2
1 Houg: su" nghoid yoomo nanu" gi age da" khyoo: aja: ja: yo' mhau' fain" da" khyoo: aja: ja:- akug void da" khyoo:- no" zo dang: tid ziyo' juang" yi dang: joem ri she: pyam loo: ge'
2 Aseig co' phyed to" da" zoonu' yi yhang: ti" nanu" we' Venyi: noug" gyeing" ri khanham we shug nau nyid ge-- Hougsu" nghoid lang" she, nanu" gi gyi: sheung: lo lho: khyoid yu zi shau" boem wa nghoid.
3 Jhoem: mungdang: moo gi Aseing gi khayhi' mo nheig se' khyeug nyid khyoo: ri nanu" nyang: se' abye: go"- ga: tid to".
4 Houg: yoomo Aseing jhang khyoo: tain" tab loo ge' nyang: gi kangso dei nyid da" lung moo" boem nghoid. Hau: lug moo" boem' gi ce: phoug" adab ga: byu yi gi khyen: pyam too" nghoid loug we' Mangso wigi phoug" dab ga: khyen: yu bye:.
5 Nanu" gi kangso dei nyid da" lug moo" boem' khyoo" Mangso jhang moo re" lho: Venyi: yhoem: moo" zhoug to" jang" moo akyu bo da" lug loem: bue" loo nhang: ge'. Hau: da" Venyi: akyu" mho' yhoem: moo" moo nanu" gi Mangsoo vho: ngei da" Venyi: xoin" ri Yesu Khristu khyo" wigi- xoin" to' byid: da" gyeungshang: khainjung yi bue" loo wa nghoid.
6 Khasu" wim ga: ri jhoem: mungdang: moo ngoo gi phoug" dab da" lug daloem: ri
khyen: yu lho: Ziun boem tho' moo yhoem: jhoin: mo geingteing lug moo" boem-
khyo" zhoug too" bye:- nyang: ri loem" jeing" mo, hang" we'
gyoug, sho' zi shau" wa anghoid- ga: wigi lhid" to".
7 Loem" jeing" mo, nanu" shid re" gi hau: lug moo" boem, gi gye" phau" zi nghoid.
Nghoid loug, we' aloem" jeing" mo, shid re" gi
lug yhoem: zhug mo, khyen: lhei" to" da lug loem" gi
yhau: gyen: thang da" yhoem: jhoin: mo geingteing da" lug. Loem: bue" loo bye:.
8 Gootu: da" jhoem: mungdang: daloem: moo gi
hau: lug loem: gi byu yi ri khyid: vhu" thoung" leung nhang: da" lug loem: yo'
nyangnu" ri leung, loo" nhang: da" lug zeing ga: lhid" to".
Houg: bang: gi Yesu da" lu dang: gi ri atam" gyo: boem yoomo thoung" thue: leung, lo" boem bye:-
Hau: khyoo: koem gi Mangsoo nyheung to" da" khyoo: nghoid.
9 Nghoid loug we' nyangnu" koem gi mougcoid khoug: mo wigi nya: da" mau" pho" bidbang khyoo:- nanu" ri khe: yu su: Mangso da" mau" pho" moozoo" ri tid fu" loo" wa shid re" khyen: yu to" da" byumyu"- Khokham" da" khainjung yi gyeungshang: da" byumyu" yo'
10 Mangsoo seung: ci: da" byumyu" yi nghoid bye:. Nanu" gi xangshid" ri Mangso da" byumyu" anghoid- akhid" koem gi Mangso da" byumyu" nghoid bye:- xangshid" ri nanu" gi nheig khyeug zi shau" mo, anghoid- nghoid loug we' akhid" koem gi nanu" nheig khyeug zi shau" boem bye:.
11 Ngoo jheddab da" bidnoem yi we"- nanu" ri he: da" mougmyid moo gyung: so" nyid da" tungbau yi yo' phang: yen" mo, ri yhang: ti" ngoo nanu" ri mho' kaid, nanu" gi khanham we' kangso ri meing: zain: nyid da" gungshoo" vho: khyoo: moo nanu" da" gungdu: ri meing: zain: nyid da" gungshoo" vho: khyoo: moo nanu" da" gungdu: ri ab, pyam ge.
12 Aseing Yesu ri aloem" jeing"- aloem, khau: mo, gi nanu" ri age da" moo" ri zei: nyid mo, nghoid ga: yooboo foin: nyid uri nanu" koid ge da" moozoo" ri shau" yu" myang wigi Yesu doem gyoo" lo da" bidnyid moo Mangsoo ri yo" coung" nghei byid: goo" baja"- nanu" gi nanu" nya: da" shidkhoin" moo ge lho' da" asam" aved, yo' kangso dei nyid ge.
13 Aseing da" myonhoo: ri tu: yu" lho: byu yi zhoug to" da" zoug: yi dangain" mo, da" vhoeb khang" da" khyoo: ri tam" gyoo: byid: ge. Gyi: thang da" amyeung" akhang" ci: da" khokham zeing yo'
14 Age da" moo" zei: mo, ri dam byid: wa ziyo' ge da" moo" zei: mo, ri coung" byid: wa da" mung" zoug: yi ri tam" gyoo: ge.
15 Nanu" gi nanu" nyang: zei: wa ge da" moozoo" yo' ci" ase' da" byugang: yi da" nhoid ri myhed" pyam byid: wa shid re" we' Mangsoo myid vho: nyid zi nghoid.
16 Nanu" gi loid byoin, loo" mo, khyo" zei: so' nyid yab ge- nghoid loug we' akhyeing" ashoeb khyoo: ri nghoeb, too" wa shid re" nanu" da" loid byoin, akhang" ri aci: goo"- nghoid loug we' nanu" gi Mangso da" join yi yhang: ti" zei: so' nyid ge.
17 Byu danghoid moo nghoid rigi phau" myang: nyid ge- loem" jeing" da" mangnhung" gootu: yi ri jheddab nyid ge- Mangsoo ri gyoug phau" nyid ge- Khokham" yi ri phau" myang: nyid ge.
18 Deizoo: yi we"- nanu" da" yhoem: seing: yi vhoeb khang" khyo" cang nyid ge nheigloem: ge lho: se' pang" se' thug mo, ri za: we' anghoid- akhyeing" ashoeb da" yhoem: seing: yi ri we' phau" gyoug nyid ge.
19 Nanu" gi Mangsoo vho: ngei nyid da" khyoo: joem ri si' byid: lho: athoung" shau" moin: da" sho" jhen: kyikhyeug, da" khyoo:- nanu" thoung" shau" lo boem nghoid loug we' nyang: vho: khyo" myid boin: lho:- zeung: kham nyid ri Mangsoo gi nanu" ri mainkaid jeju" byid: wa zi nghoid.
20 nanu" gi nanu" nyang: koid shoid da yooboo yoomo kham moin: da" yooboo dam ri kham zo: nyid nghoid rigi nanu" ri hang' wigi se' coung" byid: wa nghoid loug we' deingmain" da" moozoo" yoomo sho" jhen: kyikhyeug, da" dam kham nyid nghoid rigi Houg: yoomo Mangsoo gi nanu" ri mainkaid jeju" byid: wa zi nghoid.
21 Hid: yhang: ti" kham zeing: wa shid re" Mangsoo gi nanu" ri khyen: yu too" bye:- khasu" wim gari Khristu da" khyid: khoo: moo yo" cang loo" wa shid re" nya: gung nyang: nanu" shid re" kyikhyeug kham lho: nanu" shid re" khooshid: koid too" bye:.
22 Nyang: gi ce:yooboo we' akoid yu"- nya: nhoid mo mhau' da" dang: dakhoin" we' atid' yu".
23 Nyang: ri subi" juang" yi nyid uri ce" dang: dakhoin" we' aphoug, tu"- nyang: ri dam kaid shen" yhen lo da" uri kyoug, nhain' wa da" dang: atid- deingmain" tarha" dang: phyed wa da" Mangsoo moo nheig byu loem" jeing" nyid.
24 Ngoonu" gi yau: noo yooboo ri she: pyam kho lho deing main" mo, khyo" kangso yo" dei nyid wa shid re" nyang: gi ngoonu" da" yooboo ri nya: gungdu: moo nyang: voin lho: pyang" zeing tho' khyoo: yhe: loo" bye:-
25 Ngoonu" gi Yesu da" dam noo joem mo- noo ge lo boem bye:. Khasu" wim ga: ri nanu" gi yang joem yhang: ti" khyoo: vhang: vhang: lo" byug boem bye:- nghoid loug we' akhid" koem gi hau" yang lhug, zoug: moo" yo' nanu" da" kangso' ri zung" byid: su: jhang: khyoo:- cang loo" wa shid re" doem shu" lo zi shau" bye:.