11
Vhujhung: yigi Yerusalem moo de: nyid boem ago". Deing da" mung" byu yigi gyeung" shang: Yerusalem moo yhe: nyid wa shid re" daxi: kung: mo dakung: khyen: yu wa me" lab boem ago". Deing da" bang: gi gootu: voomoo" joem yo' voogung joem moo nyid ca" goo" wa zi nghoid. Yerusalem moo yhe: nyid wa shid re" nyang: nya: myid khyo" yhi: bang: yugkhang" moo" ri mung" byu yi coung" boem ago". Gootu: voogung joem yo' voomoo" joem moo gi Israela byumyu" yi khainjung yi Levi byu yi Noku Yhoem: Moo" moo moo" zei: bang: yo' Sholumon da" dei zoo: yi da" amyed ashen yigi nyangnu" nya: voogung joem moo nyid boem ago".
Vhoo: moo zhayhen" bo da" bang: gi Yerusalem moo nyid da" Yuda mung" du mo vhujhung: koid da" voobyu yi nghoid ago". Yuda akung: moo bo boo bang:
Uzia da" nya: yuggi zoo:- Zekharia da" nya: myid: zoo: Athaia. Nya: da" phoug" phyid" gootu: gu: moo bo boo bang: gi Yuda da" yuggi zoo: Pereza da" amyed ashen yi nghoid boem da" Amaria- Shephatia- yo' Mahalalela bang: nghoid ago".
Barug da" nya: yuggi zoo:- Kholhoze da" nya: myid: zoo: Maseia. Nya: da" phoug" phyid" gootu: gu: moo bo boo: bang: gi Yuda nya: yuggi zoo: Shela da" amyed ashen yi nghoid boem da" Hazaia- Adaia- Yoiarib- yo' Zekharia bang: nghoid ago".
Pereza da" myid: zoo: yi mo Yerusalem moo nyid da" myeing gyi: gyizoo: yi gi 468 yug nghoid ago". Benyamin akung: moo bo boo bang:
Meshulam da" nya: yuggi zoo:- Yoeda da" nya: myid: zoo: Salu. Nya: da" phoug" phyid" gootu: gu: moo bo boo bang: gi Pedaia- Kolaia- Maseia- Ithiela yo' Yeshaia bang: nghoid ago".
Gabai yo' Salai gi Salu da" bidnoem seing" tain" nyang: nghoid.
Yerusalem moo nyid da" Benyamin kung: bang: mo dangain" gi 928 yug nghoid ago". Zikhri da" yuggi zoo: Yoela gi nyangnu" da" vhujhung: nghoid lho: Hasenua da" yuggi zoo: Yuda gi hau: voomoo" mo asoo" eig ein: da" azhang mo moo" voin' ludaid nghoid da:. 10 Khainjung yi
Yoiarib da" yuggi zoo: Yedaia yo' Yakhin.
11 Hilkia da" nya: yuggi zoo:- Meshulam da" nya: myid zoo: Seraia. Nya: da" phoug" phyid" gu: moo bo boo bang: gi Zadog- Meraiod yo' khainjung moo" bue" lid lo da" Ahitub bang: nghoid ago". 12 Noku yhoem: mo dei byid: nyid da" he: kung: mo byu dangain" gi 822 yug nghoid da:.
Yeroham da" yuggi zoo:- Pelalia da myid: zoo: Adaia. Nya: da" phoug" phyid" bang: moo bo boo bang: gi Amzi- Zekharia- Pashura yo' Malkhiya bang: nghoid ago". 13 He: kung: mo 242 yug gu: gi yhoemkhung: joem mo vhujhung: yi nghoid.
Azarela da" yuggi zoo:- Ahzai da" myid: zoo: Amashsai. Nya: phoug" phyid" bang: moo bo boo bang: gi Meshilemod yo' Imera tang: nghoid. 14 He: akung: mo 128 yug gu: gi myeing gyi: da" gyizoo: yi nghoid. Nyangnu" da" vhujhung: gi Zabdiela nghoid. Nyang: gi ikoin deungkhu: ri vhu" she: da" jang" moo bo boo su: nghoid. 15 Levi byu yi
Hashub da" yuggi zoo:- Azrikam da" myid: zoo: Shemaia. Nya: da" phoug" phyid" yi moo bo boo bang: gi Hashabia yo' Buni tang: nghoid da:.
16 Shabethai yo' Yozabad gi Noku Yhoem: Moo" tunggung shoid mo moo" ri shu" vhu" she: zei: da" vhujhung: Levi byu nghoid ago".
17 Zabdi da" myid: zoo:- Mikha da" yuggi zoo: Matania gi Asab da" amyed ashen' dayug nghoid. Nyang: gi Noku Yhoem: Moo" moo akyu" mho' dang: yo' jeju" boin: jikhoin" khoin" da" jihkoin" phung: ri shu" vhu" shi: su: nghoid da:.
Bakbukia gi Matania da" pang" thoug yug nghoid da:.
Galala da" myid: zoo:- Shammua da" yuggi zoo: Abda gi Yeduthun da" amyed ashen dayug nghoid da:.
18 Gyeung" shang: voomoo" Yerusalem moo nyid da" Levi byu yi dangain" gi 284 yug nghoid ago". 19 Noku Yhoem: Moo" zung" bang:
Akub- Talamon yo' nya: eig yug da" bidnoem seing" tain" yi dangain" 172 yug nghoid ago".
20 Deing da" Israela mung" byu yi yo' nyid deing boem da" khainjung yi Levi byu yigi Yuda mung" mo nyangnu" nya: voomoo" joem yo' voogung joem moo nyid boem ago". 21 Noku Yhoem: Moo" moo moo" zei: da" bang: gi Ophela ga: da" Yerusalem voogung dadu moo nyid lho: Ziha yo' Gishpa eig yug yu" coung: nyid da" akhoug: moo moo" zei: ago".
22 Yerusalem moo nyid da" Levi yiri yu" coung: yug gi Hashabia da" nya: myid:- Bani da" yuggi zoo: Uzi nghoid da:. Nya: da" phoug" phyid" yi moo bo boo bang: gi Matania yo' Mikha nghoid wigi nyang: gi Noku Yhoem: Moo" mo music phung: moo moo" voin da" Asab kung: mo nghoid da:. 23 Nyid" khang" nyid" Noku Yhoem: Moo" moo music phung: ri kha: kung: bang: kha: ayoeb ein: zi cang lho: lo, zei: wa zi tid to" da" khokham tarha" joem jo, da:.
24 Yuda byumyu"- Zera kung: mo Meshezabela da" yuggi zoo: Pethahia gi Persi khosen tarha" yung" moo Yuda byumyu" yi da" gungthid bui" yug nghoid da:.
25 Meing: byu myoo" sho' bang: gi nyangnu" da" yoothung" dain" yo' jhang da" voogung joem cang nyid boem ago". Yuda byumyu" yigi Kiriad Arba- Dibon yo' Yekabzela yo' hau: voomoo" joem anam moo jo, da" voogung joem moo nyid ago". 26 Nyangnu" gi Yeshua- Molada- Bethpeled 27 Hazarshuala- Berashe voomoo" joem yo' hau: joem ri lheing khoem to" da" voogung joem moo we' nyid boem ago". 28 Nyangnu" gi Mekhona mo Ziklag voomoo" yo' hau: joem 29 Enrinon- Zora- Yarmud- 30 Zanoa- Adulam- yo' hau: voogung joem aqei: ayam moo jo, da" voo joem moo nyid boem ago". Nyangnu" gi Lakhisha moo yo' aqei: ayam mo yoothung" dain" joem yo' Azeka yo' hau: voo joem moo nyid ago". He: zigi Yuda mung" byu yigi mougpyi: shoid Bersheba yo' mougzhung: shoid Hinnom lang: khung" agyoo: mo mougmyid moo nyid ein: zi nghoid da:.
31 Benyamin byumyu" yigi Mougzhung: shoid Gaba mo zi: Mikmasha- Ai- Bethela yo' aqei: ayam mo voo joem 32 Anathod- Noba- Anania- 33 Hazora- Rama- Gitaim- 34 Hadid- Zeboim- Nebalad- 35 Loda- Ona yo' lo, moo" zei: bang: lang: khung" moo nyid boem ago". 36 Yuda mougmyid moo nyid da" Levi byu phung: dayham" gi Benyamin byumyu" yi yo' dage" nyid wa kho' byid: zi shoug" ago".