4
(Mar 1.12, 13; Luk 4.1-13)
Houg: lang" yu satan jhuphyo' zi shau" baja" ga: gyeungshang: da" Venyi: gi Yesu ri dain" pyoid' yoo: khyoo: shu" lam" loo" bye:. Bidnyid myid: xi: nyid" voem: ashau" zoo: loo: lang" nyang: gi zoo gye" yoid nyid bye:. Hau: uri jhuphyo' su: yu satan ju" re" wigi ?Nang Mangso da" nya: zoo: nghoid deing rigi he: lugzeing ri zooyho' bue" loo we' ein: tid we'? ga: tid.
Yesu gi ?Byu gi zooyho' yo' za: kangso dei nyid zi anghoid. Mangso mungdang: bain sho' yo' kangso dayo" dei nyid? ga: tid.
Houg: lang" jhuphyo' su: yu satan gi Yesu ri gyeungshang: da" voogung khyoo shu" vang lo" lho: akyu" mho' yhoemkhung: myhang: thang jangmoo do, loo" nhang: lho: wigi ?Jhoem: mougsoug" moo
re" khyid: lugzeing moo azang" baja"-
nya: moug: lagyoo: yi da" lo, wigi vu, yu wa ga: tid to".
Nang Mangso nya: zoo: nghoid deing rigi houg: mo byam gyo" yu" we'?? ga: tid.
Yesu gi ??Houg: re" da" Aseing Mangsoo nang yo" ca: yu" wa zi anghoid? ga: jhoem: mougsoug" moo lhid" to"? ga: doem phoug tu".
Hau: thang: ri yu satan gi Yesu ri gye" myang: da" boem tho' khyoo shu" do, lo" lho: Mougmyid mungdain: dangain" yo' hau: zi joem khayhi' yung" bang da" khyoo: ri dalheung: dam lo" toin" shid lho: wigi Nyang: ri ?Nang ngoo ri dajhi' goeb pid nghoid rigi hid: myang gu: dangain" ngoo nang ri byid: wa? ga: tid.
10 Yesu gi yu satan ri hid: su" ga: doem tid. ?Satan we"- nga" jhang mo thu' loo" we. Khasu" wim gari nang gi ?re" Aseing Mangsoo ri za: vhu" pid pid ca"- Cung" nghei byid: ca"? ga: tid to" zi nang anghab yu" lha"? ga: phoug tid.
11 Houg: lang" yu satan gi Yesu jhang mo phang: loo" bye:. Hau: thang: ri moug: lagyoo: yi Yesu ri re" doo" zho" boem.
(Mar 1.14, 15; Luk 4.14, 15)
12 Babtisma sara: Yohan ri myheig bye: ga: da" khyoo: ri Yesu shau" gyoo: lang" nyang: gi Galile mung" khyoo: vang lo". 13 Nyang: gi Nazared voo moo anyid loo: za: Zebulon yo' Nabthali mung" mougkyoo"- Galile mung" yam mo Kapernaum Yesu da" voo moo lo" nyid nyid. 14 Hid: su" bue" loo wa da" khyoo: ri Lapi: Esaia tid to" dang: deing loo wa shid re" nghoid. Lapi: Esaia gi
15 ?Zebulon yo' Nabthali mung" moo
gyid nung" yam- Yodan gyid lang thei: tab cang
Tungbau byumyu" yi nyid da"
Galile mung.
16 Mougcoid khoug: moo nyid da" byumyu" gi
bidbang zeing ri myang boem wa.
shid: zoug: da" bid shoem: yoeb moo zhung: jo, mo, da" atho' moo
bidbang ju" ri" wa? ga: kho" kyo" to".
17 Hau: ayo, moo Yesu gi ?Mougkhung: mungdain: ju" ri bye yoomo nanu" da" yooboo mo nheigloem: thid' loo ge? ga: tarha" kho" shid" bye:.
(Mar 1.16-20; Luk 5.1-11)
18 Akhid" Galile thoem" yam moo so" lo da" uri nya: mang: yo' nya: nhung" tang: nghoid da" Petru ga: da" Simun yo' nya: nhung" Andre eig yug goin du" yen" lang" zi Yesu lo" myang. Khasu" wim gari nya: eig yug gi wimdo, kuang yen" su: eig yug nghoid. 19 Houg: lang" Yesu gi ?Nga" thang: cang ge' re" eig yug ri byu cang kuang da" byu koid wa? ga: tid. 20 Houg: lang" jang: nya: eig yug gi goin ri she: pyam too" kho' lho: Yesu da" thang: moo bo cang loo" bye:.
21 Houg: mo doem xo' so" lo" ri gootu: dazoem" Zebedi da" nya: zoo: tang: Yaku yo' nya: nhung" Yohan gi nya: phoo' yo' dage" lhid khau: moo goin pho: nyid lang" zi lo" myang lang" nya: eig yug ri we' dalheung: dam khe: shu" loo" bye:. 22 Hau: tang: we' lhid yo' nya: phoo' ri she: pyam too" kho' lho: Yesu da" thang: moo bo cang loo" bye:.
(Luk 6.17-19)
23 Hau: lho: Yesu gi Galile mung" goin" cang koem" yen" zoore nyangnu" da" tarha" jung yi moo cang jhau" byid: yen" wigi hau: mungdain: da" ngeibu: lu dang: cang kho" yen" ziyo' mungbyu yi da" noo phyoo" aja: ja:- nooboug: aja: ja: ri zheung: ge loo nhang: yen. 24 Houg: yoomo Yesu da" khyoo: ri Suri mung" goin" khyoug: su" phoid nham lhu: pyo: neing" lo" boem wigi gungdu: ayang" zain: mo, noo phyoo" aja: ja: shau" mo, yo' yu dab mo, ngho' baid mo, yo' khyid: joem: lo, joem: shid: mo, myoo" sho' nya: jhang shu" ju" re" boem ri dangain" ri lhoem: ze: ge lho: nhang: kaid bye:. 25 Houg: yoomo Galile mung" yo' Dekapoli mung"- Yerusalem voogung yo' Yuda mung" goin"- Yodan gyid lang thei: tab' voo khyab daxi: mo mo, byu ajoem atung: bang: gi nya: jhang moo bo cang yen.