PETRU
LHID" FOIN: KAID DA" MOUGSOUG" EIGLOEM:
(2Peter)
Petru foin: kaid da" mougsoug" eig loem: moo gi- joyoo khyi khang" moo" khyoo: nyid byo yen" da" Khristain yi jhang khyoo: vhu" zhoug lho: lhid" foin: kaid da" mougsoug" nghoid. He: mougsoug" lhid" su: da" myed soin' to" khyoo: zeing gi mhau' da" sara yi jhoug" myeing" joem ri lhoem: zain: oung: pyam wa ziyo' nyangnu" jhau" mhoo' byid: yoomo byu yi da" asam" aved, byo, lo" khyoo: ri toem xeung' too" wa shid re" nghoid nyid. He: da" khyoo: moo yhau: gyen: da" zigi Khristain byu yi moo Mangsoo yo' Aseing Yesu yo' sen: wigi deingmain" khyo" jhau" byid: khyoo: ri geing: geing: teing teing lhoem: yu too" wa ziyo' hau: deingmain" khyoo: jhau" mhoo' byid: jang moo Aseing Yesu yo' nyang: shau" myang zoem" khau: lho, bo myang bo shoug" gyoo: mo, da" jhau" shid khyoo: nghoid ca"- ga: da" khyoo: joem nghoid nyid. Mougsoug" lhid" su: moo je" wigi gung yau yau nyid khyoo: gi Aseing Yesu adoem gyoo" loo loo: wa zi nghoid, ga: wigi jhau" shoid da" khyoo: nghoid. Mougsoug" lhid" su: gi Aseing Yesu doem gyoo" loo wa shid re" ayo, myang" nhang: nyid da" khyoo: gi Mangsoo gi byu yi hang" ri we' abyo, loo" nhang: noug yoomo dangain" bang; ri nyang: nya: da" yau: noo yooboo mo doem tau" loo nhang: nau nyid ga: wigi phoid: kyo" nyid.
1
Yesu Khristu da" join yo' lagyoo: nghoid su: ngoo Simun Petru gi Ngoonu" da" Mangsoo yo' khyoid yu da" Aseing Yesu Khristu da" deingbyeing" khyoo: moo ngoonu" yhang: ti" phoug" dab da" loem" jeing" khyoo: yo" yu bye: bang: jhang khyoo:- dang: pyeing: kaid.
Mangsoo yo' nyha" da" khyoid yu Aseing Yesu Khristu ri nanu" se' loo bye: yoomo nanu" gi jeju" yo' ngeipyo: khyoo: ri joeb byeung" sho' shau" kham: yu goo" baja" o".
Nya: da" myonhoo: phung" yoeb yo' ge thang khyoo: joem ri gamboem shau" yu wa shid re" nyhang" ri khyoid yu bye: da" Mangsoo ri se' lo boem bye: yoomo Mangso da" yoem so' gi deingmain" da" noku thung" loem" jeing" khyoo: moo kangso yo" dei: nyid wa shid re" nyhang" moo ca" nyid da" khyoo: bain sho' ri byid: to" bye:. He: khyoo: yoomo gye" gyi: sheung: wigi phoug" dab da" jeju" jhungshug yo' sen: lho: wigi dang: soo" khoin" joem nyhang" ri byid: too" bye:. Hougsu" nghoid yoomo he: da" jeju" joem khoug: moo ngoonu" gi mougmyid tho' moo lhu: phyo' lhu: shoin' se' da" vhoo: boo loug, gyi: khyoo: mo loid byoin lo" lho: Mangso aved' ri yo" vang zhung" yu goo" baja. Khyoo: he: khaid nyang: yoomo nanu" da" loem" jeing" khyoo: moo ge lho' da" khyoo:- se' zi dalung: kaid nyid ge. Se jang" moo nyang nya: da" gungdu: ri yo" khang" zi nyang: nya: da" gungdu: ri yo" khang" tho' moo kham zeung: zi kham zeung: khyoo: moo tarha" ri phau" cang zi. Tarha" phau" cang jang" moo mangnhung" ri jheddab zi mangnhung" ri jheddab tho' moo"- athang agoin zi dakaid loung: nyid ge. He gu: gi nanu" moo aboo age da" yoemso joem nghoid. He: gu: gi nanu" moo athang agoin dabo jo, nghoid rigi ngoonu" da" Aseing Yesu Khristu ri nanu" se' lo ziyo' kangso dei da" khyoo: moo zhang" zhang" yang yang nghoid wigi akyu" bo thu' loo nhang: wa zi nghoid. Nghoid loug we' hau: yoemso ri ayo" yu bang: hang" nghoid loug we' vi: vi ayo" myang se' da" myo, amyang su: nghoid yoomo nyang: zei: lid loo bye: da" yaunoo yooboo mo wigi cid" khyoid cid" shang: pyam shau" bye: ziri to" myhed' pyam su: nghoid.
10 Hougsu" nghoid yoomo nga" mangnhung" yi we' nanu" ri Mangso wigi khe:yu ziyo' khyen: yu bye: ein: da" khyoo: ri khanham we' shau" myed kham zo: nyid wa shid re" je" ri yoem: kaid nyid ge. Hougsu" koid nyid boem nghoid rigi nanu" da" loemkhau: khyoo: ri khanham we she: pyam boem wa zi anghoid. 11 Khyoo: he: khaid khyo" cang lo" boem nghoid rigi ngoonu" da" Aseing yo' khyoid khyi: yu su: Yesu Khristu da" athang agoin da" mungdain: khyoo:- yo" vang loo" wa da" akhang"- nanu" ri joeb joeb byeung" byeung" byid: wa zi nghoid.
12 Hougsu" nghoid yoomo nanu" gi- he: da" khyoo: joem ri se' gyo: ci: lho" wigi nanu" kham: yu ci: da" hau: deingmain" da" khyoo: moo geing: geing: teing teing ayang: qei" to" abye: go". Nghoid sho' loug we' ngoo gi nanu" ri khanham we da tid poin" nyid noug shi. 13 He: da: kangso dei nyid shi" ayo' bidnyid gu: moo hau: khyoo: yo' sen: lho: wigi nanu" ri lhid zid" wa shid mo tid poin" wa khyoo: gi ngoo zei eung: da" moo" nghoid ein: ngoo myed yu" nyid. 14 Ngoonu" da" Aseing Yesu khristu- ngoo ri bang" bang nyang:- tid poin" too" bye: ziyo' dakhyoo" ti" he: da" shid: se' gungshoo" ri khamyhang amyang" ri khyoid she: pyam wam, bye: ziri ngoo se' nyid bye:. 15 Hougsu" nghoid yoomo ngoo shid: byug thang: ri he: da" khyoo: joem ri nanu" khanham we' daboin: so" nyid wa shid re" ngoo yoemso thang" sho' yoem: kaid wa zi nghoid.
16 Ngoonu" da" Aseing Yesu Khristu da" yoem: moo" phung" yoeb yo' ju" re" da" khyoo: nanu" ri si' nhang: wa da" shid re" ngoonu" gi byu yi koid: zheung" koid to" da" mhoomyid: ri ayang: koid khyoo: akoid boem loo. Ngoonu" nya: myu, jid" yo' nyang:- nya: da" gyi: sheung reung: da" khyoo: ri nyang:- shau" myang boem bye:. 17 Nyang: ri phoo' Mangsoo mo nyang- myonhoo: ngalang phung" yoeb byid: da" uri we' je" gyi: thang da" phung" yoeb khoug: mo wigi nya: jhang moo ju" re" da" thui: gi He" yug gi ngoo vho" ngei da" ngoo jheddab da" nga" zoo: nghoid, ga: wigi tid uri we' ngoonu" houg moo nyang: yo' dage" nyid. 18 Hau: ayo' moo nyang:- ngoonu" gi hau: Aseing yo' gyeungshang: da" boem tho' moo nyid nyid uri moug: khyo" myeung thu' lo da" thui: ri ngoonu" shug gyo: boem.
19 Hougsu" nghoid yoomo ngoonu" gi lapi: yi tid fu" to" da" yoeb, myang mungdang: ri je" wigi nheigshid: nheigdeug nyid boem bye:. Nanu" we' hau: mungdang: ri goolhoo' za: datam" gyo: nyid ge'. Khasu wim gari hau: zigi nanu" da" nheigloem: ung: khoug: moo myo, myang: lo wigi boo" myhu: thu' lo da" ayo' moo mougcoid da" joyoo moo bang nyid da" myibung: yhang: ti" nghoid nyid. 20 Hang" nghoid sho' loug we"- nyang: tu: nyang: myid vho: khyo" jhoem: mungdang: mo lapi: dang: khoin" da: dangkang: ayo" koid: yu ziri dangain" da" shid moo xoem" too" ca" nyid. 21 Khasu wim gari kha: da" lapi: dang we' byu yi da" myidsoin' khyoo: bue" thu' lo yu" zi anghoid. Gyeungshang: da" Venyi: wigi nheigloem: lhu: too' byid: zi shau" bang: gi Mangso jhang mo ju" re" da" lapi: dang: ri thoid' tid kyo" ago".