15
1 Aseing gi Moshe ri
2 Israela byumyu" yiri nyang: byid: wa nghoid da" mung" moo yhe: phau" myang: cang yhe: nyid wa shid re" vhoo: mo thung" ri: joem ri byid: da:.
3 Aseing ri nghe' ngei" da" xoin" khyo" we' thang" cab ri pyeing da" xoin" khyo" we' myid bau" yoo mo byid: da" xoin" khyo" we' main: main: koid da" laloem lakhoug: pui" moo byid: da" xoin" khyo" we' Nuloo:- yang loo:- yang anghoid lang" coidbaid dadu: ri yo" shugbyid: da:. He: zoo: noem xoin" joem da" shoem: gi Aseing ri vho: ngei nhang: wa zi nghoid.
4-5 Aseing ri nghe' ngei" xoin" khyo" yang anghoid lang" coidbaid ri shugbyid: da" yug hang" nghoid loug we' shivoo: xoin" khyo" gougnyhoug du: khang" moo" yo' dage" zhainloin: xu: eig parheing" yo' lheig to" da" cen: moin" phei" dakyen" jain" zabyid yhid: eig parheing" ri ci: yhi: wa zi nghoid.
6-7 Yang loo: ri shugbyid: lang" shivoo: xoin" khyo" zhainloin: xu: soem" parheing" jain" yo' lheig to" da" cen: moin" phei" dajoid: jain" zabyid yhid: soem" parheing" jain" yo' dage" ci: yhi: wa zi nghoid. He: xoin" da" shoem: gi Aseing ri vho: ngei nhang: wa zi nghoid.
8 Nuloo: ri nghe ngei" xoin" khyo" anghoid lang" thang" cab ze" pyeing da" xoin" khyo" anghoid lang" zoem" khau: xoin" khyo" Aseing ri shugbyid: lang"
9 zhainloin: xu: myid: parheing" yo' lheig to" da" cen: moin" phei" soem: kyen" jain" nghoid da" shivoo: xoin" yo' dage"
10 Zabyid yhid: myid: parheing" ri shugbyid: wa zi nghoid. He: xoin" da" shoem: gi Aseing ri vho: ngei nhang: wa zi nghoid.
11 He zigi nuloo:- yang loo:- yang- coidbaid du: khang" moo" yo' dage" shugbyid: wa zi nghoid.
12 Gougnyhoug dadu: tho' je wigi shugbyid: uri bo shugbyid: da" xoin" joem ri toeb toeb za: tu to" wigi koid wa zi nghoid.
13 Israela mung" byu yugkhang" moo" gi zoo: noem xoin" ri ngei: byid: lang" hid: su" koid wa zi nghoid. Hau shoem: gi Aseing ri vho: ngei nhang: wa zi nghoid.
14 Houg: lho: nanu" phung: moo: nyid da" tungbau byu- daso' dadam nyid yug nghoid ri nghoid yhoem: yang: yooyang: yo' nyid yug nghoid ri nghoid Aseing vho: ngei da" xoin" shoem: zoo: noem xoin" ri shugbyid: nghoid rigi nyang: gi hau: thung" tarha" joem ri nyang: cang wa zi nghoid.
15 Ju" loo wa da" ayo, dangain" moo: hau: thung" tarha" joem gi nanu" adang moo: yo' nanu" phung: moo: nyid da" tungbau byu yi dang moo: dakhyo" kyeing" nghoid jo, wa zi nghoid. Nanu" yo' nyangnu" gi Aseing shidkhoin" moo: dakhyoo" ti" nghoid da:.
16 Tarha" joem yo' thung" ri: joem gi nanu" dang moo yo' nyangnu" dang moo: dakhyoo" ti za: nghoid nyid wa zi nghoid.
17 Aseing gi Moshe ri
18 Israela byumyu" yiri nyang: byid: wa nghoid da" mung" moo yhe: phau" myang: cang yhe: nyid: wa shid re" vhoo: mo thung" tarha" joem ri byid: da:.
19 Hau: mung" mo thu da" zoo: noem ri nanu" zoo: lang" houg: mo dayham" ri Aseing ri byid: da" gooki' lid jhungshug khyo" gootu: kho' too" wa nghoid da:.
20 Nanu" zooyho' koid uri gugshi" meishi" seig yo' koid da" xang: shi" mo zooyho' ri gooki lid da" jhungshug khyo" Aseing ri shugbyid: wa zi nghoid. He: ziri nanu" nang: yu da" shivoo: mo gooki lid jhungshug khyo" shugbyid: ziyo' dayhang: ti" nyang: shugbyid: wa zi nghoid.
21 Ju" loo wa da" ayo, dangain" moo: nanu" koid da" zooyho' mo he gooki lid jhungshug Aseing ri byid: goo" wa zi nghoid.
22 Nghoid loug we' dayug yug gi Aseing wigi Moshe ri byid: to" da" hau: thung" tarha" joem ri pa: yhi: akoid loo: za: cang wa zi ze" lhid: pyam ein: shang
23 Houg: lho: ju" loo wa da" ayo, moo: shava byu yigi Moshe khyo" Aseing wigi amyeing" byid: to" da" ja: khang" moo" ri ze" lhid: pyam ein: shang
24 Shava byu yigi aboin: asoo" wigi ze" shoid nghoid rigi nyangnu" gi shivoo: xoin" yo' zabyid yhid: xoin" yo' dage" main shoem: Aseing ri vho: ngei nhang: da" nghe' ngei" xoin" khyo" nuloo: dadu: ri nghe' ngei" byid: goo" wa zi nghoid. Xo' lung: wigi nyangnu" gi yooboo khyoid xoin" khyo" coidbaid loo: dadu: ri we' ngei" byid: goo" wa zi nghoid.
25 Khainjung phoo gi hau: shava byu yi shid re" thung" khyo" younglho' byid: da" khyoo: koid wa zi nghoid lho: nyangnu" gi yooboo khyoid pyam byid: zi shoug" goo" wa. Ciwim gari: shoid vhang: lo" zigi pa: yhi: koid zi anghoid ziyo' nyangnu" gi nyangnu" yooboo khyoid xoin" ri zoo: noem xoin" yhang: ti" Aseing jang" khyoo: ci: ri" yoomo nghoid.
26 Yugkhang" moo" gi shoid vhang: ziri bang bang xab boem yoomo Israela shava byu phung: goin" yo' nyangnu" phung: moo: nyid da" tungbau byu yigi yooboo khyoid pyam byid: zi shoug" goo" wa.
27 Dayug su: za: pa: yhi: akoid loo: yooboo shoid nghoid rigi nyang: gi yooboo khyoid xoin" khyoo" dazain byeung" da" coidbaid moo" dadu: ngei" byid: wa zi nghoid.
28 Khainjung phoo gi byu hau: yug da" yooboo ri younglho' byid: wa shid re" phoin: moo: thung" khyo" kyeing sain byid: khyoo: koid wa zi nghoid lho: hau: yug gi yooboo khyoid pyam byid: zi shoug" wa.
29 Israela mung" byu nghoid nghoid houg moo nyid nyid da" tungbau byu yi nghoid nghoid pa: yhi: akoid loo: za: yooboo shoid mo, yugkhang" moo" gi thung" tarha" ri dakhyoo" ti" za: ci: wa zi nghoid.
30 Nghoid loug we' byu dayug gi mungdain: byu nghoid ri nghoid tungbau byu nghoid ri nghoid pa: yhi: koid wigi yooboo shoid nghoid rigi Aseing ri aphoug" akhyoid koid da" yooboo yoo" su: nghoid wigi nyang: gi said pyam zi shoug" wa zi nghoid.
31 Ciwim gari: nyang: gi Aseing dang: ri ngeug pyam lho: nya: amyeing" dang: joem mo daloem ri pa: yhi: koid wigi shoid pyam bye: zi nghoid. Nyang: gi shid: wa moin: su: nghoid da:.
32 Dalheing: ri Israela byu yigi dain" pyoid yoo moo nyid shi" da" uri byu dayug Dougno: Bidnyid ri thang" sho: nyid ziri yhe: myang ago".
33 Nyang: gi Moshe- Arun yo' shava byu phung: khyoo: shu" lo" zi shau" wigi
34 Zung" nyid zi shau" da:. Ciwim ga ri nyang: ri khasu" koid wa ziri nyeing" asi shi" yoomo nghoid
35 Hau: thang: Aseing Moshe ri ?Hau: yug ri said pyam ca" da:. Shava byu yi dangain" gi nyang: ri dab tunggung shoid moo: lugboem yo' du" said pyam wa zi nghoid? ga: tid.
36 Hougsu" shava byu yigi Aseing amyeing" byid: ziyo' dayhang: ti" hau: yug ri dab tunggung khyoo: shu" yhe: wigi nyang: ri lug boem yo' du" said pyam ago".
37 Aseing gi Moshe ri
38 Israela byumyu" yiri tid kyoo" wa shid re" amyeing" byid: zigi ?Nanu" da" byimi thang: moo: bain: byau tab ge'. Bain: byau thang: khang" moo" moo mougnyoug tei" tab ge'. Nanu" gi he: ziri ju" loo wa da" ayo, dangain" moo koid nyid ge'.
39 Hau: bain: byau gi myid boin: nhang: nyid wa shid re" nghoid wigi nanu" hau: bain: byau ri myang khang" moo" nga" amyeing" dang: ri boin: so" re" wigi hau: joem ri cang koid boem wa nghoid. Houg: lang" nanu" gi nga" jang" mo aphug lo" byug wigi nanu" nyang: vho: ngei shoid khyoo: acang yhi: goo" wa zi nghoid.
40 Hau: bain: byau gi nga" amyeing" dang: dangain" ri cang yhi: wa shid re" nanu" ri boin: nhang: wa zi nghoid. Houg: lho: nanu" gi ngoo wigi bain sho' seing: da" mo, bui" wa zi nghoid.
41 Ngoo gi nanu" Aseing Mangsoo nghoid. Ngoo gi nanu" Mangsoo bui" nyid wa shid re" ngoo nanu" ri Egutu mo shu" thu lo zi nghoid. Ngoo gi Aseing nghoid? ga: tid.