5
Akhid" byu ajoem atung: ri shau" myang lang" hau: bouggung tho' khyoo: nyang: do, loo" bye:. Bouggung tho' moo lo" zhung: jo, ri nya: cangzoo: yi zeing: lo boem lho: wigi Nyang: dang: phang lho: nyangnu" ri ngilho' wa da" tarha" kho" kyo" da" zigi
(Luk 6.20-23)
?Venyi: moo asho" ajhen: nghoid nyid mo, gi ngilho' boem wa.
Khasu" wim gari Mougkhung: da" mungdain: gi
nyangnu" shau" seing: boem wa zi nghoid.
?Koug shu: shau" mo, gi ngilho' boem wa Khasu" wim gari
Mangsoo nyangnu" nyang: ri nheig teing byid: zi shau" boem wa.
?Nheigloem: nu" nham' mo, gi ngilho' boem wa.
Khasu" wim gari nyangnu" nyang: gi
Mangso dang: theing to" da" mainkaid jeju" yo" yu boem wa zi nghoid.
?Mangsoo vho: da" khyoo: ri vho: ngei nyid mo, gi ngilho' boem wa.
Khasu" wim gari nyangnu" nyang: vho: da" khyoo: ri we'
Mangsoo wigi jhoeb pyeing byid: wa zi nghoid.
?Subi" ri nheig se' khyeig mo, gi ngilho' boem wa. Khasu" wim gari
nyangnu" nyang: ri Mangsoo nheigkhyeig zi doem shau" boem wa.
?Nheigloem: yung" mo, gi ngilho' boem wa. Khasu" wim gari
nyangnu" nyang: gi Mangsoo ri shau" myang boem wa.
?Shapyoo: si' mo, gi ngilho' boem wa.
Khasu" wim gari nyangnu" nyang: ri
Mangso da" nya: zoo: ga: myheing: byid: boem wa.
10 ?Mangso da" deingmain" khyoo: cang yoomo
pyi: sho: dam kaid zi shau" nyid mo, gi ngilho' boem wa.
khasu" wim gari Mougkhung: mungdain: ri nyangnu" nyang: shau" seing: boem wa.
11 ?Nga" da" khyoo: yoomo subi" nanu" ri juang" yi lho: yooboo aja: ja: foin: to" uri nanu" gi ngilho' bye:. Nanu" da" shid mo Lapi: yi ri we' nyangnu" houg: su" shen" yhen boem ziyo' mhau' fain" khyo" cang lho: xangshid" mo lapi: yi ri we' houg: yo" dakhyoo" ti" pyi: sho: boem bye:. 12 Gauyi zoore pyoo" pyoo: danyid ge. Khasu" wim gari mougkhung: tho' moo nanu" da" vhookung: phoug" gi gye" myo: jo, bye:.
(Mar 9.50; Luk 14.34, 35)
13 ?Nanu" gi mougmyid da" xoo" yo' du ago"- hau: xoo" phue: lo" byug rigi kha: mo doem se' ngham" loo wa lha". Nghi: khyoo: she: pyam to" lho: subi" nang: pye" pyam tho' moo gootu: ce" akyu" we' aboo loo.
14 ?Nanu" gi mougmyid bidbang yo' du ago"- boem tho' moo tam: to" da" voogung ri ce: ziwe' ayo" go too. 15 Myibung: ri tab' lho: lain" wigi hang" azhung" lhung to" yu"- myibung: ki" jang: moo ke" to" rigi dayhoem: goin" mo, myo, yo" myang. 16 Houg: su" wigi subi" gi nanu" da" ge moozoo" ri yo" myang lang" gi Mougkhung: tho' moo nyid da" nanu" da" nya: phoo' ri yo" coung" nghei byid: goo" baja"- nyangnu" da" shidkhoin" moo nanu" da" bidbang ri thoin" pang too" byid: ge" o".
17 ?Moshe toung: to" da" tarha" yo' Lapi: yi da" dang: ri ngoo phyo' pyam wa yhangti" amyid wim goo"- phyo' pyam wa shid re" anghoid hau: ziri joeb pyeing wa ein: ngoo dare. 18 Nanu" ri ngoo deing" deing tid ba- Mougkhung: yo' myidjang abyo, loo" shi" ri hau: zi abui" bui" gi hau: toung: to" da" tarha" mo dang: myhi' dakhoin" yo' dang: khyoo: dakhoin" we' yo" lid loo" wa zi anghoid. 19 Houg: su" yoomo hang" nghoid loug we' houg: mo nge da" tarha" dakhoin" ri cang lho: Subi" ri we' yo" cang sho' jhau" byid: mo, gi Mougkhung: mungdain: moo gyi: thang mo, ein: boem wa. 20 Khasu" wim gari ngoo nanu" ri tid da" zigi nanu" da" deingbyeing" khyoo: ri toung: to" da" tarha" ri jhau" byid: da" sara: yi yo' Pharishe yi da" deingbyeing" tho' moo aje gyi: rigi Mougkhung: mungdain: moo nanu" deing" deing ayo" vang lo" boem wa.
21 ?Nanu" byu ge said wa zi anghoid. Byu said su: gi yung" moo yooboo byid: moin: yi" ga: goonham mo, ri tid to" zigi nanu" shau" gyo: yu" boem bye:. 22 Ngoo nanu" ri tid da" zigi nya: mang: nya: nhung" ri nheig yoo: su: hang" nghoid loug we' yooboo byid: wa zi moin: yi" nyid bye:. Nya: mang: nya: nhung" ri yooboo hoeb' ga: tid su: we' hau: sayen" phung: mo dang: kho' gi" bye:. Hau: lho: koodau: he: zi ga: tid su: gi moovoo moug: myi: yo' moin: yi" nyid bye:. 23 Houg: su" lho: hau: Mangso da" phoin: tho' hkyoo:- re" da" xoin" jhungshug ci: yhe: lo" nghoid rigi re" mang: re" nhung" nang ri yooboo foin: jang: daja: ja: myid boin: lo nghoid rigi 24 Mangso da" phoin: nam moo re" da" xoin" ri too" kho' lho: re" mang: re" nhung" yo' shi" lo" sham: veing" goo" ge'. Houg: su" bain koid lho: re" da" xoin" ri Mangso da" phoin: tho' moo ki" we.
25 ?Nang ri jhen: dab goo" su: yo' dage" ayo, yoo" shi" uri myab myab sham: veing" goo" ge'. Houg: su" anghoid ri jhen: boo su: gi nang ri tarha" agyi yung" moo ab pyam ri" wa. Tarha" agyi gi nang ri dang: kho' da" sayen" yi da" lo, moo ab pyam wa nghoid wigi nang ri thung: khyo' pyam zi shau" wa. 26 Nanu" ri ngoo deing" deing tid da" zigi Ngei jhen: bain sho' nang axab' xab' gi houg: mo nang yo" loid lo" wa zi anghoid.
27 ?Sube" myi: age lhoid' ga: zigi nanu" shau" gyo: yu" boem bye:. 28 Ngoo nanu" ri tid zigi nheigloem: moo yu" ngei ziyo' myiyi: zoo: ri yu" yu" lho: vho: da" nheigloem: boo su: gi nya: da" nheigloem: khoug: moo hau: da" myiyi: zoo: yo' myi: lhoid' da" moo" zei bye:. 29 Houg: su" nghoid yoomo re" lo, yo' myojid" nang ri yu" shoid nhang: nghoid rigi hau: myojid" ri kyung" thoid pyam we' re" da" gung goin" moovoo moug: moo gyo" lo" tho' moo re" gung daja: te: byo, zigi je ge nyid. 30 Re" da" lo, yo lo, nang ri shoid nhang: nghoid rigi hau: lo, ri jab khyo' pyam we' gung goin" moovoo moug: moo gyoo" loo" wa tho' moo re" gung daja: te: byo, wa zi gi je ge nyid.
(Mat 19.9; Mar 10.11, 12; Luk 16.18)
31 ?Houg: za: we' anghoid- re" yhoem: seing: myhi' ri kang" pyam nau ri nyang: ri kang" kaid da" mougsoug" byid: we' ga: dang: jo, bye:. 32 Nghoid loug ngoo nanu" ri tid da" zigi lang lhoid yoomo za: anghoid rigi nya: myi: ri kang" pyam su: gi nyang: ri lang lhoid nhang: kaid zi nghoid. Houg: kang" pyam da" myiyi: ri lo, xo' yu su: we' sube" myi: lhoid' da" yooboo yoo" bye:.
33 ?Nang mhau' lho: jham' age tang:- nang nheung" da" dang: gi hau: Aseing wigi nang nyang: ri zang" loo nhang: wa ga: goonham mo, ri tid to" zi nanu" shau" gyo: yu" goo" wim bye:. 34 Ngoo nanu" ri tid da" zigi nanu" ce" ja: moo" moo we' nheing" go"- jham tang: go" da" khyoo: akoid goo". Mougkhung: myeing we' yo" yu zi anghoid. Houg: gi Mangso da" zhungtang nghoid. 35 Myidjang: myeing yu lho: we' jham' age tang:- houg: gi Mangso da" khyid: theing jang: nghoid. Yerusalem voogung ri we' anghoid. Houg: gi khokham zeing da" zhungtang nghoid. 36 Re" da" vhuloem moo we' jham' age tang:- re" da" xam: dakhaid rilang" phyu: we' no, we' ga: nang yo" koid: zi anghoid. 37 Re" da" dang: gi ?Nghoid? ga: lang" gi nghoid bye:. ?Anghoid? ga: lang" gi anghoid baja. Hau: tho' mo jain" tid da" dang: gi hau: age su: yo' dasen: nyid.
(Luk 6.29, 30)
38 ??Myo, dajid" moo dajid"- zei dakhaid moo dakhaid doem tau" byid: ca"? ga: da" dang: ri nanu" shau" gyo: yu" boem bye:. 39 Nghoid loug ngoo nanu" ri tid da" zigi akhyeing" su: ri ce" latoo: we' aphug goo"- re" lo, yo shoid boopyug pyoug byid: su: ri dashoid we' doem kham: byid: shi" we' 40 Nang ri dang: khoo' lho: wigi re" da" akhau: byi: yu pyam byid: su: ri re" da" tho' byi: we' khyoid byid: shi" we' 41 Nang ri doin: zeig nau wigi khyoo damain: yhi: nhang: su: yo' dage" khyoo: eig main: cang yhi: shi" we. 42 Mho' su: ri byid: we' re" jhang mo daja: ja: jhid" nghoo" noug su: ri we' ahe: pyam.
(Luk 6.27, 28, 32-36)
43 ??Re" byumyu" ri te: jheddab lho: re" gyivoo yi rigi anoug angei koid we'? ga: da" dang: gi nanu" shau" gyoo: goo" wim bye:. 44 Ngoo nanu" ri tid da" zigi nanu" da" gyivoo yi ri jheddab ge'. Nanu" ri shen" yhen mo, shid re" akyu" mho' byid: ge. 45 Houg: su" nghoid ri za: Mougkhung: tho' moo nyid da" phoo' Mangso da" nya: myid: nya: zoo: yi gi nanu" yo" bui" wa zi nghoid. Khasu" wim gari agi mo, yo" gi mo, da" tho' moo nya: bid ri thu' nhang: nyid wigi deingbyeing" mo, yo" adeung byeung" mo, da" tho' moo moug: ri voo byid: nyid. 46 Nanu" ri jheddab mo, ri za: jheddab nghoid rigi nanu" ce: akyu" boo wa lha". Kheung" khyu: zoo: mo, we' houg: su" koid: boem bye anghoid goo" la". 47 Nanu" da" nya: mang: nya: nhung" yo" za: shau" doem go" nghoid rigi ci: je nghoid cang boo goo" wa lha". Mangsoo ri asi shi" mo, we" houg: su" lhung koid: boem anghoid goo" la". 48 Houg: su" wigi Mougkhung: tho' moo nanu" da" nya: phoo' gi joeb byeung" nyid ziyo' dakhyoo" ti" nanu" we' joeb byeung" nyid ge.