18
1 Aseing gi Arun ri ?Nang yo' re" yuggi zoo: yi yo' Levi byu yigi nga" shidkhoin" Zoem" mo dei byid: moo" yo' xo' da" yooboo aphoug" ri kham zoo: ca" ago" da:. Nghoid loug we' khainjung moo" dei byid: da" aphoug" joem rigi nang yo' re" yuggi zoo: yi kham zoo: ca" ago".
2 Nang yo' re" yuggi zoo: yi Zoem" moo: dei byid: nyid da" ayo, mo nanu" ri pang" thoug wa yo' nanu" yo' dage" moo" zei: wa shid re" Levi akung: mo nanu" bidnoem yiri shu" we'.
3 Nyangnu" gi nang ri pang" thoug da" nyangnu" moo" ri zei: pyeing wa ziyo' Zoem" shid re" voin vu, eung: da" yoovoin ri zei: goo" wa zi nghoid. Nghoid loug we' nyangnu" gi gyeung" shang: joyoo moo: jo, da" gyeung" shang: zi joem ri anghoid lang" phoin: ri age tain" wa nghoid ago". Nyangnu" tain" nghoid rigi nyangnu" yo' re" phiyi dangain" said pyam zi shoug" goo" wa.
4 Nyangnu" gi nang yo' dage" moo" zei: wigi Zoem" khoug: moo: dei byid: eung: moo" dangain" shid re" nyangnu" zei: pyeing wa zi nghoid. Nghoid loug we' asi' ajhang: da" byu yo' re" phiyi moo" age shoin" zei: wa.
5 Nang yo' re" yuggi zoo: yi za: gyeung" shang: joyoo yo' phoin: shid re" yoovoin yu zei: pyeing ca" wa zi nghoid. Houg: lang" ngoo nheig yo: zigi Israela byumyu" yi jang" khyoo: adoem thougtheung tau" loo wa zi nghoid.
6 Ngoo gi re" bidnoem Levi byumyu" yiri Israela byumyu" phung: mo jhungshug khyo" nang ri khyen: byid: yug nghoid. Nyangnu" hau: Zoem" moo: voin vu, eung: da" nyangnu" moo" ri yo" zei: wa shid re" nyangnu" gi ngoo ri shug byid: too" shoug" bang: nghoid.
7 Nghoid loug we' nang yo' re" yuggi zoo: yi za: phoin: yo' gyeung" shang: thang joyoo yo' sen: da" khainjung moo" dage" ri zei: pyeing wa zi nghoid. He: moo" joem gi nanu" da" yoovoin nghoid. Ciwim gari: ngoo gi nanu" ri khainjung aya: jhungshug byid: too" bye:. Hau: gyeung" shang: zi joem khyoo: tain" yhe: da" asi' bang: hang" nghoid loug we' said pyam zi shoug" wa? ga: tid.
8 Aseing gi Arun ri ?Xoin" khyo" anghe' ngei" loo: za: ngoo ri shugbyid: da" gooki lid jhungshug dangain" ngoo nang ri byid: to" ziri myid boin: we'. Apyaid atoo: nanu" ri byid: da" gamboem khyo" hau: joem ri nang yo' re" amyed ashen yiri ngoo byid: da:.
9 Gyeung" shang: thang da" xoin" joem mo phoin: moo anghe' ngei" da" xoin" joem nghoid da" vhoo: mo xoin" joem we' nanu" shid re" nghoid da:. Hau: joem gi shivoo: xoin"- yooboo khyoid xoin" yo' nyheing feing byid: da" xoin" joem nghoid da:. Gyeung" shang: xoin" khyo" ngoo ri shugbyid: da" xoin" ja: khang" moo" gi nang yo' re" yuggi zoo: yi shid re" nghoid da:.
10 Nanu" gi he: ziri gyeung" shang: joyoo moo zoo: ca" ago". Hau: ziri yuggi yi za: zoo: ge'. Hau: joem ri gyeung" shang: da" ja: khyo" myid jhoo: we'.
11 Xo' wigi Israela byumyu" yi khyo" ngoo ri byid: da" gootu: gooki lid alu: jhungshug ce: ja: ri we' nanu" shid re" nghoid loo wa. Ngoo hau: ziri nang yo' re" yuggi zoo: yi re" myiyi: zoo: yi shid re" ju" loo wa da" ayo, dangain" moo byid: wa zi nghoid. Thung" khyo" younglho' da" re" yhoem: byu yugkhang" moo" gi hau: ziri ge zo: da:.
12 Israela byumyu" yi ngoo ri zain khang" moo" byid: boem da: xang: shi" myeing lho: ge thang da" zhainloin: xu:- zabyid yhid: yo' gugzoo mei loem: dangain" ziri ngoo nanu" ri byid:.
13 Hau: zi dangain" gi nang seing: wa zi nghoid. Thung" khyo" younglho' da" re" yhoem: byu dangain" gi hau: ziri ge zoo: wa nghoid.
14 Israela byumyu" yi myid phyed lho: ngoo ri shugbyid: da" ja: khang" moo" nang seing: wa zi nghoid.
15 Israela byumyu" yi ngoo ri shug byid: da" zooshid" yo' xang: shi" xang" da" gougnyhoug we' nang seing: wa zi nghoid. Nghoid loug we' nang gi zooshid" yugkhang" moo" ri doem tau" qei yu da" aphoug" ri khab yu ca" da:. Houg: lho: thung" khyoo" ayung" alho' da" xang: shi" xang" da" gougnyhoug du: khang" moo" doem tau" qei yu da" aphoug" ri khab yu ca" da:.
16 Zooshang: yiri gi tarha" vang da" azhang ri cang wigi gu tu' to" da" ngei wim: pyi" yo' apyaid lhammoo" dakhyab ri doem tau" qei yu wa zi nghoid.
17 Nghoid loug we' xang: shi" xang" da" nu:- yang yo' coidbaid joem rigi ayo" doem qei yu wa. Houg joem bain sho' ngoo seing: wigi xoin" ngei" byid: goo" wa zi nghoid. Houg joem da" suid" ri phoin: moo: foid goin: wigi houg joem da" xu: ri zoo: noem xoin" khyo" nghe' ngei" we'. Hau: main shoem: gi ngoo ri vho: ngei nhang: da:.
18 Hau: joem mo yang gang shoo" yo' gooki lid xoin" mo lo, yo pung sain: yhang: ti" shoo" gi nang seing: wa zi nghoid.
19 ?Israela byu yi wigi ngoo ri shugbyid: go" da" gooki lid alu: jhungshug dangain" ri nang yo' re" yuggi zoo: myiyi: zoo: yiri ju" loo wa da" ayo, dangain" moo ngoo byid:. He: zigi nang yo' re" amyed ashen yi yo' ngoo to" to" da" ayo" byo, yoin" da" dang: theing nghoid da? ga: tid.
20 Aseing gi Arun ri ?Nang gi hau: jonu" mid ri yo" shoug" yu wa zi angoid. Houg: lho: Israela mung" mo kha: joyoo ri we' nang ri akho' byid: wa. Ngoo Aseing nyang: nang ca" gu: dangain" nghoid? ga: tid.
21 Aseing gi ?Israela byumyu" yi ngoo ri shug byid: boem da" daxi: boem mo daboem dangain" gi Levi bang: ri ngoo byid: too" bye:. He: zigi nga" shidkhoin" Zoem" moo goin coung: byid: da" nyangnu" zei: moo" zoo" shid re" aphoug" jhungshug nghoid da:.
22 Gootu: Israela byumyu" yigi Zoem" khyoo: age tain" yhi: wa. Hougsu" khyo" nya: shid: khyoo: nyang: sho: zi nghoid.
23 Akhid" mo gi Levi yi kyeing" Zoem" ri goin coung: wigi hau: shid re" yoovoin dangain" ri voin vu, loo goo" wa. He: zigi re" amyed ashen yi khanham we' cang yhe: nyid wa da" tarha" nghoid. Levi bang: gi Israela mung" mo jonu" ri apyaid atoo: yo" seing wa zi anghoid.
24 Ciwim ga ri Israela byumyu" yi gooki lid alu jhungshug khyo" ngoo ri shugbyid: goo" da" daxi: boem mo daboem ri nyangnu" da" jonu" khyo" nyangnu" ri ngoo byid: too" bye:. He: zigi nyangnu" Israela mung" mo jonu" ri apyaid atoo: ayo" seing: go" wa ein: nyangnu" ri ngoo tid zi nghoid? ga: tid.
25 Aseing gi Moshe ri
26 Levi byu yiri tid wa shid re" amyeing" byid: zigi ?Nanu" gi Aseing wigi nanu" da" jonu" khyo" byid: da" Israela byumyu" yi mo daxi: boem mo daboem ri shoug" khab yu uri nanu" gi gooki lid alu: jhungshug khyo" Aseing ri daxi: boem mo daboem ri byid: ca" wa zi nghoid.
27 He: gooki lid alu: jhungshug gi yoo koid su: da" gug seig mei seig yo' zabyid seig ri shugbyid: da" xoin" yo' du da" khyo" myid jhoo: byid wa zi nghoid.
28 Hid: su" khyo" wigi nanu" gi Israela byumyu" yi jang" mo yo" khab yu da" daxi: boem mo daboem dangain" ri Aseing seing: da" gooki lid alu: jhungshug ri nanu" yo" shugbyid: wa zi nghoid. Nanu" gi Aseing shid re" he: gooki lid alu jhungshug gi khainjung Arun ri byid: wa zi nghoid.
29 Nanu" yo" kham: yu jang" mo ge thang ziri byid: ge'.
30 Yoo koid su: nya: xoin" ri bain ngei" thang: ri deing da" gu: ri zheing" to" ziyo' dayhang: ti" ge thang da" du ri nanu" bain shugbyid: thang: ri deing da" gu: ri nanu" yo" zheing" too" wa zi nghoid.
31 Deing da" gu: ri khamoo: nghoid nghoid nang yo' re" yhoem: byu yi yo" zoo: wa nghoid. Ciwim gari: Zoem" moo nanu" voin vu, byid: da" moo" shid re" vhoo" kung: phoug" nghoid da:.
32 Nanu" gi Aseing ri ge thang ziri shugbyid: nyid cang cang gi hau: ziri nanu" zoo: loug nanu" yooboo yo" loo wa zi anghoid. Nghoid loug we' ge thang da" gu: ri ashugbyid: shi" ri hau: jhungshug joem mo daja: ja: ri zo: da" khyo" wigi Israela byu yi da" gyeung" shang: da" jhungshug joem ri ayung" alho' akoid wa shid re" zid" nyid ge'. Nanu" hougsu" koid lang" nanu" said pyam zi shoug" ri" goo" wa ein: tid we'? ga: amyeing" byid: bye:.