9
Aseing gi Israela byumyu" yi Egutu mung" mo thu lo thang: eig zain da" xang: shi" lhammoo" khyab ri Sina dain" pyoid yoo moo: Moshe ri dang: tid da:. 2-3 Nyang: gi: ?Hau: pui" ri he: lhammoo" khyab daxe: myid: nyid" bidvang yo, mo Israela byumyu" yigi lhid: kaid pui" ri hau: pui" shid re" byid: to" da" thung" tarha" yo' dakhyoo" ti" koid wa zi nghoid? ga: tid. Houg: yoomo Moshe gi byumyu" yiri lhid: kaid pui" koid wa shid re" tid lho: Nyangnu" gi xang: shi" lhammoo" khyab daxe: myid: nyid" myen" thang: ri Sina dain" pyoid yoo moo: hau: ziri koid ago". Byumyu" yigi Aseing wigi Moshe ri byid: to" da amyeing" cang: joeb ri koid ago".
Nghoid loug we' byu dayham" gi byu shid: mang mo zang" tain" yoomo thung" khyo" ayung" alho' bui" mo, bo ago". Houg: lho: nyangnu" gi hau: bidnyid moo: lhid: kaid pui" ri ashau" bo koid nghoid ago". Nyangnu" gi Moshe yo' Arun tang: jang moo yhe: lho: ?Ngoonu" gi byu shid: mang ri zang" tain" wigi ayung" alho' bui" mo, nghoid. Nghoid loug we' ngoonu" gi deing da" Israela byumyu" yi yo' dage" Aseing ri xoin" ngei" byid: da" moo" zoo" moo ciwim toem to" zi shau" boem wa zi nghoid la"? ga: myid: ago".
Moshe gi ?Ngoo Aseing da" pyeing: dang: shoug" kham yu da" ayo, ju" sho' lang" ge'? ga: tid.
Aseing gi Moshe ri 10 Israela byumyu" yiri tid wa shid re" ?Nanu" mo dayug yug anghoid lang" nanu" da" amyed ashen yigi byu shid: ri zang" tain" anghoid lang" moug: vi: khyoo: gyung: soo" yoomo ayung" alho' bue" nghoid loug lhid: kaid pui" koid nau nghoid rigi 11 Nanu" gi hau: pui" ri hau: lhammoo" khyab lid lho: thang: lhammoo" khyab daxe: myid: nyid" myen" thang: mo koid wa akhang" yo" ago". Hau pui" ri doocid" akaid da" zooyho' yo' nghang" pho kho" ja: yo' koid we'. 12 Zoo: shug ce: ja: ri we' thang: nyid" nab soin: ju" sho' ateing too" goo". Ce: ja: goug: nyhoug" da" shooyoug: ri we' abaid khyoug" goo". Hau: lhid: kaid pui" ri thung" ri: dangain" ri cang lho: koid ge'. 13 Nghoid loug we' thung" khyo" younglho' yug hang" nghoid loug we' gyung: we' aso" da" yug lhid: kaid pui" abo koid nghoid rigi nga" byumyu" dayug khyo" myid soin: byid: loo: wa zi anghoid. Ciwim ga: ri nyang: gi tu' to" da" ayo, ri ngoo ri xoin" angei" byid: yoomo nghoid. Nyang: gi nya: yooboo aphoug" ri kham zoo: ca" da:.
14 Nanu" mo phung: khoug: moo: nyid da" tungbau byu dayug gi hau: lhid: kaid pui" koid nau nghoid rigi nyang: gi thung" tarha" dangain" ri cang wigi koid ca" da:. Nyang: nya: byumyu" nghoid nghoid tungbau byumyu" nghoid nghoid yugkhang" moo" tarha" daja: kyeing" ci: wa zi nghoid? ga: tid da:.
(Thu 40:34-38)
15-16 Aseing shidkhoin" Zoem" ri tu: zhug da" bidnyid moo: jhoemmoug" thei" gi ju" lo lho: hau: ziri lo nghoeb to" da:. Myen" ri hau: jhoemmoug" thei" gi myi: yo' du da:. 17 Jhoemmoug" thei" thoid loo" khang" moo" Israela byumyu" yigi dab ri phyo' lho: nyangnu" gi jhoemmoug" theing: da" joyoo moo: dab doem koid lho: nyid boem. 18 Byumyu" yigi Aseing da" amyeing" yo' dab ri phyo' lho: Aseing da" amyeing" yo' dab ri doem koid boem. Zoem" atho' moo jhoemmoug" thei" theing: jo, myhang nyangnu" hougmoo: kyeing" nyid wa zi nghoid. 19 Jhoemmoug" thei" gi Zoem" atho' moo: ayo, myang" sho' theing: nyid lang" nyangnu" gi Aseing ri phau" myang: tam" gyo" ziyo' nyangnu" athoid goo" nghoid da:. 20 Dalheing: lheing: jhoemmoug" thei" gi Zoem" atho' moo bidnyid dajhi' za: theing: jo, da:. Nyangnu" gi khasu" nghoid nghoid Aseing da" amyeing" dang: ri cang wigi nyangnu" dab moo: theing: ri theing: thoid ri thoid koid da:. 21 Dalheing: lheing: jhoemmoug" thei" gi myen" mo zi nab soin: ju" sho' za: da theing: jo, da:. Nyangnu" gi jhoemmoug" too' yo' dage" cang to' boem. Jhoemmoug" too' khang" moo" nyangnu" cang to' boem. 22 Hau: zigi eig nyid" nghoid nghoid lhammoo" dakhyab nghoid nghoid dazain nghoid nghoid hau: tho' je myang" nghoid nghoid Zoem" atho' moo jhoemmoug" neing" jo, myang nyangnu" athoid nghoid da:. Nghoid loug we' hau: zi to' loo" lang" nyangnu" we' thoid boem bye:. 23 Moshe khyo" Aseing byid: da" amyeing" joem ri phau" myang: tam" gyo: wigi nyangnu" dab ri koid lho: hau: ziri phyo' ago".