: cang loo" bang: ri yu" xoem" nyid ge. 18 He: khyoo: ngoo nanu" ri shid phyang" myoo" sho' lheing" tid kyo" yu" bye:- akhid" we' ngoug byid yo' doem pug tid kyo" nyid Khristu gi pyang" zeing tho' moo kham" shid: da" khyoo: ri gyi koid lho: kangso di nyid bang: myoo" sho' bo. 19 Houg: bang: gi moovoo moug: moo nyangnu" da" khyoo: lo" thang wa zi nghoid- khasu" wim gari houg: bang: da" Mangsoo gi nyangnu" da" voemdoug: ein: da" gung sho" vhoo: boo myo, no, da" khyoo: nghoid nyid nyangnu" gi asho' ashid: da" khyoo: ri myonhoo: sho: phau: khuang nyid boem ziyo' he: mougmyid mo da" zi yoo joem riza:- nheig tei" nyid boem ago". 20 Ngoonu" koem gi mougkhung: mo da" mungbyu yi nghoid boem yoomo mougkhung: mougdi mo ngoonu" da" khyoid yu Aseing Yesu Khristu ri shau" goo" wa kang: lung' bu dalang" nyid boem. 21 Nyang: gi jo, moojo, ri nya: vhoo: moo yo" kaid pyam da" phung" yoeb, yoem: moo" bo nyid ziyo' dakhyoo" ti" ngoonu" da" shid: loo" se' gungdu: joem ri thid pyam lho: nya: da" myonhoo: phung" yoeb bo gungdu: yo' du goo" sho' aseig thid' byid: loo wa zi nghoid.