5
Ngoo gi phung sayen" dayug khyo" nanu" mo phung sayen" yi ri mho' mho' sang: kaid. Ngoo gi Khristu kham zo: da" kyikhyeug, khyoo: ri bo myang se' da" sagsi dayug khyo" thang: phyang" toin" shid byid: loo wa da" myonhoo: phung" yoeb, ri bo shau" kham: yu wa su: nghoid nanu" gi nanu" nyang: ri ab, byid: too" bye: da". Mangso da" yang phung: ri Mangsoo nanu" ri koid nhang: nau ziyo' dakhyoo" ti" yu" coung' goin, zung" lhug nyid ge anoug, akhyoid khyo" akoid loo: za: nu" nham' vho: ngei da" myid yo' koid nyid gala, ga: nyho: khyo" anghoid looza: zhoo: gyi: zei: nau, khyo" gau yi ngei pyo: ziyo' zei: so' voin, vu, nyid ge. Nanu" ri ab, byid: to" da" phung: ri seing: zoo: nau myid khyo" akoid goo"- hau: yang phung: yi da" shidkhoin" moo yu" yu ge da" khoo" shid: ri toin" shid nyid ge. Yang lhug zoug: moo" thu' myhang lo da" bidnyid moo nanu" gi myonhoo: phung" yoeb, yo' khanham we' ashoem: lo: da" bidmug, ri shau" yu boem wa zi nghoid.
Houg: yo' dakhyoo" ti" nanu" zoolu: zoomyi: yi we' sayen" yi da" dang: ri tam" gyo: nyid ge'. Nyang: cang" nyang: zoem" khau: da" khyoo: moo nanu" dangain" mo, gi khyo' nyhoem: ein: da" azuang ri void, ci: lho: dayug da" deizoo: dayug koid nyid ge. Khasu" wim ga: ri jhoem: mungdang: moo Mangsoo gi nghoidboin: mo, ri doin: khyo' pyam lho: nheigloem: nyhoem: mo, ri jeju" byid: nyid ga: lhid" to". Houg: su" nghoid yoomo phoo' Mangsoo gi nya: ge da" ayo, ju" lang" nanu" ri yo" tu: to' kaid wa shid re" nya: yoem: moo" bo da" lo, yoem: bid shoem: khoug: moo khyo' nyhoem: lho: nyid ge. Mangsoo gi nanu" ri jheddab goin, coung: nyid yoomo nanu" da" myid myoo: ung: loug, khyoo: dangain" ri nyang: ri ab, pyam byid: ge.
Gyeung: boin: da" byu bue: nyid ge'. Zid" lhid lho: nyid ge'. Nanu" da" gyivoo nghoid yu satan gi kha: yug ri myhau: pyam wa la"? ga: myeung dang: yen" da" khang' khyi yo' du nyid. Nanu" koem gi loem" jeing" da" khyoo: moo geingteing jo, lho: nyang: ri lhoem: zain: ge'. Khasu" wim ga: ri nanu" nyang: si' bye: ziyo' dakhyoo: ti" mougmyid gyab, goin" jang" moo nyid da" nanu" da" loem" jeing" mangnhung" yi gi hid: yhang: te" da" shen" yhen kyikhyeug, khyoo: ri thoung" shau" nyid boem. 10 Nghoid loug we' nanu" gi daso' za: shen" yhen ziri thoung" shau" thang: ri Khristu yo' dage" apyaid ato: myonhoo: phung" yoeb, ri shau" kham: yu wa shid re" nanu" ri khe: yu da" jeju" dangain" Aseing Mangsoo nyang: nanu" ri joeb, byeung" mo, bui" nhang: lho: wigi geingteing khyoo: yoem: zeing so' moo" yo' loem ge" da" apoem: ayang: qei" byid: wa nghoid. 11 Nya: jhang moo apyaid atoo:- myonhoo: phung" yoeb, bug thu' seing" jhu" jo, baja" o" Amen.
12 Ngoo gi he: da" mougsoug" lhid" zoore Sila bo pang" byid: khyo" he: moug: soug" ri nanu" jhang khyoo: lhid" foin: kaid Sila gi loem ge" da" Khristain mangnhung" dayug nghoid ein: ngoo myid loem nyid. Nanu" ri yoem: byid: da" dang: tid wa ziyo' nanu" shau" kham zo: da" jeju" gi Mangsoo byid: da" jeju" gyeing" nyang: nghoid da" ziri sagsi kham wa shid re" he: da" mougsoug" ri lhid" kaid. Hau: jeju" moo geingteing yab, jo, ge.
13 Mangsoo khyen: yu da" jeju' ri nanu" yo' dakhyoo" ti" shau" kham: yu da" Babelon voo mo- nanu" da" mangnhung" phung: byu yi we' nanu" ri vhu" kaid ago"- nga" zoo: Marku we' nanu" ri vhu" kaid. 14 Nanu" nyang: cang" nyang: we' Khristain jheddab nheigloem: khyo" boo: bug bug go" nyid ge- Khristu khoug: moo nyid mo, nanu" dangain" bang: da" atho' moo myen, jham" ngei pyo: nyid goo" baja" o".