23
(Mar 12:38-40: Luk 11:43-46, 20:45-47)
1 Hau: thang: ri Yesu gi byu phung: moo" yi yo' nya: cangzoo: yi ri hid: su" ga: tid.
2 ?Tarha" sara: yi yo' Pharishe gi Moshe da" tarha" ri dangkang: phang shug wa shid re" amyeung" akhang" yo" jo, mo nghoid.
3 Houg: yoomo houg: bang: jhau" byid: ziyo' dakhyoo ti" tam" gyo: cang zei: yhi: ge' nghoid loug we nyangnu" nyang: gi nyang: nyang: jhau" byid: ziyo' dakhyoo" ti" acang boem yoomo nyangnu" koid: yhangti"- acang koid: goo".
4 Nyangnu" nyang: gi gye" lid: lho: voin yau: da" yoovoin ri subi" ri soin' foin: boem. Nyangnu" nyang: gi hau: yoovoin ri bo voin wa shid re" lo, da nyhoug" yo, we' anau tu: yu" boem.
5 Nyangnu" koid: da" moozoo" dangain" gi mungbyu shidkhoin" moo za: te: koid: shug boem. Nyang: nya: da" ngeilang: yo" lo, pu' moo tab ci: da" jhoem: dang: dab du da" shooyid yho' ri je gyi: sho' koid: lho: void ci: boem ago". Byi: sheing: bain: byug thang: we' sheing" sheing: coeb' void to" ago".
6 Pui" khang" moo je reung: da" zhung tang yo' tarha" jung moo we' gootu: khyin: to" da" joyoo ri nyangnu" vho: ago".
7 Kid" vang" moo we' phau" myang: vhu" pid pid wa ziri vho: ngei ago". ?Sara: moo" we"? ga: tid wa ziri we' gyoo: ngei ago".
8 Nghoid loug we' nanu" dangain" mo, gi nya: mang: nya: nhung" nyang: cang" nghoid lho: nanu" da" tho' moo sara: gi dayug kyeing" za: danyid yoomo nanu" nyang: cang" ?sara: we"? ein: akhi: goo".
9 He: mougmyid tho' moo hang" ri we' ?phoo? we" ein: atid goo" goo". Nanu" nya: ?phoo? gi mougkhung: tho' moo dayug kyeing" za: date: nyid.
10 Nanu" mo hang" ri we' vhujhung: phoo we" ein: we atid goo". Ci: wim: gari nanu" moo Meshia ga: da: vhujhung: dayug kyeing" date: nyid.
11 Nanu" mo gyi: thang su: gi nanu" da" deizoo: shi" bui" ca.
12 Nyang: nya: gung ri tu: to' su: gi nyhoem: gyo" loo" wa. Nyang: nya: gung ri nyhoem: khyo' nyid su: gi tu: to' kaid zi shau" wa nghoid.
(Mar 12:40: Luk 11:39-42- 44-52- 20:47)
13 ?Akug void da" tarha" sara: yi yo' Pharishe nanu" gi joem: loo" goo" wa. Subi" mougkhung: mungdain: khyoo: vang loo" wa ga: soin' lo" da" uri nanu" gi khoem" myhid" byid: ago". Nanu" nyang: we' avang lo" boem. Vang loo" wa ga: yoem: kaid nyid mo, ri we' vang loo" wa da" akhang" abyid: boem zigi nanu" shid re" khayhi gyoug phyoo" nghoid.
14 Akug void ci: da" tarha" sara: yi yo" Pharishe" we"- nanu" gi joem: lo" abye: go". Nanu" gi cougmoo" myhi' yi da" yhoem: mo ziyoo joem ri atarha" khyo" lhoid yu boem lho: Subi" gyo: du wa khyo" akyu" sheing" sheing: mho' nyid ago". He: khyoo: yoomo nanu" gi gye" gyi: lid: da" dam ri shau" kham: zo: boem wa.
15 ?Akug void da" tarha" sara: yi yo" Pharishe"- nanu" gi joem: lo" nyid abye: go". Tungbau mo byu dayug ri Yuda noku byu dayug khyo" yo" fang yu wa shid re" Nanu" gi gyid mung" gu:- tung: gung lid loo" sho' pyi" kyang: su" kyo' yen" ago". Phoung: yo" fang too" bye: su: rilang" gi nanu" nyang: mo, eig boem je myoo: sho' moovoo moug: yo" moin: yi" da" byu bui" nhang: pyam boem rigi nanu" shid re" khayhi gyoug: phoo" nghoid.
16 ?Khyoo: shid da" myo, jed mo, we"- nanu" gi joem: lo" abye: go". Hang" nghoid loug we' Noku Yhoem: Moo" myeing ri lang: lho: nheung" rigi ci: aca" ga: myid boem nghoid loug we' hau: zigi nanu" shid re yhoem: mo da" sheing: ri nheung" su gi hau: nheing" khoin" ri cang pyeing ca" ga: jhau" boem rigi nanu" shid re" khayhi' gyoug: pho" nghoid.
17 Ko" da" myojid' mo, we"- hau: da" sheing: ri gyeungshang: nhang: da" Mangso yhoem: yo' sheing: gi khazi je yhau: gyen: lha"? ga: myid.
18 Hang" nghoid loug Mangso da" phoin: ri nheung" rigi ci: aca" ga: myid: boem nghoid loug we' phoin: tho' mo ri nheung" su: gi nya: da" nheing" myeing" ri cang pyeing ca" jhau" ga: jhau" boem rigi nanu" shid re" khayhi gyoug phoo" nghoid.
19 Myo, jed mo, we"- hau: xoin" ri gyeungshang: nhang: da" phoin: yo' hau: xoin" gi kha: loem: je yhau: gyen: jo, la".
20 Phoin: yo" nheung" su: gi hau: phoin: yo' hau: tho' mo xoin" du: dangain" ri bo nheung" zang" bye:.
21 Noku Yhoem: Moo" ri nheung" su: gi hau: yhoem: moo nyid su: Mangsoo: ri bo nheing" zang" bye:.
22 Mougkhung: ri nheing" su: hang" we' Mangso zhungtang yo' houg: moo zhung: jo, su: ri bo nheing" su nghoid.
23 ?Akug void to" da" tarha" sara: yi yo" Pharishe yi we"- nanu" gi joem: lo" abye: go". Nanu" gi sheing: nham"- pagyoem- rin" soi: shi" mo daxi: boem mo daboem da" alu: ri byid: nghoid loug we' hau: tarha" moo bo da" je yhau: gyen: da" tarha" nyeung veung" jheddab da" khyoo:- nheigkhyeig da" khyoo: yo' deingmain" da" khyoo: rigi nanu" lid too" kho ago". He: gu: ri we' cang pyeing" nyid ri ge.
24 Myo, jed da" khyoo: shid mo, we"- nanu" gi pyoeb soid abo myhau: kaid wa shid re" gyid ri kain: shug ago". Nghoid loug we' gola-ug zeing: rigi yo" myhau: pyam nyid goo" nhung: lha".
25 ?Akug void tarha" sara: yi yo" Pharishe yi we"- nanu" gi joem: lo" abye: go". Nanu" gi khu, bain ri atho' moo za: te: cid" lho: nghoid loug we' nheigloem: ung: khoug: moo gi myo, no, vhoo: bo- akhyeing" ashoeb- khoug" zo: mhoug zo: da" ziyo' byeung" jo, zigi nanu" shid re" khayhi' gyoug phoo" nghoid.
26 Myo, jed da" Pharishe yi we" nanu" da" khu, bain joem ri akhoug: moo shi" cid" lho' pyam ge. Houg: su" koid lang" atho shoid moo we' young" lho' loo wa zi nghoid.
27 ?Akug void tarha" sara: yi yo' Pharishe yi we"- Nanu" gi shoo" foid" joid to" da" loeb yo" du nyid. Hau: da" loeb gi atho moo young" jo, nghoid loug we' akhoug: moo gi byu shid: shooyoug: yo" mang boeb byeung" bo jo zigi nanu" shid re" khayhi' gyoug phoo" nghoid.
28 Houg: yo' dakhyoo" ti" nanu" we' atho' moo gi deingmain" mo, ti nghoid loug we' nheigloem: ung: khoug: moo gi byu ge akug za: te: void to" lho: yooboo yo" za: dabyeung" jo, ago".
(Luk 11:47-51)
29 ?Akug void da" tarha" sara: yi yo" Pharishe" yi we"- nanu" gi joem: lo" abye: go". Nanu" gi lapi: yi da" loeb' ri koid: lho: deingbyeing" mo da" loeb' ri we' shoung: yhung' byid: boem da zigi nanu" shid re khayhi' gyoug phoo" nghoid.
30 Hau: tho' moo nanu" gi ngoonu" za: phoug" phyid" da" pyaid mo kangso dei wa ein: rigi Lapi: yi ri said pyam jangmoo boo wa anghoid ga: tid ago".
31 Houg: yoomo nanu" gi Lapi: yi ri said da" nya: myid nya: zoo: yi nghoid da" khyoo: ri yhen: yu boem bye: nhung: lha".
32 Nanu" da" phoug" phyid" yi da" pyaid mo shoid vhang: lo da" khyoo: ri lo" thang sho' dajha" cang loo" ge.
33 Myu joem yo' lhangmyu nya: myid nya: zoo: yi we"- nanu" gi moovoo moug: moo kham: zo: wa da" dam mo khasu" koid: se' loid lo" boem wa lha".
34 Houg: su" nghoid yoomo nanu" ri ngoo tid nau da" zigi nanu" da" jhang khyoo lapi: yi phajhi" boo mo, tarha" sara: yi ngoo nhang: kaid wa. Nanu" gi houg: bang: dayham" gi lhoem: said pyam lho: dayham" rigi pyang" zeing moo jen" lhang" to" boem wa. Dayham" ri gi tarha" jung' khoug: moo baid lho: dayham" rigi davoo mo davoo khyoo cang khaid lo" boem wa.
35 Houg: yoomo ce: yooboo abo da" Abela da" suid" mo wigi young" lho' da" Noku yhoem: yo" phoin: gyoo: mo nanu" said pyam shau" da" Barakhi nya: zoo:- Zakhari da" suid" moo ju" sho' young" lhoo mo, dangain" ri suid" shoin: nhang: boem yoomo nanu" gi yooboo dang: phyed zi shau" goo" wa zi nghoid.
36 Hid: yhangti" suid" shoin: pyam mo, dangain" mo, shid re" he: da" pyaid mo byu yi da" tho' moo yooboo dam shau" kham: zoo: wa ein: nanu" ri ngoo deing" deing tid bye:.
(Luk 13:34-35)
37 ?O" Yerusalem we" Yerusalem voogung we"- nang gi Lapi: yi re" jhang khyoo Mangsoo nhang: kaid da" lagyoo: yi ri luggo, yo" du" said gyo, vhoeb' zheung' gi gyo, nu" yi ri nya: dung soo" khoug: moo khe: zheung" kaid to" yhangti" ngoo gi re" mung" byu yi dangain" ri khayhi' khe: zheung" too" noug loug we' nang nu" nyang: agyoo: nghoid ago:.
38 Yu" we' re" Noku Yhoem: Moo" gi akoem: she: pyam too" wim bye:.
39 ?Aseing: da" myeing khyang" mo ju" re" da" Mangso mainkaid su:? ga: nang tid bidnyid aju" ju" gi akhid" mo khanham we' nang ngoo ri; doem myang loo: zi anghoid.