8
1 Lhammoo'' nyhed khyab ein: khyab ju'' ri Israela byumyu"'' yigi nyang: yug nya: voogung joem ri yo'' de: nyid boem abye: go''. Hau: lhammoo"' khyab xang: shi'' nyid' ri nyangnu"' dangain"' bang: gi Yerusalem gyid khoem" moo'' akhoug: shoid shava jang: moo: phung: foem: nyid boem ago''. Nyangnu"' gi khainjung we' nghoid- Aseing wigi Moshe khyo" Israela byumyu" yiri byid: da" tarha" ri si' su: Ezra ri Tarha" mougsoug" pug yu byid: wa shid re" mho' ago".
2 Houg: yoomo Ezra gi yuggi yi myiyi: yi yo' se' gyoo: wa yhi' nheigboo bye: da" zooshang: yi phung: foem: nyid da" joyoo khyoo: hau: tarha" pug ri ci: loo byid: da:.
3 Hau: khoem" moo" nam mo shava jang: moo nab soin: no' mo zi bid gung tu: sho' nyangnu" ri tarha" nghab kyo" da:. Houg: lho: nyangnu" gi myid boo tung" tam" gyoo: yu ago".
4 Ezra gi hau: moo" shid re" zhug to" da" seig gyam" tho' moo: yab jo, da:. Vhoo: mo yuggi yigi nya: lo, yo shoid moo yab ago". Matithia- Shema- Anaia- Uria- Hilkia yo' Maseia bang: nghoid ago". Nya: da" lo, kung" shoid moo yab bang: gi Pedaia- Mishaela- Malkhiya- Hashum- Hashbadana- Zekharia yo' Meshulam bang: nghoid ago".
5 Byu dayab koo: myang: da" gyam" to' moo Ezra yab jo, da" uri nyangnu" dangain" bang: myojid" joem gi nyang: ri zhug yu" nyid ago". Nyang: hau: mougsoug ri phang kaid yo' dage" nyangnu" dangain" to' yab re" ago".
6 Ezra gi ?Gyi: sheing: da" Mangso- Aseing ri coung" boem ge'? ga: tid da:. Meing: byu dangain" bang: gi nyangnu" da" lo, joem ri mougkhung: khyoo: tu: to' kaid lho: ?Amen Amen? ga: phug tid ago". Nyangnu" gi poid thug thug lho: myidgung khyoo: nyangnu" da" myonhoo: ri goeb pid wigi coung" boem ago".
7 Hau: thang: nyangnu" to' re" wigi nyang: yug nya: joyoo moo yab jo, ago". Houg: lho: vhoo: moo bo da" Levi byu yigi nyangnu" ri hau tarha" ri sho' kyo' ago". Yeshua- Bani- Sherebia- Yamin- Akub- Shabethai- Hodia- Maseia- Kelita- Azaria- Yozabad- Hanan yo' Pelaia bang: nghoid ago".
8 Nyangnu" gi Mangso da" tarha" ri nhoid khyo" phug kyo" lho: meing byu yi hau: ziri se' gyoo: sho' tid sho' kyo" ago".
9 Byumyu" yigi hau: Tarha" wigi mho' ziri shoug" gyoo: lang" nheigloem: loeb re" boem wigi gye" ngau re" ago". Houg: yoomo mung" zoug: Nehemia- khainjung yo' tarha" ri si' su: Ezra yo' tarha" ri tid sho' kyo" da" Levi byu yigi mung" byu yiri he: ziri tid kyo" ago". ?He: bidnyid gi nanu" da" Aseing Mangso shid re" gyeung" shang: da" bidnyid nghoid yoomo nanu age koug age ngau goo" wa.
10 Akhid" yhoem: khyoo: lo" wigi zoo: shug pui" lo" koid ge'. Atham: zoo: shug bang: ri nanu" da" zoo: noem yo' zabyid yhid: ri kaid byid: ge'. Akhid" nyid" gi ngoonu" da" Aseing shid re" gyeung" shang: da" bidnyid nghoid. Houg: lho: akug goo". Ngoonu" ri Aseing byid: da" ngei pyo: khyoo: gi nanu" ri yoem: boo nhang: ri" wa? ga: tid ago".
11 Levi byu yigi mung" byu yi jang khyoo: sam: za: cang so" yen" wigi houg yhang: te" gyeung" shang: da" bidnyid moo akug: goo" wa shid re" cang tid kyo" da:.
12 Houg: yoomo mung" byu yigi yhoem: khyoo: lo" wigi ngei pyo: tung" zoo: shug pui" koid ago". Nyangnu" yo" ziri gootu: byu yi yo' gam zo: wigi nyid ago". Ciwim gari nyangnu" gi nyangnu" ri nghab kyo" ziri se' gyoo: yoomo nghoid ago".
13 Thang: nyid" byumyu" kung: yi da" vhujhung: yigi khainjung yi Levi byu yi yo' dage" tarha" moo jhau" shid to" gu: ri jhau" yu wa shid re" Ezra jang yhe: boem ago".
14 Nyangnu" gi Aseing wigi Moshe khyo" byid: to" da" tarha" mo Israela byumyu" yiri zoem" pui" ayo, gu: moo daso' dadam mo zoem" joem moo nyid wa shid re" amyeing" byid: to" ziri shau" myang yu ago".
15 Houg: yoomo nyangnu" gi Yerusalem yo' gootu: voomoo" joem yo' voogung joem khyoo: vhoo: moo bo da" jhau" shid khyoo: joem ri lhid" pyo: kaid ago". ?Boug gung joem khyoo: thu yhe: lho: shithang: gam Zhainloin: gam Shug gam joem Thab gam joem yo' gootu: seiggam joem mo seig kung: joem ri yu wigi tarha" moo bo da" jhau" shid khyoo: joem ri cang lho: zoem" joem ri koid ge'? ga: tid ago".
16 Houg: yoomo mung" byu yiri seig kung: joem ri yu lho: nyangnu" yhoemkhung: dang joem moo nyangnu" khyam: vang" joem moo Noku Yhoem: Moo" vang" joem moo yo' gyid khyam: khoem" moo" yo' Ephrim khyam: khoem" moo" nam mo shava jang: pa: joem moo zoem" koid nyid ago".
17 Myheig yu shoug" jang" mo doem tau" loo mo, dangain" bang: gi zoem" joem koid lho: lung" ago". Nun da" yuggi zoo: Yoshu da" pyaid mo hau: ayo, ju" sho' moo xang: shi" lheing: doem koid da" lheing: nghoid lho: yugkhang" moo" gi nheigloem: zhang" wigi ngei pyo: boem ago".
18 Pui" xang: shi" nyid" mo lo" thang nyid" ju" sho' Mangso da" tarha" mo dadu du ri nyid" khang" nyid" nghab ago". Nyangnu" gi nyhed nyid" pui" koid lho: shed nyid" ein: nyid" moo tarha" moo bo ziyo' dakhyo" pui" pain' khyoo: koid ago".